ភ្នំពេញ – ដើម្បីជាការលើកទឹកចិត្ត​ដល់បុគ្គលិកសិក្សា​ដែល​មាន​ជំនាញល្អ រដ្ឋមន្រ្តីក្រសួងអប់រំ យុវជន និ​ងកីឡា ចង់បង្កើត​ឱ្យ​មានការ​ផ្តល់ពានរង្វាន់​សម្រាប់អ្នកដែលមានជំនាញ​ល្អ ដើម្បីជា​ការ​លើកទឹកចិត្ត​ដល់កិច្ច​ខិតខំ​ប្រឹងប្រែង​របស់ពួកគេ។

ក្នុងពិធី​ដាក់​ឱ្យ​ដំណើរ​ការ​គម្រោង​វិទ្យាសាស្រ្ត និង​បច្ចេកវិទ្យា​សម្រាប់​ការ​អប់រំកម្រិតមធ្យមសិក្សា​ទុតិយភូមិ ដែលធ្វើ​ឡើង​កាលពីពេលថ្មីៗនេះ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និង​កីឡា មាន​ប្រសាសន៍ថា កន្លងមក​ក្រុមការងារ​បានរៀបចំ​ពានរង្វាន់ជូន​សម្រាប់​នាយកសាលាល្អ គ្រូបង្រៀន​ល្អ ប៉ុន្តែ​មិន​ទាន់​មាន​ពានរង្វាន់​សម្រាប់អ្នកជំនាញ​ល្អនៅ​ឡើយទេ។ ឯកឧត្តមបញ្ជាក់ថា ចង់​ឱ្យ​មានការផ្តល់ពាននេះ ដោយ​ផ្តល់​ការ​លើកទឹកចិត្ត​ជាថវិកា ហើយ​ប្រសិន​ជាមាន​មេដាយមាស មេដាយប្រាក់ មេដាយសំរិទ្ធ នោះ​នឹង​ទទួល​ថវិកាបានច្រើន។

ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ដ្រីក្រសួងអប់រំ យុវជន និងកីឡា

“ប៉ុន្តែពេលនេះ យើងមិនទាន់មានអនុក្រឹត យើងអាចស្នើសុំក្រសួងសេដ្ឋកិច្ចនិងហិរញ្ញវត្ថុឱ្យមានអនុក្រឹត ក្នុងមួយឆ្នាំរើស ៤ទៅ៥នាក់មុន ប៉ុន្តែត្រូវតែវាយតម្លៃឱ្យបានគ្រប់ជ្រុងជ្រោយ”

បើតាម​ការ​បញ្ជាក់របស់ ឯកឧត្តម ហង់ជួន ណារ៉ុន ពានរង្វាន់អ្នកជំនាញល្អនេះ នឹងផ្តល់ជូនអ្នកជំនាញក្នុងក្របខណ្ឌក្រសួងអប់រំ ដែលបានជួយគាំទ្រក្នុងការកែលម្អសាលារៀន រួមមាន អ្នកជំនាញផ្នែករង្វាយតម្លៃ អ្នកជំនាញខាងផ្នែកកម្មវិធីសិក្សា អ្នកជំនាញខាងផ្នែកវិធីសាស្រ្តបង្រៀន អ្នកជំនាញខាងផ្នែកគ្រប់គ្រងសាលារៀន។ ទន្ទឹមគ្នានេះ អាចជាគ្រូបង្រៀន ប៉ុន្តែត្រូវមានសមត្ថភាពមួយទៀតក្នុងការគ្រប់គ្រងសាលារៀនល្អ និងទទួលស្គាល់ជាអ្នកជំនាញ និងជាគ្រូឧទ្ទេសខាងផ្នែកអប់រំ ឬអ្នកជំនាញក្នុងផ្នែកកែលម្អសាលារៀន ឬកែទម្រង់សាលារៀន។

គួររំលឹកថា គិតចាប់តាំងពីឆ្នាំសិក្សា២០១៣-២០១៤មក ដើម្បីឆ្លើយតបទៅនឹងកំណែទម្រង់គ្រូបង្រៀន ក្រសួងអប់រំបានលើកទឹកចិត្តនាយកសាលារៀនល្អ និងគ្រូបង្រៀនល្អ គ្រូបង្រៀនភាសាខ្មែរ និងគណិតវិទ្យាថ្នាក់ទី១ ទី២ ទី៣ ដោយជ្រើសរើសប្រកបដោយលក្ខខណវិនិឆ្ឆ័យត្រឹមត្រូវ យុត្តិធម៌ និងតម្លាភាព ទទួលបានពានរង្វាន់ “សម្ដេចតេជោ សែន” ៕