ភ្នំពេញ  –  លោក ស៊ុយ សំណាង ជាកីឡាករវាយសីមួយរូបដែលបានចូលរួមប្រកួតកីឡាវាយសី (PARA BADMINTON) នៅក្នុងព្រឹត្តិការណ៍អាស៊ានប៉ារ៉ាហ្គេម ។ ថ្វីត្បិតការប្រកួតលើកនេះ លោក ស៊ុយ សំណាង មិនទទួលបានជ័យជម្នះមេដាយលើការប្រកួតវិញ្ញាសារវាយសីរបស់ខ្លួនក៏ពិតមែន ប៉ុន្តែលោកបានចាត់ទុកការចូលរួមប្រកួតកីឡាប៉ារ៉ាសម្រាប់ជនមានពិការភាព ហាក់កំពុងបង្កើតឱកាសឱ្យរូបលោកបង្ហាញពីភាពរឹងមាំ និងទំនុកចិត្តលើខ្លួនឯងកាន់តែខ្លាំង ។

កីឡាករមានទីកន្លែងកំណើតនៅខេត្តសៀមរាបរូបនេះ បាននិយាយថា កីឡាបានជួយដល់រូបលោកយ៉ាងច្រើន ។ ពិសេសកីឡាជួយរំដោះផ្នត់គំនិតរបស់លោកឱ្យចាកចេញពីឧបសគ្គលំបាកសម្រាប់ជនមានពិការភាព ។ តាមរយៈការហ្វឹកហាត់ និងការចូលរួមប្រកួតកីឡាវាយសីទាំងក្នុងនិងក្រៅបរទេស សកម្មភាពរាងកាយ និងស្មារតីកីឡា កំពុងជួយឱ្យលោកមានជំនឿចិត្តកាន់តែខ្លាំងចំពោះខ្លួនឯង ។

លោក ស៊ុយ សំណាង កីឡាករវាយសី បានបញ្ជាក់ថា ៖ 

“ ទទួលស្គាល់ថា ពិការភាពរាងកាយរបស់យើងគឺទន់ខ្សោយ ! ប៉ុន្តែជម្នះភាពទន់ខ្សោយនេះបាន គឺគ្មាននរណាម្នាក់អាចជួយយើងបានគ្រប់ពេលនោះទេ មានតែយើងខ្លួនឯងទេដែលអាចជួយខ្លួនឯងបាន ហើយយើងអាចបង្ហាញសមត្ថភាពផ្ទាល់ខ្លួនឱ្យអ្នកដទៃបានដឹងពីភាពខ្លាំងរបស់យើង”

កីឡាករវាយសីវ័យ ៣៤ឆ្នាំរូបនេះ បាននិយាយដោយមានទំនុកចិត្តថា គ្មាននរណាម្នាក់អាចស្គាល់រូបលោកនោះទេ ប្រសិនបើលោកមិនបានជ្រើសរើសកីឡា និងប្រកួតកីឡា ។ ការជម្នះលើឧបសគ្គប្រកួតរបស់កីឡាករមានពិការភាពម្នាក់ៗ គឺជាសក្ខីភាពអាចបញ្ជាក់ថា ពិការភាពមិនមែនជាឧបសគ្គឡើយសម្រាប់អត្តពលិកមានពិការភាព ។

សូមជម្រាបថា លោក ស៊ុយ សំណាង បច្ចុប្បន្នជាបុគ្គលិកកំពុងបម្រើការងារនៅក្លឹបវាយសីមួយកន្លែងនៅខេត្តសៀមរាប ។ លោកមានពិការភាពស្វិតដៃម្ខាង និងជើងម្ខាងតាំងពីកុមារភាព ។

បើទោះបីលោក ស៊ុយ សំណាង ប្រកួតអស់ពីសមត្ថភាពតែពុំទទួលបានជ័យជម្នះ លោកនៅតែបន្តគាំទ្រដល់មិត្តភក្តិ និងកីឡាករមកពីប្រទេសសមាជិកអាស៊ានទាំងអស់ដោយស្នាមញឹម ។ តាមរយៈសម្ភាសន៍ជាមួយ AMS Education លោក ស៊ុយ សំណាង លើកទឹកចិត្តដល់ជនមានពិការភាព គួរជ្រើសរើសប្រភេទកីឡាណាមួយដែលសមស្របតាមកាយសម្បទា ដើម្បីហ្វឹកហាត់ និងបញ្ចេញសក្តានុពលរបស់ខ្លួន ៕