ចាប់ផ្ដើមពីការស្រឡាញ់ និងចូលចិត្តប្រទេសជប៉ុនដែលជាប្រទេសមានការរីកចម្រើនស្ទើរគ្រប់វិស័យជាពិសេសវិស័យវិស្វកម្ម និងប្រព័ន្ធអប់រំជាដើម ដែលធ្វើឱ្យសិស្ស-និស្សិតអន្តរជាតិជាច្រើនមានក្ដីស្រមៃចង់បន្តការសិក្សានៅប្រទេសជប៉ុន។

យុវជន លន់ សេងណារ៉ុង បេក្ខភាពជ័យលាភីអាហារូបករណ៍រដ្ឋាភិបាលជប៉ុន(MEXT)ឆ្នាំសិក្សា២០២៤ ហើយបច្ចុប្បន្នកំពុងសិក្សាថ្នាក់បរិញ្ញាបត្ររងផ្នែកស្ថាបត្យកម្ម នៅទីក្រុងតូក្យូប្រទេសជប៉ុន បានចែករំលែកមកកាន់ AMS Education ថា លោកមានចំណាប់អារម្មណ៍ជាខ្លាំងលើការជឿនលឿននៃវិស័យផ្សេងៗជាពិសេសវិស័យអប់រំលើផ្នែកស្ថាបត្យកម្មដែលសិក្សាពីផ្នែកផ្សេងៗ នៃសំណង់ទាក់ទងទៅនឹងបាតុភូតធម្មជាតិច្រើនបែបដែលធ្វើឱ្យលោកមានក្ដីស្រមៃបន្តការសិក្សានៅប្រទេសជប៉ុន។ ក្នុងនោះមានកត្តាចំនួន៣ដែលជួយឱ្យ សេងណារ៉ុង អាចប្រឡងជាប់អាហារូបករណ៍រដ្ឋាភិបាលជប៉ុន (MEXT) ឆ្នាំសិក្សា២០២៤បាន។

លោក លន់ សេងណារ៉ុង បន្តថា ដើម្បីអាចទទួលបានអាហារូបករណ៍នេះ លោកមានបីគន្លឹះធំៗដោយទី១ មុនពេលប្រឡង ទាមទារឱ្យខ្លួនឯងមានការត្រៀមខ្លួនឱ្យបានច្បាស់លាស់ ព្រោះអាហារូបករណ៍នេះមានការប្រកួតប្រជែងខ្លាំងដូច្នេះបេក្ខជនត្រូវដឹងពីព័ត៌មាននៃការដាក់ពាក្យ បែបបទ នៃការប្រឡង ការរៀបចំឯកសារផ្សេងៗឱ្យបានល្អិតល្អន់ និងមានភាពច្បាស់លាស់។

ជាមួយគ្នានេះបេក្ខជនគួរស្វែងរកឯកសារចាស់ៗដែលស្ថានទូតបានដាក់ក្នុង website របស់ស្ថានទូតជប៉ុន ឬនៅតាម Internet ។ ក្រោយស្វែងរកវិញ្ញាសារ ឬឯកសារចាស់ៗហើយ បេក្ខជនគួរតែព្យាយាមធ្វើឱ្យបានច្រើនដងយកបទពិសោធន៍ និងដឹងពីបែបបទនៃការចេញវិញ្ញាសារប្រឡង និងដឹងគន្លឹះក្នុងការដោះស្រាយវិញ្ញាសារទាំងនោះ។

« ការហ្វឹកហាត់ធ្វើវិញ្ញាសារប្រឡងគឺត្រូវរកគន្លឹះដោះស្រាយលំហាត់ឱ្យបានទាន់ពេលវេលា ដែលមើលពីប្រភេទគន្លឹះនៃលំហាត់ ឱ្យមានរយៈពេលខ្លីដូចនេះត្រូវដោះស្រាយឱ្យបានទាន់ពេលវេលា និងស្វែងរកបទពិសោធន៍ជាច្រើនដែលចែករំលែកពីសិស្សច្បង ឬតាមការផ្សព្វផ្សាយពីបទពិសោធន៍ជាប់អាហារូបករណ៍»

