កាលពីថ្ងៃទី១២ ខែមីនា ឆ្នាំ​២០២៤ លោកស្រី Jutta Urpilainen ស្នងការអឺរ៉ុបសម្រាប់ភាពជាដៃគូអន្តរជាតិ និង ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា បានដាក់​ឱ្យ​ដំណើរការ​នូវ​គម្រោង Global Gateway Flagship ​ការអប់រំសម្រាប់ការងារបៃតង និង​ការងារឌីជីថល សម្រាប់យុវជន​កម្ពុជា។

តាមសេចក្តីប្រកាស​ព័ត៌មានរបស់សហភាពអឺរ៉ុប គម្រោង Global Gateway Flagship នឹងជួយ​ទៅ​ដល់​ការ​បណ្តុះបណ្តាល​ក្រុមអ្នក​បច្ចេកទេស​វិជ្ជាជីវៈកម្រិតមធ្យម ដល់កម្រិតខ្ពស់ សម្រាប់ជំនាញ​ដែលមានតម្រូវការក្នុងវិស័យ​ឧស្សាហកម្ម​នៅកម្ពុជា ក៏​ដូចជា​ជួយ​ទៅ​ដល់​ការស្រាវជ្រាវ ការផ្លាស់ប្តូរ​ទស្សនកិច្ចសិក្សា ការ​ផ្តល់អាហារូបករណ៍​ដល់សិស្សនិស្សិត​សម្រាប់​មុខ​វិជ្ជា STEM ជា​ដើម។

ក្នុងកម្មវិធីដែលធ្វើឡើងនៅ​ក្នុងវិទ្យាល័យចំណេះទូទៅ និង​បច្ចេកទេស​ហ៊ុនសែន​ជម្ពូវ័ន ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ​ យុវជន និងកីឡា មានប្រសាសន៍ ដោយ​ថ្លែង​អំណគុណ​ដល់​សហគមន៍អឺរ៉ុប ក្នុងការជួយគាំទ្រ​ដល់វិស័យអប់រំកម្ពុជា ហើយ​ដែល​អាច​ជួយ​ផ្តល់​នូវជំនាញ​ដល់យុវជន​កម្ពុជា។ ឯកឧត្តមរដ្ឋមន្រ្តីបញ្ជាក់ថា គម្រោង Global Gateway Flagship របស់សហគមន៍អឺរ៉ុប នឹងជួយ​ដល់យុវជន​ ក៏​ដូចជា​និស្សិត​កម្ពុជា​ទទួលបាន​នូវ​ជំនាញ ជាពិសេស​លើ​ការ​ផ្លាស់ប្តូរ​និស្សិត ក៏​ដូចជា​លោកគ្រូអ្នកគ្រូ លើក​កម្ពស់​នូវ​ការ​កែលម្អ​គោលនយោបាយអប់រំ លើក​កម្ពស់​ការស្រាវជ្រាវ និង​ជំនាញ ក៏​ដូចជា​លើក​កម្ពស់ការចូលរួមរបស់ផ្នែក​ឯកជនផងដែរ។

ឯកឧត្តមបណ្ឌិតសភាចារ្យសម្តែង​ការ​ជឿជាក់ថា តាមរយៈកម្មវិធីផ្តល់នូវទីផ្សារ​នាំទៅ​អឺរ៉ុប ក៏​ដូចជា​ការ​ជួយ​បណ្តុះបណ្តាល​ខាងផ្នែកជំនាញ នឹងផ្តល់​ឱកាស​​ឱ្យ​យុវជន​កម្ពុជា​ទទួលបាន​នូវជំនាញ ដើម្បី​ឱ្យ​កម្ពុជា​បោះជំហានឆ្ពោះ​ទៅ​កាន់ការ​អភិវឌ្ឍ​ប្រកបដោយ​និរន្តរភាព។

លោកស្រី Jutta Urpilainen ស្នងការអឺរ៉ុបសម្រាប់ភាពជាដៃគូអន្តរជាតិ ដែល​ក៏ធ្លាប់ជាគ្រូបង្រៀន និង​ក៏​ជា​អតីតសកម្មជន​យុវជន លើកឡើងថា ការវិនិយោគដែលពិភពលោក​អាចធ្វើបាន គឺទៅលើយុវជន ហើយ​សម្រាប់​ប្រទេស​កម្ពុជា​ដែល​ប្រជាពលរដ្ឋ​ភាគច្រើន​សុទ្ធ​តែជាយុវជន​ ដូច្នេះ​ការ​ធានា​​យ៉ាង​ណា​ឱ្យ​យុវជននៅ​តែអាចមានភាពធន់ និង​ចង់រៀន​សូត្រ​នូវ​អ្វីថ្មីៗ​ទៀត គឺជា​គន្លឹះ​ដើម្បីរក្សា​និរន្តរភាព នៃការ​អភិវឌ្ឍ និង​ផ្តល់​ឱ្យ​ការ​អភិវឌ្ឍ​កាន់តែល្អប្រសើរ​សម្រាប់​ប្រទេស​កម្ពុជា៕