ភ្នំពេញ – នាពិធីបើកបវេសនកាលឆ្នាំសិក្សាថ្មី ២០២២-២០២៣ ក្របខ័ណ្ឌអប់រំទូទាំងរាជធានីភ្នំពេញ នៅព្រឹកថ្ងៃចន្ទ ទី០២ ខែមករា សិស្សពូកែជាង ៤ពាន់នាក់បានទទួលបានរង្វាន់លើកទឹកចិត្តពីរដ្ឋបាលរាជធានីភ្នំពេញ ។ កញ្ចប់រង្វាន់លើកទឹកចិត្តនេះ មានសម្ភារៈសិក្សា និងថវិកាមួយចំនួនប្រគល់ជូនសិស្សពូកែថ្នាក់អន្តរជាតិ ថ្នាក់ជាតិ ថ្នាក់រាជធានី និងសិស្សពូកែប្រចាំថ្នាក់នៅវិទ្យាល័យ ហ៊ុន សែន ប៊ុនរ៉ានី វត្តភ្នំ ។

ជាអធិបតីភាពពិធីបើកបវេសនកាលឆ្នាំសិក្សាថ្មី និងប្រគល់រង្វាន់លើកទឹកចិត្តជូនសិស្សពូកែ ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ មានប្រសាសន៍ថា ការអប់រំដើរតួនាទីយ៉ាងសំខាន់ចូលរួមអភិវឌ្ឍន៍ធនធានមនុស្សនៅក្នុងសង្គម ។ ទន្ទឹមគ្នានេះ ឯកឧត្តមលើកទឹកចិត្តឱ្យសិស្សានុសិស្សទាំងអស់ត្រូវខិតខំប្រឹងប្រែងសិក្សារៀនសូត្រ​ មិនត្រូវប្រព្រឹត្តអំពើពាលាអាវាសែ និងចៀសឱ្យឆ្ងាយពីគ្រឿងញៀន ។

ឯកឧត្តមអភិបាលនៃគណៈអភីបាលរាជធានីភ្នំពេញ មានប្រសាសន៍បញ្ជាក់ថា ៖

“សិស្សានុសិស្សខិតខំក្រេបជញ្ជក់ចំណេះដឹងពីលោកគ្រូអ្នកគ្រូ និងគេចឱ្យឆ្ងាយពីសកម្មភាពមិនគប្បី ដូចជា សកម្មភាពលេងល្បែងស៊ីសង ការប្រព្រឹត្តអំពើពាលាអាវាសែ ការប្រើប្រាស់គ្រឿងញៀន ក្មេងទំនើង និងទង្វើខុសច្បាប់ផ្សេងៗ ។ សិស្សានុសិស្សខំប្រឹងរៀនសូត្រឱ្យអនាគតបានប្រសើរ សមនឹងពាក្យស្លោកទំពាំងស្នងឫស្សី យុវជនប្រុសស្រីស្នងជាតិ”

គួរបញ្ជាក់ថា មន្ទីរអប់រំ យុវជន និងកីឡា រាជធានីភ្នំពេញ បានផ្តល់រង្វាន់លើកទឹកចិត្តដល់សិស្សពូកែសម្រាប់ក្របខ័ណ្ឌអប់រំទូទាំងរាជធានីភ្នំពេញ មានចំនួនជាង ៤ពាន់នាក់ ដោយក្នុងនោះមានសិស្សពូកែថ្នាក់អន្តរជាតិចំនួន ៨០នាក់ ។

ទន្ទឹមគ្នានេះ ឯកឧត្តមអភិបាលនៃគណៈអភីបាលរាជធានីភ្នំពេញ ក៏លើកទឹកចិត្តដល់គណៈគ្រប់គ្រងសាលា លោកគ្រូអ្នកគ្រូ និងសិស្សានុសិស្សទាំងអស់ ត្រូវត្រៀមលក្ខណៈខិតខំហ្វឹកហាត់កីឡា ដើម្បីដណ្ដើមជ័យលាភី នាឱកាសដែលកម្ពុជាក្លាយជាម្ចាស់ផ្ទះរៀបចំការប្រកួតកីឡាអាស៊ានប៉ារ៉ាហ្គេម លើកទី១២ និងព្រឹត្តិការណ៍ថ្នាក់តំបន់អាស៊ីអាគ្នេយ៍ ស៊ីហ្គេម លើកទី៣២ ឆ្នាំ២០២៣ ៕