ភ្នំពេញ – មុនសម្រេចចិត្តដាក់ពាក្យស្នើសុំអាហារូបករណ៍សិក្សានៅប្រទេសចិន សិស្សត្រូវធ្វើការស្រាវជ្រាវបន្ថែមអំពីសាលាដែលត្រូវទៅរៀន ជំនាញដែលចង់រៀន និងទីផ្សារការងារក្រោយរៀនចប់ ។ នេះជាការលើកឡើងរបស់ កញ្ញា ខឹម សិរីរចនា និស្សិតអាហារូបករណ៍រដ្ឋាភិបាលចិនឆ្នាំសិក្សា២០២២-២០២៣ ។

កញ្ញា ខឹម សិរីរចនា បានឱ្យដឹងថា មុនសម្រេចចិត្តដាក់ពាក្សស្នើសុំអាហារូបករណ៍សិក្សានៅប្រទេសចិន កញ្ញាបានស្វែងយល់ពីទីផ្សារការងារនៃជំនាញ Software Engineering ដែលជាជំនាញមួយក្នុងចំណោមជំនាញជាច្រើនទៀតដែលមានសក្ដារនុពលក្នុងពេលបច្ចុប្បន្ន និងពេលអនាគតរបស់កម្ពុជា ។

កញ្ញា ខឹម សិរីរចនា

“ក្រៅពីការស្រាវជ្រាវអំពីទីផ្សារការងារ ខ្ញុំក៏មានចំណូលចិត្តទៅលើការសរសេរកូដ និងបច្ចេកវិទ្យាផងដែរ “

កញ្ញា រចនា បានបន្តថា ក្រៅពីចំណូលចិត្ត និងស្វែងយល់អំពីទីផ្សារការងារក្រោយសិក្សា កត្តាគ្រឹះស្ថានសិក្សាក៏ជាចំណុចកាន់តែសំខាន់ដែលធ្វើឱ្យមានការសម្រេចចិត្តដាក់ស្នើពាក្យអាហារូបករណ៍នេះដែរ ។ កញ្ញា រចនា បានស្រាវជ្រាវអំពីសាកលវិទ្យាល័យនៅប្រទេសចិនដែលមានសាកលវិទ្យាល័យជាច្រើនជាប់ចំណាត់ថ្នាក់ពិភពលោកទទួលស្គាល់គុណភាពអប់រំ និងប្រសិទ្ធភាព ។ ជាមួយគ្នានេះ ការសិក្សានៅប្រទេសចិននឹងធ្វើឱ្យកញ្ញាអាចប្រើប្រាស់ភាសាចិនបានកាន់តែប្រសើរខណៈភាសាចិនកំពុងបំពេញតម្រូវការទីផ្សារការងារក្នុងពេលបច្ចុប្បន្ននៅប្រទេសកម្ពុជាបន្ទាប់ពីភាសាអង់គ្លេស ។

តើយុវតី ខឹម សិរីរចនា ធ្វើបែបណាទើបទទួលបានអាហារូបករណ៍ ?

ចំពោះសំណួរនេះ យុវតី ខឹម សិរីរចនា និយាយថា ដើម្បីទទួលបានអាហារូបករណ៍ទៅសិក្សានៅប្រទេសចិន កញ្ញាបានតាមដានព័ត៌មានអាហារូបករណ៍ បន្ទាប់មកកញ្ញាបានទៅជួបពិភាក្សាជាមួយសមាគមន៍និស្សិតកម្ពុជាប្រចាំសាធារណរដ្ឋប្រជាមានិតចិន(ACSC) ដើម្បីទទួលបានបទពិសោធន៍ពីសិស្សច្បង អំពីការជ្រើសរើសសាកលវិទ្យាល័យ របៀបដាក់ពាក្យស្នើរសុំអាហារូបករណ៍ និងត្រៀមលក្ខណៈសម្រាប់បំពេញលក្ខខណ្ឌនានា ដូចជាកម្រិតភាសាអង់គ្លេសជាដើម ។

ក្រោយទទួលបានលទ្ធផលប្រឡង និងជាប់ជាបេក្ខភាពអាហារូបករណ៍ រចនា បានរៀនត្រៀមភាសាចិនដើម្បីសម្រួលដល់ការទំនាក់ទំនង ស្រាវជ្រាវបន្ថែមអំពីសាកលវិទ្យាល័យ តំបន់ដែលត្រូវរស់នៅនិងសិក្សា និងរៀបចំឯកសារចាំបាច់ស្នើសុំទិដ្ឋាការសិក្សា និងស្នាក់នៅប្រទេសចិន ។

