ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
លោកស្រី ហែម ស៊ីណាត ដែលជាបេក្ខជនក្នុងការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប មានវ័យចំណាស់ជាងគេ បានសម្រេចដាក់ពាក្យចូលរួមប្រឡងម្តងទៀតនៅឆ្នាំនេះ ក្រោយមិនទទួលបានលទ្ធផលល្អកាលពីឆ្នាំទៅ។
លោកស្រី ហែម ស៊ីណាត មានអាយុ៥៧ឆ្នាំ គឺជាគ្រូអក្ខរកម្ម មកពីភូមិថ្នរមៀល ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ ។ សម្រាប់ការប្រឡងនៅឆ្នាំនេះ លោកស្រីជាបេក្ខជនលេខ៤៨៩ ស្ថិតនៅមណ្ឌលអនុវិទ្យាល័យទឹកថ្លា ខេត្តបន្ទាយមានជ័យ, លោកស្រីនៅតែបង្ហាញហេតុផលថា ការចូលរួមប្រឡងសញ្ញាបត្រមធ្យមសិក្សាទុតិយភូមិនេះ គឺរំពឹងថា នឹងទទួលបានសញ្ញាបត្រមធ្យមសិក្សាទុតិយភូមិ ដែលអាចឱ្យលោកស្រីក្លាយជាគ្រូបង្រៀនយ៉ាងពិតប្រាកដ។
ជាមួយគ្នាសម្រាប់ការប្រឡងម្តងទៀតនៅឆ្នាំនេះ លោកស្រីមានជំនឿចិត្តថា នឹងទទួលបានលទ្ធផលល្អ ព្រោះក្រោយទទួលបានលទ្ធផលមិនល្អក្នុងការប្រឡងកាលពីឆ្នាំទៅ លោកស្រីបានខិតខំរៀនបន្ថែមតាមរយៈនៅសាលាផ្ទាល់នាថ្ងៃសៅរ៍ អាទិត្យ ក៏ដូចជាការសិក្សាបន្ថែមតាមរយៈអនឡាញ។
គួររំលឹកថា កាលឆ្នាំទៅលោកស្រី ហែម ស៊ីណាត បានដាក់ពាក្យប្រឡងសញ្ញាបត្រមធ្យមសិក្សាទុតិយភូមិ ដោយពេលនោះលោកស្រីបានក្លាយជាបេក្ខជនដែលមានវ័យចំណាស់ជាងគេ ។ លោកស្រីបានបង្ហាញពីបំណងក្នុងការប្រឡង ដោយរំពឹងថា នឹងអាចក្លាយជាគ្រូបង្រៀនយ៉ាងពិតប្រាកដ, តែយ៉ាងណាលទ្ធផល នៃការប្រឡងបាក់ឌុបកាលពីឆ្នាំ២០២២ បានបង្ហាញថា លោកស្រីមិនបានជាប់នោះទេ។
ក្រោយប្រកាសលទ្ធផលមិនបានល្អនោះ លោកស្រី ហែម ស៊ីណាត មិនបានរាថយនោះឡើយ ហើយបានប្តេជ្ញាបន្តប្រឡងម្តងទៀត ដើម្បីសម្រេចនូវក្តីស្រមៃរបស់លោកស្រី។
ការមិនរាថយរបស់លោកស្រី ហែម ស៊ីណាត នេះ បានធ្វើឱ្យសម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តីកម្ពុជា ចូលរួមលើកទឹកចិត្តចំពោះការរៀនពេញមួយជីវិត ហើយបានជួយឧបត្ថម្ភលោកស្រីចំនួន១០លានរៀល ហើយបានជូនពរលោកស្រីឱ្យប្រឡងជាប់នៅឆ្នាំបន្ទាប់។
ជាមួយគ្នា កាលពីពេលថ្មីៗនេះ តាមរយៈទំព័រ facebook ក្រសួងអប់រំ យុវជន និងកីឡា ក៏បានផ្ញើសារជូនពរ និងផ្តល់កម្លាំងចិត្ត ដល់លោកស្រី ហែម ស៊ីណាត ផងដែរ ឱ្យទទួលបានជោគជ័យក្នុងការប្រឡងសញ្ញាបត្រមធ្យមសិក្សាទុតិយភូមិ សម្រាប់ឆ្នាំថ្មីនេះ។
បើយោងតាមទិន្នន័យរបស់ក្រសួងអប់រំ យុវជន និងកីឡា សម្រាប់ការប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា២០២២-២០២៣នេះ មានបេក្ខជនបំពេញវិជ្ជា ដាក់ពាក្យប្រឡងចំនួន ៣៣៤២នាក់ ក្នុងនោះបេក្ខនារីចំនួន ១១៧២នាក់ និងបេក្ខជនស្វ័យរិនបំពេញវិជ្ជា ចំនួន ១៦៣២នាក់ ក្នុងនោះបេក្ខនារីចំនួន ៣១៧នាក់៕
