ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សាលា His KOMA ដែលមានន័យថា “កុមារ” ដូចក្នុងភាសាខ្មែរដែរ ត្រូវបានបង្កើតឡើងកាលពីឆ្នាំ២០២២ ក្នុងស្រុកខ្សាច់កណ្តាល ខេត្តកណ្តាល ដោយស្រ្តីជាជនជាតិកូរ៉េម្នាក់។ សាលារៀនមួយនេះ កំពុងចូលរួមចំណែកជួយដល់ប្រជាពលរដ្ឋក្នុងតំបន់ដែលភាគច្រើនជាកម្មកររោងចក្រ តាមរយៈការអប់រំមើលថែកុមារ ដែលជាកូនៗរបស់ពួកគេ។
លោកស្រី Yi Yong Woo នាយិកាសាលា His KOMA និងក៏ជាបេសកជនផ្សាយដំណឹងល្អ ជនជាតិកូរ៉េ មានប្រសាសន៍ថា ការបង្កើតសាលាមត្តេយ្យនេះឡើង ផ្តើមសំខាន់បំផុតគឺសេចក្ដីស្រឡាញ់, លោកស្រីមានបំណងចង់ជួយអប់រំផ្លូវចិត្តកុមារឱ្យមានភាពស្ងប់ និងចេះជួយអ្នកដទៃ ដើម្បីអាចឱ្យមនុស្សគ្រប់រូបរស់នៅជាមួយគ្នាក្នុងសង្គមដោយមានសុភមង្គល និងសន្តិភាព។
បើតាមនាយិកាសាលាកុមារ គ្រូបង្រៀនដែលនៅទីនេះ គឺសុទ្ធសឹងជាមនុស្សដែលមានចិត្តធ្ងន់បំផុត និងស្រឡាញ់ក្មេងៗ, ហើយវិធីសាស្រ្តបង្រៀននៅពេលដែលកុមារមិនស្ដាប់បង្គាប់ ពួកគេនឹងព្យាយាមអត់ធ្មត់ ព្រមទាំងជួយធ្វើយ៉ាងណាឱ្យកុមារស៊ាំជាមួយបរិយាកាសសាលា ធ្វើឱ្យកុមារមានអារម្មណ៍សុវត្ថិភាពជាមុនសិន ទើបអាចនិយាយអប់រំពួកគេតាមក្រោយ។ លោកស្រី Yi Yong Woo បន្តថា ដោយសារការអប់រំល្អនៅទីនេះ មានឪពុកម្ដាយកុមារ ជាច្រើនបានបញ្ជូនកូនៗមកទទួលការអប់រំ។
His KOMA ចាប់ទទួលសិស្សពីអាយុ ២ឆ្នាំ ដល់៥ឆ្នាំ ដោយបច្ចុប្បន្ន មានសិស្សថ្នាក់ទារកដ្ឋាន ១២នាក់, សិស្សថ្នាក់មត្តេយ្យ ៣០នាក់ ជាមួយនឹងគ្រូបង្រៀនចំនួន ៥នាក់។
ក្រោមកិច្ចសហការរវាងមន្ទីរពេទ្យនៃសាកលវិទ្យាល័យ Yonsei University សាធារណរដ្ឋកូរ៉េ និងសាកលវិទ្យាល័យពុទ្ធិសាស្រ្ត តាមរយៈគម្រោងផ្ដល់សេវាពិនិត្យសុខភាពដល់សាលារៀនជួបការលំបាកនៅតំបន់ជនបទដាច់ស្រយាល នៃប្រទេសកម្ពុជា, ក្រុមគ្រូពេទ្យមួយក្រុម បានចុះទៅពិនិត្យលទ្ធភាពដែលអាចជួយសាលាកុមារនេះ កាលពីសប្ដាហ៍កន្លងទៅ។ លោកស្រី Yi Yong Woo លើកឡើងថា សម្រាប់សាលាកុមារ កំពុងមានតម្រូវការពេទ្យធ្មេញចុះមកពិនិត្យសុខភាពមាត់ធ្មេញកុមារ និងមានតម្រូវការថ្នាំពេទ្យផងដែរ។
សេវាអប់រំកុមារតូចដែលបាននិងកំពុងដំណើរការនៅកម្ពុជារួមមាន មត្តេយ្យសិក្សារដ្ឋ មត្តេយ្យសិក្សាសហគមន៍ មត្តេយ្យសិក្សាឯកជន និងកម្មវិធីអប់រំមាតាបិតា។ ក្នុងនោះ សេវាមត្តេយ្យសិក្សាសហគមន៍ ត្រូវបានបង្កើតឡើងនៅតាមតំបន់គោលដៅភូមិសាស្ត្រ ដែលនៅឆ្ងាយ ឬពុំទាន់មានសាលាមត្តេយ្យសិក្សាសាធារណៈ ដើម្បីផ្តល់ឱកាសឱ្យកុមារអាយុ ៣ឆ្នាំ ទៅក្រោម ៦ឆ្នាំ ទទួលបានការសិក្សានៅកម្រិតមត្តេយ្យសិក្សា៕