នៅក្នុងកម្មវិធីអាហារូបករណ៍នេះ កញ្ញា ខឹម សិរីរចនា ទទួលបានការសិក្សាជំនាញ Software Engineering រយៈពេល៥ឆ្នាំ ក្នុងនោះមានបញ្ចូលជាថ្នាក់ភាសាចិនរយៈពេលមួយឆ្នាំពេញ។ ជាមួយគ្នានេះអាហារូបករណ៍ ផ្តល់នូវការឧបត្ថម្ភដូចជា ថ្លៃសិក្សា ថ្លៃស្នាក់នៅ ប្រាក់ឧបត្ថម្ភប្រចាំខែសម្រាប់ថ្លៃចាយវាយលើម្ហូបអាហារ និងធនារ៉ាប់រងសុខភាព។

“«ក្រោយទទួលបានឈ្មោះជាប់អាហារូបករណ៍ ខ្ញុំបានរៀនត្រៀមភាសាចិនដើម្បីសម្រួលដល់ការទៅដល់គោលដៅ និង ស្វែងយល់ព័ត៌មានបន្ថែមអំពីសាកលវិទ្យាល័យ និងតំបន់ដែលយើងបំរុងនឹងមកស្នាក់នៅ ដើម្បីបានត្រៀមខ្លួនជាមុន។ ចំណែកឯការងារចាំបាច់មួយវិញទៀតទៅការរៀបចំឯកសារដែលចាំបាច់សម្រាប់ស្នើរសុំ Visa “

សម្រាប់​ការ​ទៅសិក្សា​នៅប្រទេស​ចិននេះ ក៏​ជួប​ប្រទះ​នូវ​បញ្ហាផងដែរ ក្នុងនោះបញ្ហាចម្បងគឺអាកាសធាតុ ព្រោះ រចនា និងមិត្តនិស្សិតដទៃទៀតពេល​ទៅដល់ប្រទេសចិន ក្នុងស្ថិត​ក្នុង​រដូវត្រជាក់ និងត្រូវតម្រូវ​ឱ្យ​ធ្វើចត្តាឡីស័កច្រើនដំណាក់កាលដែលមានផលពិបាកក្នុងការបរិភោគ ។ ចំណែកការធ្វើទំនាក់ទំនងវិញ គឺពុំសូវជាបញ្ហានោះទេ ព្រោះប្រជាជនចិនមានភាពរួសរាយរាក់ទាក់ លោកគ្រូអ្នកគ្រូផ្ដល់ការយកចិត្តទុកដាក់ ជម្រុញលើកទឹកចិត្ត ផ្ដល់ការប្រាស្រ័យទាក់ទងល្អ និងការ​អនុវត្តន៍និយាយភាសាចិនដែលអាចធ្វើឱ្យនិស្សិតអាចប្រើប្រាស់ភាសាចិនបានឆាប់រហ័សក្នុងរយៈពេលខ្លី  ។

យ៉ាងណាក៏ដោយ ក្រោយបញ្ចប់ការសិក្សា កញ្ញា ខឹម សិរីរចនា មានគោលដៅចង់ចូលរួមជាផ្នែកមួយជួយជម្រុញការរីកចម្រើនផ្នែកបច្ចេកវិទ្យានៅ​ប្រទេសកម្ពុជាឱ្យកាន់តែមានសន្ទុះ និងចូលរួមផ្សព្វផ្សាយអំពីសារៈសំខាន់នៃចំណេះដឹងទៅលើប្រព័ន្ធបច្ចេកវិទ្យាដើម្បីឱ្យ​អ្នកជំនាន់ក្រោយបានយល់ដឹង ។ ជាពិសេសចំពោះក្មេងស្រី ធ្វើយ៉ាងណាឱ្យ​ពួកគេហ៊ានចាប់យកក្តីស្រមៃសិក្សាជំនាញដែលខ្លួនចូលចិត្ត ដោយលុបបំបាត់ផ្នត់គំនិតថា មុខវិជ្ជាបច្ចេកវិទ្យាសក្តិសមសម្រាប់តែបុរសនោះ ។ ជារួម កញ្ញា សិរីរចនា សូមជូនពរ និងលើកទឹកដល់សិស្សានុសិស្សទាំងអស់ដែលមានក្ដីស្រមៃចង់បន្តការសិក្សានៅក្រៅប្រទេស សូមខិតខំស្វះស្វែងចាប់យកឱកាស និងសម្រេចក្ដីស្រមៃឱ្យបានដើម្បីអភិវឌ្ឍខ្លួនឯងថែមមួយកម្រិតក្រៅពីការសិក្សាជំនាញនៅសាកលវិទ្យាល័យ ហើយថា ការសិក្សា និងស្នាក់នៅក្រៅប្រទេសធ្វើឱ្យសិស្សអាចរៀនសូត្រកាន់តែច្រើនថែមទៀតដូចជា ចំណេះដឹងផ្នែកភាសានៃប្រទេសនោះ និងជំនាញទន់ផ្សេងៗដូចជា ចំណេះដឹងក្នុងការប្រាស្រ័យទាក់ទង ការដោះស្រាយបញ្ហា វិធីសាស្ត្របង្កើនទំនុកចិត្តខ្លួនឯង និងឯករាជ្យភាពជាដើម ៕