ផ្តើម​ពីគោលបំណងចង់ជួយ​យុវជន​ដែលស្ថិត​ក្នុងវ័យសិក្សា ក៏​ដូចជា​ទើបបញ្ចប់ការសិក្សា ដឹងអំពីរបៀបរៀន ការ​អភិវឌ្ឍខ្លួន ដើម្បីអាច​សម្របខ្លួន​ជាមួយបរិយាកាស​ការងារ និងជីវិត​រស់នៅ​ បានជំរុញ​ឱ្យ​លោក លី មុនីពុទ្ធិ ចំណាយពេលវេលា និង​ថវិកា​សរសេរសៀវភៅ “រៀនរស់”។

លោក លី មុនីពុទ្ធិ និយាយថា ការសរសេរសៀវភៅនេះឡើង ក៏​ព្រោះតែលោកចង់ចែករំលែកទស្សនៈវិជ្ជារបស់ខ្លួន ដើម្បីអាចជួយមនុស្សជុំវិញស្វែងយល់ពីជីវិតដែលមានភាពរីករាយ សុភមង្គល និងកសាងខ្លួនជាមនុស្សម្នាក់ប្រសើរឡើង។ លើសពីនេះ សៀវភៅ “រៀនរស់” ក៏​រួមចំណែកលើកកម្ពស់វិស័យតែងនិពន្ធនៅប្រទេសកម្ពុជាឱ្យកាន់តែមានភាពចម្រុះ ដោយបញ្ចូលស្នាដៃថ្មីទាក់ទងនឹងការអភិវឌ្ឍខ្លួនដែលសរសេរដោយកូនខ្មែរផ្ទាល់។

ម្ចាស់ស្នាដៃសៀវភៅ “រៀនរស់” បន្ថែមថា រស់រាន រៀនរស់ មានន័យថា ដរាបណាយើងនៅតែរស់ យើងនៅតែអាចរៀនបាន ហើយកាលណាយើងឈប់រៀន ជីវិតយើងនឹងជាប់គាំង។ លោកបន្តថា មិនថាយើងរៀនចប់ ឬរៀនចេះប៉ុណ្ណា យើងមានទំនួលខុសត្រូវក្នុងការរៀន ដើម្បីរស់នៅក្នុងជីវិតមួយកាន់តែប្រសើរ។

បើតាមលោក មុនីពុទ្ធិ វ័យដែលអាចទាញប្រយោជន៍បានច្រើនពីសៀវភៅ “រៀនរស់” គឺស័ក្តិសមបំផុតសម្រាប់អ្នកដែលកំពុងរៀននៅកម្រិតវិទ្យាល័យ និងសាកលវិទ្យាល័យ និងអ្នកដែលនៅស្រលាញ់ការរៀន ដើម្បីចេះពីរបៀបរៀន និងជួយឱ្យជីវិតពួកគេមានភាពប្រសើរឡើង។ អត្ថន័យ​ក្នុង​សៀវភៅនេះ ក៏នឹងជួយបង្ហាញផ្លូវ ថា តើត្រូវដើរបែបណា? រៀនបែបណា? ដើម្បីអាចទៅដល់ក្តីស្រមៃ និងគោលដៅបាន។

លោក លី មុនីពុទ្ធិ បានបង្ហាញអារម្មណ៍រីករាយនៅពេលសៀវភៅ “រៀនរស់” របស់លោកបានបោះពុម្ពផ្សាយ ក្រោយ​ចំណាយពេលប្រមាណជាងមួយឆ្នាំ ដើម្បីសរសេរ ។ លោកថា ឧបសគ្គចម្បងនៃការសរសេរសៀវភៅនេះសម្រាប់រូបលោក គឺផ្នែកភាសាខ្មែរ ដោយសារចាប់តាំងពីបញ្ចប់ការសិក្សាថ្នាក់បរិញ្ញាបត្រផ្នែកអក្សរសាស្រ្តអង់គ្លេសមក លោកធ្វើការជាមួយជនបរទេស ដោយប្រើប្រាស់ភាសាអង់គ្លេសច្រើន ទើបមិនសូវបានប្រើប្រាស់ភាសាខ្មែរ។ តែយ៉ាងណា ដោយមានការណែនាំពីរៀមច្បង និងការប្រើប្រាស់វចនានុក្រមជាជំនួយផង បានធ្វើ​ឱ្យ​ស្នាដៃមួយ​នេះទៅតែបន្តទៅមុខ និងសម្រេចចេញជារូបរាង។

សម្រាប់ស្នាដៃសៀវភៅ “រៀនរស់” លោក លី មុនីពុទ្ធិ រំពឹងថា នឹងជួយឱ្យយុវជនមើលឃើញភាពទូលំទូលាយទាក់ទងនឹងគោលបំណងពិតប្រាកដនៃជីវិតខ្លួនឯង ដោយមិនធ្វើតាមតែអ្នកដទៃនិយមធ្វើច្រើន។ លោកថា អ្វីដែលរៀននៅសាលាជាទ្រឹស្ដី ប៉ុន្តែមិនបានផ្ដោតលើជីវិតទាំងស្រុងឡើយ ដូច្នេះនៅពេលយើងផ្ដោតលើការចេះរៀនដោយខ្លួនឯង ដឹងពីគោលដៅជីវិតរបស់ខ្លួនឯង គឺយើងអាចរៀនបន្ថែមពីអ្វីដែលសាលាមិនបានបង្រៀន ហើយយើងអាចប្រើប្រាស់អ្វីដែលរៀននៅសាលាបានកាន់តែប្រសើរ ដោយសារយើងចេះរៀនបានស៊ីជម្រៅជាងមុន៕