ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
តាមរយៈការសិក្សារបស់ U.S National Science បានឱ្យដឹងថា ក្នុងមួយថ្ងៃៗ មនុស្សបង្កើត និងទទួលគំនិតពីមជ្ឈដ្ឋានខុសៗគ្នាប្រមាណពី ១២,០០០ ទៅ ៥០, ០០០ ដែលគំនិតទាំងនោះ បានមកពីបណ្តាញសង្គមផង និងបានមកពីបរិយាកាសដែលខ្លួនរស់នៅផង ហើយ៨០ភាគរយនៃគំនិត គឺបង្កប់ដោយផ្នត់គំនិតអវិជ្ជមាន។
ម្តងម្កាល ទោះបីក្រុមមនុស្សដែលប្រកាន់ជំហរ នៃការគិតបែបសុទិដ្ឋិនិយម ក៏អាចមានឱកាសធ្លាក់ចូលស្ថានការណ៍ នៃការគិតអវិជ្ជមានដូចគ្នាដែរ ទាំងនេះក៏ដោយសារតែពួកគេ រុំព័ទ្ធទៅដោយបរិយាកាសមិនល្អ ឬក៏ផ្តោតលើបញ្ហាច្រើនជាងដំណោះស្រាយជាដើម។ កាលដែលមិនដោះស្រាយបញ្ហានេះ យូរៗទៅ ក៏បណ្តាលឱ្យការគិតអវិជ្ជមាន មានលទ្ធភាពសាយភាយទៅកាន់មនុស្សក្បែរខ្លួនផងដែរ។
ការស្វែងរកជំនួយ និងការប្រឹក្សាពីមនុស្សដែលមានជំនាញ ជាចំណែកសំខាន់ក្នុងការដោះស្រាយស្ថានភាពណាមួយ តែយ៉ាងណា តាមរយៈគេហទំព័រ Power of Positivity បានបង្ហាញគន្លឹះមួយចំនួន ក្នុងការទប់ទល់នឹងស្ថានការណ៍អវិជ្ជមាន ដែលផ្តើមចេញពីខ្លួនឯង ដោយមានរៀបរាប់លម្អិតនៅខាងក្រោម ៖
១. បង្ហាញការពេញចិត្តទៅកាន់ក្រុមមនុស្សដែលធ្លាប់គាំទ្រខ្លួន ៖ ជាទូទៅក្នុងរយៈពេលពេញមួយថ្ងៃ មានរឿងខ្លះពេញចិត្ត ហើយនឹងរឿងខ្លះមិនពេញចិត្ត។ យ៉ាងណាក៏ដោយ ការផ្តោតលើមនុស្ស ឬសាច់រឿងដែលខ្លួនពេញចិត្ត គឺជាដើមចមដំបូងក្នុងការទប់ទល់នឹងស្ថានការណ៍អវិជ្ជមាន ការផ្តោតលើក្រុមមនុស្សដែលផ្តល់នូវការគាំទ្រ មិនត្រឹមតែបានអនុវត្តន៍នូវភាពកតញ្ញុតាធម៌ចំពោះអ្នកដែលបានជ្រោមជ្រែងយើងនោះទេ ប៉ុន្តែក៏ជាឱកាសឆ្លុះបញ្ចាំងចំពោះខ្លួនឯងផងដែរថា ប្រសិនបើគ្មានអ្នកដែលផ្តល់ការគាំទ្រទាំងនោះទេ តើជីវិតនេះនឹងទៅជាយ៉ាងណា? ការធ្វើបែបនេះបានជាញឹកញាប់ ប្រៀបដូចជាការបណ្តុះនូវផ្នត់គំនិតសុទិដ្ឋិនិយមមួយផ្នែកដែរ។
២. កត់សម្គាល់ប្រភេទផ្នត់គំនិតទុទ្ទិដ្ឋិនិយម ៖ ការកត់ចំណាំឡើងវិញរាល់ស្ថានការណ៍ដែលបានកើត គឺរាប់បញ្ចូលទាំងព្រឹត្តិការណ៍ដែលបានកើតមានពីមុនៗ ដូចជាបទពិសោធន៍ដែលខ្លួនមិនពេញចិត្ត ហេតុអ្វីបានជាបន្ទោសខ្លួនឯង, ការសន្មតនូវបញ្ហាដែលពុំទាន់កើតមាន រួមទាំងកត់អំពីសកម្មភាពទាំងល្អ និងមិនល្អ ដើម្បីវាស់វែងអំពីការគិតផ្ទាល់ខ្លួន។ ដោយចាប់ផ្តើមប្រើពេលមួយថ្ងៃក្នុងការសាកល្បងសកម្មភាពទាំងនេះ ជាមួយគ្នានោះ សូមកុំភ្លេចរិះរកដំណោះស្រាយ ដោយរៀនកែប្រែស្ថានភាពដែលមិនល្អមួយៗ រកឱ្យឃើញថា តើអ្វីទៅជាចំណុចដែលអាចរៀនសូត្រពីវាបាន ធ្វើបែបនេះដើម្បីទាញរកភាពវិជ្ជមានពីស្ថានការណ៍ដែលមិនល្អ។
៣. ជ្រើសរើសនូវផ្នត់គំនិតណាមួយដែលត្រូវប្តូរ ៖ ក្រោយពីការកត់សម្គាល់រួចមកហើយ កិច្ចការបន្ទាប់ គឺការសម្រេចិត្តថា តើសកម្មភាព ឬស្ថានភាពមួយណាដែលចាំបាច់ត្រូវដោះស្រាយមុនគេ ដើម្បីឱ្យកាន់តែមានប្រសិទ្ធភាព គួរសរសេរទៅក្នុងកំណត់ហេតុ ព្រោះនេះជាសកម្មភាពមួយបង្ហាញពីភាពឈ្លាសវៃ។ ឧទាហរណ៍ ការសរសេរអំពីអារម្មណ៍អាក់អន់ចិត្ត និងរបៀបដែលលោកអ្នកបានអនុវត្តន៍ដើម្បីដោះស្រាយជាមួយអារម្មណ៍ទាំងនោះ។
៤. សម្លឹងមើលមួយផ្នែកទៀត នៃភាពងងឹត ៖ ដើម្បីកែប្រែស្ថានភាពអ្វីមួយ គឺទាល់តែមានទម្លាប់ប្លែកៗ ឬគិតបែបផ្ទុយ ឬគិតវិភាគឱ្យបានច្រើនជ្រុង ឬមួយក៏ការបង្រៀនចិត្តឱ្យចេះទទួលយករាល់ស្ថានភាពដែលបានកើតមាន ឬក៏ការពង្រឹងឆន្ទៈផ្លាស់ប្តូរទៅរកផ្លូវវិជ្ជមាន។ ឧទាហរណ៍ លោកអ្នកមានបញ្ហា នៃការគេងមិនលក់ ជំនួសឱ្យការផ្តោតទៅលើផលប៉ះពាល់ គួរចាប់ផ្តើមប្តូរទម្លាប់វិជ្ជមានដូចជា ទទួលទានអាហារដែលជំរុញការគេង ឬក៏កាត់បន្ថយការប្រើប្រាស់ស្រ្គីនជាដើម ដែលធ្វើយ៉ាងណាត្រូវមានសកម្មភាពទម្លាប់ខ្លួនទៅនឹងរឿងល្អៗ ជាជាងរំពឹងតែផលវិជ្ជមាន៕
