ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ទប់ទល់នឹងភាពតានតឹងតាមរយៈការរក្សាទម្លាប់វិជ្ជមាន ជាចំណែកទប់ស្កាត់អាការៈអស់កម្លាំងមិនធម្មតា ការងារមានតុល្យភាព និងពង្រឹងបាននូវសុខុមាលភាព។ គេហទំព័រ Entrepreneur ផ្តល់នូវវិធីមួយចំនួនដើម្បីជំនះទម្លាប់មិនល្អ រួមទាំងពន្លឿននូវភាពរីករាយនៅកន្លែងបំពេញការងារ។
១. រកចំណោទបញ្ហាដែលនាំឱ្យបាត់ថាមពល ៖ ដោយហេតុថា មានកត្តាច្រើនយ៉ាង ដែលបណ្តាលឱ្យកើតមាននូវអាការៈអស់កម្លាំងមិនធម្មតានៅកន្លែងការងារ ដូច្នេះរកឱ្យឃើញអំពីមូលហេតុដែលបង្កឱ្យកើតមានជាមុនសិន សឹមដោះស្រាយតាមក្រោយ។ ការកំណត់បញ្ហាប្រឈមឱ្យបានជាក់លាក់ វាសំខាន់នៅត្រង់ថា យើងអាចស្គាល់ស្ថានភាពខ្លួនឯង និងផ្តល់ជូននូវដំណោះស្រាយដែលឆ្លើយតបនឹងតម្រូវការ។ ជាឧទាហរណ៍ ប្រសិនបើអ្នកមានអាការៈអស់កម្លាំងមិនធម្មតា ដោយការប្រឹងបំពេញគម្រោងមួយ ហើយប៉ះពាល់ទៅដល់តុល្យភាពការងារ និងជីវិតផ្ទាល់ខ្លួន នោះលោកអ្នកនឹងដឹងថា តើដំណោះស្រាយបែបណាដែលស័ក្តិសមនឹងចំណុចនេះ។
២. ថែទាំខ្លួនឯងទាំងសុខភាពផ្លូវចិត្ត និងរាងកាយ ៖ វិធីសាស្រ្តដ៏មានប្រសិទ្ធភាពមួយ ដើម្បីទប់ទល់នឹងភាពតានតឹង គឺត្រូវផ្តល់អាទិភាពដល់ការថែទាំខ្លួនឯងទាំងរូបរាងកាយ និងសុខភាពផ្លូវចិត្ត តាមរយៈសកម្មភាពទាំងឡាយណា ដែលនាំឱ្យលោកអ្នកមានភាពរីករាយ មានដូចជា ធ្វើលំហាត់ប្រាណ អាន និងចំណាយពេលជាមួយមនុស្សដែលជាទីគាប់ចិត្តណាម្នាក់។ ការផ្តល់អាទិភាពចំពោះការថែទាំខ្លួនឯងប្រៀបដូចជា កំពុងបញ្ចូលថាមពលឱ្យខ្លួនឯង និងកាត់ចោលនូវភាពតានតឹង ហើយមិនត្រឹមតែប៉ុណ្ណោះ វាក៏រួមចំណែកក្នុងការរក្សាដំណើរជីវិតឱ្យមានតុល្យភាពជាមួយនឹងការងារ រួមទាំងផ្តល់ឱ្យការរស់នៅកាន់តែមានភាពងាយស្រួលជាងមុន។
៣. យកជំនាញគ្រប់គ្រងពេលមកអនុវត្តន៍ឱ្យចេញជាលទ្ធផល ៖ គ្រាន់តែបានដឹងអំពីវិធីក្នុងការគ្រប់គ្រងពេល ឬកាលវិភាគ នៅមិនទាន់គ្រប់គ្រាន់នៅឡើយទេ ការអភិវឌ្ឍជំនាញនេះបន្ថែម ឬការអនុវត្តផ្ទាល់តាមរយៈការកំណត់ឱ្យច្បាស់អំពីកិច្ចការអាទិភាព បំបែកកាងារធំឱ្យទៅជាចំណុចតូចៗងាយស្រួលក្នុងការអនុវត្ត ឬក៏ផ្ទេរភារកិច្ចមួយចំនួនទៅឱ្យអ្នកដទៃក្នុងករណីដែលចាំបាច់។
៤. បើកចំហចំពោះកិច្ចសន្ទនា ៖ ការនិយាយសន្ទនាគ្នា គឺជាគន្លឹះដែលមានប្រសិទ្ធភាពមួយក្នុងការទប់ទល់បរិយាកាសមិនល្អ ឬការបង្កឱ្យមានទំម្លាប់មិនល្អនៅកន្លែងការងារ ដែលវារួមបញ្ចូលទាំងការកំណត់ដែនរវាងតួនាទីនីមួយៗ រួមទាំងបង្ហាញពីភាពស្មោះត្រង់អំពីស្ថានភាពការងារដោយបើកចំហ និងតម្លាភាព។
៥. បណ្តុះផ្នត់គំនិតវិជ្ជមាន និងទស្សនៈល្អៗ ៖ មានវិធីច្រើនណាស់ក្នុងការអនុវត្តនដើម្បីបណ្តុះផ្នត់គំនិតវិជ្ជមាន តាមរយៈសកម្មភាពមួយចំនួនដូចជា ដឹងគុណចំពោះរឿងរ៉ាវដែលកើតមាននៅជុំវិញខ្លួន និងការផ្តោតលើភាពខ្លាំងនៃខ្លួនឯង ។
សរុបជារួមមកវិញ ការព្យាយាមកែប្រែទម្លាប់ដែលមិនល្អនៅកន្លែងការងារ មិនមែនជារឿងដែលទទួលបានលទ្ធផលភ្លាមៗនោះទេ ហើយមិនត្រឹមតែត្រូវការរយៈពេលវែងប៉ុណ្ណោះទេ ប៉ុន្តែវាក៏ត្រូវការភាពអត់ធ្មត់ និងការប្តេជ្ញាបន្ថែម៕
