សុខភាពហិរញ្ញវត្ថុល្អ បានរួមចំណែកជំរុញសុខុមាលភាពទាំងមូលផងដែរ, ការថែរក្សាសុខភាពហិរញ្ញវត្ថុទៀតសោត មានភាពពាក់ព័ន្ធនឹងកត្តាមួយចំនួនដូចជា ទម្លាប់ប្រចាំថ្ងៃ ការតាំងចិត្ត ផែនការទិញទុកមុន និងការសម្រេចចិត្តដ៏ហ្មតចត់ផងដែរ ជាពិសេសការសម្រេចិត្តទិញបន្ថែមសម្ភារៈក្នុងការរស់នៅប្រចាំថ្ងៃ។ ជាមួយគ្នានោះ ការមានទម្លាប់សម្រេចចិត្តទិញរបស់របរដោយមិនបានគ្រោងទុក មិនថាចំណាយទិញផលិតផល ឬចំណាយលើសេវាកម្មណាមួយ សុទ្ធសឹងតែត្រូវការពេលក្នុងការវិភាគ ​និងពិចារណាមុនពេលសម្រេចចិត្តទិញ។

ស្ថិតក្នុងសម័យកាលជឿនលឿន ការធ្វើទីផ្សារបែបឌីជីថល បានអូសទាញទឹកចិត្តមនុស្សឱ្យកាន់តែចង់បានរបស់កាន់តែ ច្រើនឡើងៗ រួមទាំងការបញ្ជាទិញក្នុងរយៈពេលដ៏ឆាប់រហ័សផង ការផ្សាយតាមរយៈរូបភាពប្លែកៗ យុទ្ធសាស្រ្តប្លែកៗ ការបញ្ចុះតម្លៃ និងការអន្ទងចិត្តតាមរយៈវិធីចម្រុះបែបជាច្រើនទៀត បានបង្កហានិភ័យដល់ការថែរក្សាសុខភាពហិរញ្ញវត្ថុ នាំឱ្យបាត់បង់ការអត់ធ្មត់ បាត់បង់សមត្ថភាពក្នុងការរង់ចាំ និងមិនសូវមានទម្លាប់គិតពិចារណាមុននឹងសម្រេចចិត្តចំណាយលុយទៅលើអ្វីមួយ។

ការទិញសម្ភារៈលើសពីតម្រូវការចាំបាច់ ភាគច្រើនបណ្តាលមកពីឧស្សាហ៍ទិញដោយមិនមានផែនការទុកមុន ការសម្រេចចិត្តទិញភ្លាមៗ ការទិញតាមអារម្មណ៍ និងទម្លាប់ឃើញភ្លាមទិញភ្លាមជាញឹកញាប់ជាដើម។ កត្តាទាំងនេះបានប៉ះពាល់បន្តិចម្តងៗ ដល់ការរស់នៅប្រចាំថ្ងៃ ។ យ៉ាងណាមិញ តាមរយៈគេហទំព័រ Bankrate បានបង្ហាញវិធីមួយចំនួនដើម្បីការពារខ្លួន កុំឱ្យទិញសម្ភារៈលើសពីតម្រូវការចាំបាច់ និងការទប់ចិត្តពីភាពពុះកញ្ជ្រោលរៀងរាល់ពេលឃើញរបស់ថ្មីៗ ឬការទិញតាមទំនោរសង្គម ដែលមានរៀបរាប់លម្អិតនៅខាងក្រោម ៖

