ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការសម្រេចចិត្តសាកល្បងជិះកង់ទៅធ្វើការ ឬក៏ជិះកង់កម្សាន្ត គឺជាការចាប់ផ្តើមបង្កើនសកម្មភាពរីករាយទៅក្នុងដំណើររស់នៅប្រចាំថ្ងៃ ដោយហេតុថា ការជិះកង់បានរួមចំណែកក្នុងការសន្សំថវិកា ការកម្សាន្ត និងធ្វើឱ្យសុខភាពល្អ។ តាមរយៈគេហទំព័រ Cyclinguk បានប្រាប់ពីហេតុផលមួយចំនួនដែលអ្នកគួរជ្រើសរើសការធ្វើដំណើរដោយកង់ទៅធ្វើការ ឬហាត់ប្រាណ ឬជាការកម្សាន្ត។
១.សន្សំថវិកា ៖ ការប្រើប្រាស់កង់ជិះទៅធ្វើការ សាកសមជាពិសេស ចំពោះអ្នកដែលចាំបាច់ត្រូវសន្សំថវិកា ទោះបីជាកង់ខ្លះមានតម្លៃថ្លៃក្នុងការទិញក៏ពិតមែន ប៉ុន្តែការចំណាយថវិកាក្នុងការថែទាំ និងជួសជុលនៅមានកម្រិតទាបជាងឡានដដែល ដូច្នេះការជ្រើសរើសមធ្យោបាយ ធ្វើដំណើរដោយកង់ គឺជាជំហានក្នុងការសន្សំភ្លាមៗ រាប់ចាប់ពីពេលផ្តើមអនុវត្តន៍សកម្មភាព។
២.កម្សាន្ត ៖ ជំនួសឱ្យការជាប់គាំងក្នុងចរាចរណ៍ ដែលទៅមុខមិនរួច ថយក្រោយមិនកើត ការជ្រើសរើសកង់ជាមធ្យោបាយធ្វើដំណើរ គឺជាវិធីមួយ ជួយឱ្យការទៅមុខបានរហ័ស និងងាយស្រួលក្នុងការបត់បែន។
៣.សាកល្បងបរិយាកាសថ្មីៗ ៖ ប្រសិនបើអ្នកជ្រើសរើសការធ្វើដំណើរដោយប្រើប្រាស់ មធ្យោបាយសាធារណៈ ឬរបស់រដ្ឋ នោះអាចនឹងមិនសូវមានជម្រើសក្នុងការគយគន់បរិយាកាស ឬទៅផ្លូវដែលខ្លួនចង់បានទេ ឬក៏ពិបាកក្នុងការបត់បែនទៅកន្លែងដែលខ្លួនចង់ទៅ ប៉ុន្តែការជ្រើសរើសធ្វើដំណើរមធ្យោបាយផ្ទាល់ខ្លួនតាមរយៈកង់ វាបានផ្តល់នូវបទពិសោធន៍វិជ្ជមានជាច្រើន ជាពិសេសពេលទៅផ្លូវក្នុងសហគមន៍ ឬតំបន់តូចៗដែលខ្លួនកំពុងតែរស់នៅ។
៤.សង្កេតជុំវិញខ្លួន ៖ សម្រាប់មនុស្សមួយចំនួន សកម្មភាពជិះកង់ជាការបន្សាំនឹងភាពរីករាយដោយគ្រាន់តែជិះក្នុងល្បឿនធម្មតាៗ ហើយជាវិធីសាស្រ្តដ៏ស្ងប់មួយក្នុងការធ្វើដំណើរ និងការវិភាគបរិយាកាសបានល្អិតល្អន់ មិនថាផ្លូវក្នុងទីក្រុង ឬក៏ជាយក្រុងនោះទេ ការជិះកង់ជាឱកាសពិនិត្យរាល់សកម្មភាព និងទេសភាពតាមដងវិថី។
៥.សន្សំពេលវេលា ៖ ក្នុងតំបន់ខ្លះ ការជិះកង់អាចលឿនជាងការជិះយានជំនិះដទៃ ឬក៏មធ្យោបាយសាធារណៈ ជាពិសេសនៅចំកណ្តាលទីក្រុងមួយដែលមានចរាចរណ៍មមាញឹក ដោយហេតុថា កង់អាចធ្វើការផ្លាស់ប្តូរទិសដៅ ប្រកបដោយភាពងាយស្រួល និងភាពបត់បែនផងដែរ។
៦.បង្កើតទម្លាប់ហាត់ប្រាណប្រចាំថ្ងៃ ៖ ហេតុផលមួយដែលពេញនិយមក្នុងការរារាំងការធ្វើលំហាត់ប្រាណ គឺមនុស្សមិនមានពេលវេលាគ្រប់គ្រាន់។ ចំពោះអ្នកធ្វើការពេញម៉ោង មិនថា ធ្វើការនៅផ្ទះ ធ្វើការនៅក្រុមហ៊ុន ឬប្រភេទកិច្ចការសង្គមនោះទេ ការខ្វះពេលវេលា ឬការបែងចែកពេលជាកត្តាចម្បងមួយរារាំងពួកគេឱ្យបាត់បង់ឱកាសក្នុងការធ្វើលំហាតប្រាណ ដែលជាហេតុបង្ហាញឱ្យឃើញថា ការជិះកង់ជាមធ្យោយបាយមួយជួយជំរុញខ្លួនឯងឱ្យមានទម្លាប់ហាត់ប្រាណបានជាប្រចាំ។
៧.បង្កើនភាពឈ្លាសវៃ ៖ ការជិះកង់យ៉ាងហោចណាស់៣០នាទី ក្នុងមួយថ្ងៃ អាចអភិវឌ្ឍន៍ការចងចាំ របៀបនៃការគិត និងការគ្រប់គ្រងពេលវេលាក្នុងការសម្រេចសមិទ្ធផលកិច្ចការណាមួយ។
៨.ទទួលបានគុណភាពដំណេក ៖ កំណើននៃភាពស្រ្តេស នាពេលបច្ចុប្បន្នកាន់តែកើតមានចំពោះមនុស្ស ដោយសារតែតម្រូវការប្រើប្រាស់បច្ចេកវិទ្យាលើសលប់ ការចំណាយពេលជាច្រើននៅខាងមុខអេក្រង់ ដែលជាហេតុបង្កភាពលំបាកចំពោះដំណេកចំពោះមនុស្សមួយចំនួន។ តាមរយៈការវិភាគទិន្នន័យ នៃមនុស្សប្រាំបីពាន់នាក់ ដែលធ្វើឡើងដោយសាកលវិទ្យាល័យ University of Georgia បានឱ្យដឹងថា ការពង្រឹងកាយសម្បទា រក្សាផ្លូវដង្ហើម តាមរយៈការធ្វើចលនារាងកាយបានទៀងទាត់ ជាការរួមចំណែកទៅកាន់គុណភាពដំណេក។ ការជិះកង់កម្សាន្តធម្មតាៗ ឬការជិះកង់ទៅធ្វើការ បានផ្តល់នូវសុខភាពល្អ រួមទាំងការទទួលទានដំណេកប្រកបដោយគុណភាព៕
