ជាទូទៅមនុស្សនឹងមានអារម្មណ៍កក់ក្ដៅ នៅពេលទទួលបានការឱបពីមនុស្សជាទីស្រឡាញ់ ឬការកាន់ដៃជាមួយគូស្នេហ៍។ ប៉ុន្តែអ្វីដែលមនុស្សជាច្រើនមិនបានដឹងនោះគឺការប៉ះរាងកាយ មិនគ្រាន់តែជាភាសាកាយវិការសាមញ្ញប៉ុណ្ណោះទេ។ វាជាធាតុដ៏សំខាន់នៅក្នុងទំនាក់ទំនង។

បើតាម WE Forum ការប៉ះ គឺជាតម្រូវការមូលដ្ឋានរបស់មនុស្ស ។ វាមានឥទ្ធិពលចំពោះសុខុមាលភាព ការអភិវឌ្ឍខួរក្បាល និងជួយឱ្យយើងអាចកសាងទំនាក់ទំនងក្នុងសង្គមបានល្អ។ តាមការស្រាវជ្រាវរបស់សាស្ត្រចារ្យ Michael Banissy អ្នកជំនាញផ្នែកចិត្តសាស្ត្រ បានបង្ហាញពីការប៉ះចំនួន ៤ប្រភេទ ដែលមានឥទ្ធិពលមកលើសុខុមាលភាពមនុស្ស។

១. ការឱបអាចកាត់បន្ថយភាពតានតឹង ៖ ការស្រាវជ្រាវបង្ហាញថា ទាំងការឱបអ្នកដទៃ និងឱបខ្លួនឯង គឺសុទ្ធតែអាចបន្ថយកម្រិតអរម៉ូនស្ត្រេស កទីសូល (Cortisol) ក្នុងរាងកាយ។ នៅពេលដែលមនុស្សទទួលបានការឱបពីមនុស្សជាទីស្រឡាញ់របស់គេជាប្រចាំ គេអាចកាត់បន្ថយហានិភ័យនៃជំងឺសរសៃរឈាមបេះដូង ជំងឺសម្ពាធឈាម ជំងឺមហារីក និងធ្វើឱ្យគេមានអារម្មណ៍ល្អរាល់ថ្ងៃ។

២. ការប៉ះថ្នមៗអាចបន្ថយការឈឺចាប់៖ មូលហេតុដែលធ្វើឱ្យការប៉ះថ្មមៗ អាចកាត់បន្ថយការឈឺចាប់ ដោយសារតែសកម្មភាពនេះជាប់ទាក់ទងទៅនឹង សរសៃប្រសាទនៅក្នុងស្បែកដែលមានឈ្មោះថា C-tactile afferents ដែលមានតួនាទីបញ្ចេញអរម៉ូន អុកស៊ីតូស៊ីន (Oxytocin) ដែលធ្វើ​ឱ្យចិត្តស្ងប់ ។ ជាពិសេស ការប៉ះថ្នមៗ អាចកាត់បន្ថយសកម្មភាពខួរក្បាល ដែលទាក់ទងនឹងការឈឺចាប់។

៣. ការកាន់ដៃទប់ទល់នឹងការថប់បារម្ភ ៖ ការស្រាវជ្រាវបង្ហាញថា ការកាន់ដៃគ្នាអាចជួយកាត់បន្ថយការថប់បារម្ភ នៅក្នុងស្ថានការណ៍តានតឹង។ បើតាម National Library of Medicine របស់អាមេរិក បានរកឃើញថា អ្នកជំងឺដែលកាន់ដៃគិលានុបដ្ឋាយិការ នៅអំឡុងពេលវះកាត់ អាចកាត់បន្ថយការថប់បារម្ភ និងកម្រិតនៃអរម៉ូនអាដ្រេណាលីននៅក្នុងខ្លួនគេ។ ក្រៅពីនេះមានការសិក្សាជាច្រើនទៀត ដែលសុទ្ធតែបានបង្ហាញថា ការកាន់ដៃមនុស្សសិទ្ធិស្នាល ឬមនុស្សជាទីស្រឡាញ់ អាចកាត់បន្ថយការថប់បារម្ភ ក្នុងស្ថានការណ៍តានតឹងណាមួយ។

៤. ការម៉ាស្សាផ្ដល់អត្ថប្រយោជន៍យ៉ាងច្រើន៖ អត្ថប្រយោជន៍នៃការម៉ាស្សាមានច្រើន និងចម្រុះ ដែលក្នុងនោះមានដូចជា ការកាត់បន្ថយភាពតានតឹង ការបំបាត់ការឈឺចាប់ និងការផ្ដល់នូវអារម្មណ៍សម្រាក។ ហេតុផលដែលការម៉ាស្សាត្រូវបានផ្ដល់អត្ថប្រយោជន៍ទាំងអស់នេះ ដោយសារតែ នៅពេលម៉ាស្សាធ្វើឱ្យមានការផ្លាស់ប្ដូរសកម្មភាពប្រព័ន្ធប្រសាទ Vegal និង Parasympathetic ដែលជាសរសៃរប្រសាទ ផ្ដល់នូវអារម្មណ៍សម្រាក និងកាត់បន្ថយភាពតានតឹង។

យ៉ាងណាមិញ ជាលក្ខណៈធម្មជាតិ មិនមែនមនុស្សគ្រប់គ្នាសុទ្ធតែចូលចិត្តឱ្យអ្នកដទៃប៉ះនោះទេ ខណៈអ្នកខ្លះទៀតប្រហែលជាចូលចិត្តការប៉ះប្រភេទណាមួយ មិនមែនគ្រប់ប្រភេទនៃការប៉ះឡើយ។ ប៉ុន្តែអ្នកអនុវត្តការប៉ះក្នុងប្រភេទណាមួយក្នុងកាលៈទេសៈចាំបាច់ នៅពេលដែលមាននរណាម្នាក់ត្រូវការគាំទ្រ និងលើកទឹកចិត្ត៕