១. ឆ្លុះបញ្ចាំងមុនពេលទិញសម្ភារៈ ៖ ជាកិច្ចដំបូងគឺកាត់បន្ថយទម្លាប់ប្រញាប់ប្រញាល់ក្នុងការទិញសម្ភារៈភ្លាមៗ និងធ្វើសេចក្ដីឆ្លុះបញ្ចាំងបន្តិចសិន​ មុននឹងសម្រេចចិត្តក្នុងការទិញរបស់របរថ្មីៗបន្ថែមទៅក្នុងផ្ទះ សកម្មភាពនេះមិនត្រឹមតែជួយទប់ចិត្តកុំឱ្យទិញសម្ភារៈដែលមិនចាំបាច់ប៉ុណ្ណោះទេ ប៉ុន្តែជាការរួមចំណែកក្នុងការសន្សំបានយ៉ាងក្រាសក្រែលផងដែរ។ ក្នុងនោះមាន៣សំណួរសំខាន់ៗសម្រាប់ធ្វើការឆ្លុះបញ្ចាំងដែលមានដូចជា តើវាជាសម្ភារៈពិតជាត្រូវការមែន ឬគ្រាន់តែចង់បានកំដរអារម្មណ៍? តើកញ្ចប់ថវិកាដែលទិញប៉ះពាល់ដល់តម្រូវការចាំបាច់ប្រចាំថ្ងៃទេដូចជាប្រាក់ថ្លៃអាហារជាដើម? តើវាផ្តល់គុណតម្លៃក្នុងរយៈពេលវែងកម្រិតណា? តាមរយៈការដាក់សំណួរសំខាន់ៗ ទាំងនេះអំឡុងពេលឆ្លុះបញ្ចាំងមុននឹងទិញសម្ភារ:ថ្មី គឺជាការរួមចំណែកទប់ចិត្តក្នុងការចំណាយលុយខុសខ្ទង់ និងការប្រើប្រាស់ថវិកាចំគោលដៅក្នុងភាគរយខ្ពស់ជាងមុន។

២. ដាក់កំហិតឱ្យខ្លួនឯងទិញតាមតារាងដែលបានរៀបចំ ៖ ការរៀបចំតារាងមានភាពសំខាន់ជាខ្លាំងមុនពេលឈានជើងទៅហាងទំនិញឬទៅផ្សារ ជាមួយគ្នានោះការធ្វើតារាងរាយនាមមុខទំនិញមុនពេលទិញតាមអនឡាញក៏មានសារ:សំខាន់ដូចគ្នាដែរ។ ព្រោះវិធីបែបនេះ ផ្តល់ឱកាសឱ្យខ្លួនឯងរកឃើញរាល់មុខទំនិញដែលពិតជាចង់បានពិតប្រាកមែន។ ខណៈពេលធ្វើតារាងបញ្ជីរាយនាម គួរសរសេររាល់ទំនិញទាំងអស់ មិនថា ចង់បាន ឬត្រូវការនោះទេ​ បន្ទាប់មក​ថ្លឹងថ្លែងថាមួយណាពិតជាសំខាន់​ហើយមួយណាដែលមានក៏បាន អត់ក៏បាន? កាលដែលអនុវត្តន៍បែបនេះបានជារឿយៗ គឺនឹងផ្តល់ភាពលឿនរហ័យនៅពេលត្រូវការនាពេលក្រោយៗ ហើយវិធីសាស្រ្តក្នុងការសរសេរទៀតសោត អាចសាកល្បងដោយការសរសេរដៃ ឬការប្រើប្រាស់កម្មវិធីឌីជីថលណាមួយក្នុងការរៀបចំ។ ដើម្បីបង្កើនប្រសិទ្ធភាពក្នុងការប្រើប្រាស់វិធីនេះ គួរចែករំលែក ឬពិភាក្សាជាមួយសមាជិកគ្រួសារ និងអ្នកនៅក្បែរខ្លួនតាមដែលអាចធ្វើបាន។

៣. ទុកពេលគិតយ៉ាងហោចណាស់២៤ម៉ោង ៖ មិនថានៅផ្សារធំឬតូច តែងមានការរៀបចំដ៏គួរឱ្យចាប់អារម្មណ៍ និងអាចបន្លប់ចិត្តខ្លួនឯងក្នុងការបែងចែករបស់ណាសំខាន់ ឬរបស់ណាដែលចង់បាន! ភាពសម្បូរបែបនៃការបញ្ចុះតម្លៃជំរុញចិត្តឱ្យចង់បានរបស់របរស្ទើរតែទាំងអស់ដែលមានតាំងលក់ ដូច្នេះការទុកចន្លោះពេល២៤ម៉ោង គឺជាពេលដ៏សមល្មមមួយក្នុងការធ្វើការពិចារណាទៅកាន់កាបញ្ជាទិញរបស់ដែលឆ្លើយតបនឹងតម្រូវការ ព្រោះក្នុងកាល:ទេស:ដែលទុករយៈពេលនេះ លោកអ្នកអាចវាយតម្លៃប្រភេទសម្ភារៈ អាចមានពេលប្រៀបធៀប និងអាចផ្ទៀងផ្ទាត់តម្លៃដែលគេលក់ជាមួយនឹងកញ្ចប់ថវិកាដែលត្រូវចំណាយ៕