ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការស្វែងយល់ពីវិធីសាស្ត្រចិញ្ចឹមអប់រំបានត្រឹមត្រូវ ពិតជាមានសារៈសំខាន់ខ្លាំងណាស់ សម្រាប់អាណាព្យាបាលសម័យថ្មី ព្រោះការចិញ្ចឹមអប់រំកុមារបានល្អ ជាផ្នែកមួយនៃការបណ្ដុះបណ្ដាលធនធានមនុស្សឆ្នើមសម្រាប់គ្រួសារ និងសង្គមជាតិនាពេលអនាគត។
លោកវេជ្ជបណ្ឌិត ជៀប សម្បត្តិ អ្នកជំនាញផ្នែកសុខភាពគ្រួសារ និងសហគមន៍ មានប្រសាសន៍ថា ការសិក្សា និងយល់ដឹងអំពីវិធីសាស្ត្រចិញ្ចឹមអប់រំកុមារ គឺជាគន្លឹះមួយចូលរួមចំណែកអភិវឌ្ឍធនធានមនុស្សកម្ពុជា ព្រោះលោកជឿជាក់ថា ការបន្តសិក្សា និងការអនុវត្តវិធីសាស្ត្រចិញ្ចឹមកូនប្រកបដោយស្មារតី និងបែបវិជ្ជមាន ការរក្សាតុល្យភាព និងការសម្របខ្លួនតាមបរិបទសង្គមរបស់អាណាព្យាបាលខ្មែរ នឹងដឹកនាំឱ្យបុត្រធីតាទទួលបានភាពជោគជ័យ និងសុភមង្គលក្នុងជីវិត នាសម័យបច្ចេកវិទ្យានេះ។
សម្រាប់មាតាបិតា ដែលមានបំណងចង់ពង្រឹងសមត្ថភាពក្នុងការចិញ្ចឹមបីបាច់កុមារឱ្យបានត្រឹមត្រូវ លោកវេជ្ជបណ្ឌិត បានផ្ដល់នូវអនុសាសន៍ចំនួន ៥ ដូចជា ៖
១. ត្រូវបន្តសិក្សាពេញមួយជីវិត (Be a lifelong learner) ៖ លោកថា បច្ចុប្បន្ន ពិភពលោកផ្លាស់ប្ដូរឥតឈប់ឈរ ហេតុនេះ ចង់ឬមិនចង់ អាណាព្យាបាលត្រូវបន្តបើកចិត្តរៀនសូត្រជាប់ជាប្រចាំ ដើម្បីស្វែងយល់ពីនិន្នាការថ្មីៗ និងជ្រើសរើសវិធីសាស្ត្រអប់រំចិញ្ចឹមកូនឱ្យសមស្របតាមកាលៈទេសៈ។ ការចូលរួមសិក្ខាសាលា ការអានសៀវភៅ ឬការពិភាក្សាជាមួយអ្នកជំនាញ និងអាណាព្យាបាលដទៃទៀត គឺជាប្រភពនៃចំណេះដឹងដ៏មានតម្លៃ។
២. សម្មាធិ និងការចម្រើនសតិក្នុងគ្រួសារ (Mindfulness in the family) ៖ អនុវត្តសម្មាធិ ឬការចម្រើនសតិ (mindfulness) សូម្បីតែក្នុងរយៈពេលខ្លីជារៀងរាល់ថ្ងៃ អាចជួយទាំងអាណាព្យាបាល និងកូនៗឱ្យកាត់បន្ថយភាពតានតឹង បង្កើនការផ្ចង់អារម្មណ៍ និងពង្រឹងការគ្រប់គ្រងអារម្មណ៍។ នេះក៏ស្របទៅនឹងគោលការណ៍នៃព្រះពុទ្ធថេរវាទ ដែលជាគ្រឹះនៃវប្បធម៌ខ្មែរ ក៏ដូចជា ការប្រតិបត្តិវប្បធម៌សន្តិភាពផ្លូវចិត្ត របស់ជំនឿ និងសាសនាផ្សេងទៀតផងដែរ។
៣. ផ្ដោតលើការធ្វើជាគម្រូដល់កូន (The Power of role modeling ) ៖ កុមាររៀនសូត្រតាមរយៈការសង្កេត និងការធ្វើត្រាប់តាមមនុស្សពេញវ័យ ដែលនៅជុំវិញខ្លួន ជាពិសេសឪពុកម្ដាយ។ ប្រសិនបើអាណាព្យាបាលចង់ឱ្យកូនមានអាកប្បកិរិយា និងទម្លាប់ល្អ ដូចជាការប្រើប្រាស់បច្ចេកវិទ្យាដោយមានតុល្យភាព ការអានសៀវភៅ ឬការបង្ហាញការគោរព ពួកគេត្រូវធ្វើជាគម្រូដ៏ល្អដល់កូនៗជាមុនសិន។
៤. ប្រើប្រាស់ AI ក្នុងការអប់រំកូន ៖ បច្ចេកវិទ្យា AI កំពុងផ្លាស់ប្ដូររបៀប ដែលមនុស្សរស់នៅ និងធ្វើការ។ អាណាព្យាបាលគួរចាប់ផ្ដើមស្វែងយល់ពី AI ដើម្បីអាចណែនាំកូនៗឱ្យយល់ដឹងពីសក្តានុពល និងហានិភ័យនៃបច្ចេកវិទ្យានេះ។ ការបង្រៀនកូនឱ្យចេះគិត ត្រិះរិះពិចារណា (Critical thinking) អំពី AI និងប្រើប្រាស់វាប្រកបដោយក្រមសីលធម៌ គឺជាជំនាញដ៏សំខាន់សម្រាប់អនាគត។
៥. ភាពរីករាយក្នុងភាពជាឪពុកម្ដាយ ៖ ទោះបីជាមានបញ្ហាប្រឈមជាច្រើន ក្នុងការចិញ្ចឹមកូនក្នុងសម័យទំនើបក៏ដោយ សូមកុំភ្លេចរីករាយនឹងពេលវេលាដ៏មានតម្លៃជាមួយកូនៗ ការបង្កើតអនុស្សាវរីយ៍ល្អៗ ការសើចសប្បាយ និងការបង្ហាញសេចក្ដីស្រឡាញ់ដោយគ្មានលក្ខខណ្ឌ គឺជាមូលដ្ឋានគ្រឹះដ៏រឹងមាំបំផុត សម្រាប់អនាគតកុមារ។
លោកវេជ្ជបណ្ឌិត បានសង្កត់ធ្ងន់ថា ការចិញ្ចឹមកូន គឺជាការងារដ៏ថ្លៃថ្លា ហើយការវិនិយោគលើកូនៗ គឺជាការវិនិយោគលើអនាគតដ៏ភ្លឺស្វាង សម្រាប់សង្គមកម្ពុជា៕
