ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងពេលឆាប់ៗខាងមុខនេះ យុវជន សិស្សនិស្សិត ក៏ដូចជាគ្រូបង្រៀនសរុបប្រមាណ ១៦ម៉ឺននាក់ នឹងទទួលបានការបណ្តុះបណ្តាលពីបញ្ញាសិប្បនិម្មិត ក្រោមការគាំទ្រពី Google.org តាមរយៈការអនុវត្តគម្រោង ការត្រៀមខ្លួនរបស់អាស៊ានដើម្បីទទួលយកបញ្ញាសិប្បនិម្មិត (AI Ready ASEAN)។
លោកជំទាវ គឹម សេដ្ឋានី រដ្ឋលេខាធិការប្រចាំការ ក្រសួងអប់រំ យុវជន និងកីឡា មានប្រសាសន៍ថា តាមរយៈគម្រោងការត្រៀមខ្លួនរបស់អាស៊ានដើម្បីទទួលយកបញ្ញាសិប្បនិម្មិត (AI Ready ASEAN) ដែលកំពុងអនុវត្តចាប់តាំងពីខែមេសា ឆ្នាំ២០២៥មក គ្រូបង្គោលចំនួន ១១៨នាក់ ត្រូវបានបណ្តុះបណ្តាល ហើយពួកគេនឹងធ្វើការបណ្តុះបណ្តាលបន្តពីអក្ខរកម្ម AI យ៉ាងហោចណាស់១២ម៉ោង ដល់សិស្ស និងអ្នកអប់រំនៅសាលាគោលដៅ សរុបប្រមាណ ១៦៦ ៧៥០នាក់ ទូទាំងប្រទេសកម្ពុជា។
ការអនុវត្តគម្រោងការត្រៀមខ្លួនរបស់អាស៊ានដើម្បីទទួលយកបញ្ញាសិប្បនិម្មិត ឬ AI Ready ASEAN នៅប្រទេសកម្ពុជា គឺជាកិច្ចសហការរួមគ្នារវាងនាយកដ្ឋានបរិវត្តកម្មឌីជីថល នៃក្រសួងអប់រំ យុវជន និងកីឡា អង្គការខេប ដែលគាំទ្រថវិកាពី Google.org តាមរយៈមូលនិធិអាស៊ាន (ASEAN Foundation)។ គម្រោងនេះមានគោលដៅ ធ្វើឱ្យសម្រេចបាននូវការផ្តល់ចំណេះដឹងចាំបាច់អំពីអក្ខរកម្មបញ្ញាសិប្បនិម្មិត (AI Literacy) ដល់យុវជន សិស្សានុសិស្ស គរុសិស្ស-និស្សិត គ្រូបង្រៀន តាមរយៈយុទ្ធនាការផ្សព្វផ្សាយអំពី AI ការផ្ដល់វគ្គបណ្ដុះបណ្ដាល និងការបង្កើតថ្នាលស្វ័យសិក្សាអំពី AI (AI Class ASEAN) ដើម្បីអនុញ្ញាតឱ្យប្រើប្រាស់បញ្ញាសិប្បនិម្មិត (AI) ប្រកបដោយទំនួលខុសត្រូវ ដែលនឹងក្លាយជាជំនាញដ៏សំខាន់សម្រាប់ថ្ងៃអនាគត។
គម្រោង AI Ready ASEAN គឺជាគំនិតផ្តួចផ្តើមថ្នាក់តំបន់ ក្នុងគោលដៅចម្បងដើម្បីរៀបចំប្រជាជនក្នុងតំបន់អាស៊ានឱ្យមានសមត្ថភាពប្រើប្រាស់បច្ចេកវិទ្យាបញ្ញាសិប្បនិម្មិត (AI) ប្រកបដោយប្រសិទ្ធភាព និងការទទួលខុសត្រូវ ដោយរំពឹងថា ក្នុងរយៈពេល២ឆ្នាំ ប្រជាជនក្នុងតំបន់អាស៊ានប្រមាណ ៥.៥លាននាក់ នឹងទទួលផលពីគម្រោង។ បច្ចុប្បន្នគម្រោងនេះកំពុងអនុវត្តនៅក្នុងប្រទេសជាសមាជិកអាស៊ាន រួមមាន កម្ពុជា ថៃ វៀតណាម ឡាវ មីយ៉ាន់ម៉ា ម៉ាឡេស៊ី ឥណ្ឌូណេស៊ី ហ្វីលីពីន សិង្ហបុរី និង ប្រ៊ុយណេ៕
