ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ស្ថានទូតអ៊ីស្រាអែលប្រចាំនៅកម្ពុជា និងសភាពាណិជ្ជកម្មកម្ពុជា-អ៊ីស្រាអែល កាលពីដើមសប្តាហ៍នេះ បានបង្ហាញពីការចង់សហការជាមួយបណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប ក្នុងការបើកដំណើរការថ្នាក់បង្រៀនសរសេរកូដ និងបំណិនឌីជីថល (Coding & Digital Skill) សម្រាប់កុមារ និងយុវជនមានជីវភាពខ្វះខាត ដើម្បីបណ្តុះបណ្តាលពួកគាត់ឱ្យក្លាយជាមូលធនមនុស្សនៅថ្ងៃអនាគត សម្រាប់ចូលរួមចំណែកអភិវឌ្ឍសេដ្ឋកិច្ចនៅកម្ពុជាឱ្យកាន់ប្រសើរឡើងថែមទៀត។
ឧកញ៉ា ប៉ិច បូឡែន អគ្គនាយបណ្តាញគ្រឹះស្ថានអប់រំ វេសឡាញ អេឌ្យូខេសិន គ្រុប បានលើកឡើងថា តាមបទពិសោធ និងដំណើរទស្សនកិច្ចរបស់លោកជាមួយធុរៈជនកម្ពុជាមួយចំនួនទៅប្រទេសអ៊ីស្រាអែលកន្លងមក លោកយល់ថា អ៊ីស្រាអែលជាប្រទេសមួយដែលមានការអប់រំ និងការអភិវឌ្ឍផ្នែកបច្ចេកវិទ្យាព័ត៌មាន និងឌីជីថលទំនើបឈានមុខគេមួយ ហើយវិស័យការងារជាច្រើនត្រូវបានដាក់បញ្ចូលបច្ចេកវិទ្យាជាជំនួយ ដើម្បីឱ្យកិច្ចការទាំងនោះទទួលបានប្រសិទ្ធភាព និងរីកចម្រើន។
លោកឧកញ៉ាបន្តទៀតថា វិស័យបច្ចេកវិទ្យាព័ត៌មាន និងឌីជីថល បានចូលរួមយ៉ាងសំខាន់ក្នុងការជំរុញកំណើនសេដ្ឋកិច្ចជាតិ ការតភ្ជាប់ទំនាក់ទំនងនិងកិច្ចសហប្រតិបត្តិការជាមួយប្រទេសទូទាំងពិភពលោក ដោះស្រាយនិងបង្កើនប្រសិទ្ធភាពការងារក្នុងវិស័យធនាគារ សុខាភិបាល អប់រំ កសិកម្ម និងអាជីវកម្មជាដើម។
លោកឧកញ៉ាបានបញ្ជាក់ថា មិនថាវិស័យអប់រំសាធារណៈ ឬឯកជននោះទេ ការបញ្ជូលបំណិនបច្ចេកវិទ្យាព័ត៌មាន និងឌីជីថលនឹងផ្តល់ចំណេះដឹង និងបច្ចេកទេស ក៏ដូចជាជួយសិស្សានុសិស្សទៅថ្ងៃអនាគត។ ជាក់ស្តែង បណ្តាញសាលារៀនវ៉េស្ទឡាញន៍ និងសាលារៀនណត្សឡាញន៍ បានបញ្ជូលចំណេះដឹងផ្នែកបច្ចេកវិទ្យាព័ត៌មាន និងឌីជីថលចាប់តាំងពីថ្នាក់ទី៣ ដល់ទី១១ ដើម្បីជំរុញពួកគាត់ទទួលបំណិនបច្ចេកវិទ្យា និងមានមូលដា្ឋនគ្រឹះផ្នែនេះច្បាស់លាស់មួយ សម្រាប់បំពេញការងារនៅពេលបញ្ចប់កម្រិតវិទ្យាល័យ។
សូមជំរាបថា គម្រោងកិច្ចសហការនេះ គឺជាកិច្ចការងារសង្គម ហើយនឹងផ្តល់ឱកាសថ្មីមួយបន្ថែមទៀតដល់កុមារ និងយុវជនកម្ពុជាដែលមានជីវភាពខ្វះខាត ទទួលបានចំណេះដឹងថ្មីៗផ្នែកបច្ចេកវិទ្យាព័ត៌មាន និងឌីជីថល ព្រមទាំងបទពិសោធន៍ពីប្រទេសអ៊ីស្រាអែល សម្រាប់ការអភិវឌ្ឍប្រទេសជាតិយើង។
គួរបញ្ជាក់ថា ប្រទេសអ៊ីស្រាអែលជាប្រទេសមួយឈានមុខគេក្នុងវិស័យសន្តិសុខតាមអ៊ីនធឺណេត បញ្ញាសិប្បនិម្មិត និងបច្ចេកវិទ្យាហិរញ្ញវត្ថុ។ ក្រុមហ៊ុនបច្ចេកវិទ្យាធំៗជាច្រើននៅលើពិភពលោកមានមជ្ឈមណ្ឌលស្រាវជ្រាវ និងអភិវឌ្ឍន៍នៅអ៊ីស្រាអែល រួមមាន Microsoft, Google, Apple និង Intel៕