លោក លន់ សេងណារ៉ុង

គន្លឹះទីពីរ នៅក្នុងកំឡុងពេលប្រឡងបេក្ខជនត្រូវមើលថែផ្លូវចិត្តឱ្យបានល្អ ជាពិសេសប្រសិនបើភ័យ គិតច្រើន បារម្ភច្រើនក្នុងពេលប្រឡងអាចធ្វើ​ឱ្យអ្នកមិនអាចដោះស្រាយលំហាត់ ឬធ្វើវិញ្ញាសារផ្សេងៗបានអស់ពីចិត្ត និងខួរក្បាល១០០%ឡើយ ដូចនេះបេក្ខជនត្រៀមខ្លួនប្រឡងធ្វើយ៉ាងណាកុំឱ្យខ្លួនឯងភ័យខ្លាំង និងខិតខំប្រឹងប្រែងធ្វើឱ្យអស់ពីសមត្ថភាព។ មួយវិញទៀត ក្នុងពេលប្រឡងបេក្ខជនត្រូវតែពិនិត្យ និងអានឱ្យបានពីរ​ ឬបីដងដើម្បីឱ្យច្បាស់ពីសំណួរដែលគេដាក់មកចៀសវាងយល់ច្រឡំ ឬមិនយល់សំណួរ។

គន្លឹះទី៣ គឺ ក្រោយពេលប្រឡង បេក្ខជនត្រូវត្រៀមខ្លួនសម្រាប់វគ្គសម្ភាសន៍ឱ្យបានត្រឹមត្រូវ និយាយការពិត និងមានឆន្ទៈ ឬចក្ខុវិស័យពេលអនាគតក្រោយពេលសិក្សានៅប្រទេសជប៉ុន។ លើសពីនេះ បេក្ខជនគួរនិយាយអំពីខ្លួនឯងឱ្យបានច្រើននូវចំណុចផ្សេងៗ និងធ្វើយ៉ាងណាឱ្យអ្នកសម្ភាសន៍ ឬគណៈកម្មការមានចំណាប់អារម្មណ៍លើខ្លួន។

និស្សិតអាហារូបករណ៍រូបនេះបន្ថែមថា ក្រោយវគ្គសម្ភាសន៍បេក្ខជនត្រូវដឹងពីដំណាក់កាលរៀបចំឯកសារទៅកាន់ប្រទេសជប៉ុន ដោយទាមទារឱ្យបេក្ខជនសួរនាំខាងស្ថានទូតឱ្យបានច្រើនដើម្បីចៀសវាងបាត់បង់ឱកាសទទួលបានអាហារូបករណ៍ក្នុងប្រការខុសឆ្គងណាមួយ។

គួរបញ្ជាក់ដែរថា កម្រិតសិក្សាដែល សេងណារ៉ុង ទៅសិក្សាជាថ្នាក់សិក្សាពាក់កណ្ដាលវិទ្យាល័យ និងពាក់កណ្ដាលមហាវិទ្យាល័យ ឬហៅជាភាសាអង់គ្លេស (College of technology) និងកំពុងសិក្សាភាសាជប៉ុននៅមជ្ឈមណ្ឌល JASSO Tokyo Japanese Language Education Center ។ សេងណារ៉ុង តម្រូវឱ្យសិក្សាភាសាចប់មួយឆ្នាំទើបអាចបន្តទៅសិក្សាថ្នាក់បរិញ្ញាបត្ររងដែលខ្លួនបានស្នើសុំ និងមានការគាំទ្រទាំងថ្លៃសិក្សា ស្នាក់នៅ និងចំណាយផ្សេងៗពីកម្មវិធីអាហារូបករណ៍រដ្ឋាភិបាលជប៉ុន ឬហៅថា អាហារូបករណ៍MEXT ឆ្នាំសិក្សា២០២៤៕