ភ្នំពេញ – លើក​ឡើង​នៅ​ក្នុង​កម្មវិធី National Debate Society Cambodia (NDSC) លើក​ទី៩ កាលពីសប្តាហ៍កន្លងទៅនេះ លោក ម៉ាក ថ័រ អនុប្រធានបេសកកម្ម នៃស្ថានទូត​អង់គ្លេស​ប្រចាំ​កម្ពុជា បានលើក​ឡើងថា កម្មវិធីតស៊ូមតិមានប្រយោជន៍ច្រើនទៅកាន់សង្គម ហើយ​លោកសង្ឃឹមថា បេក្ខភាពនឹងប្រើប្រាស់បទពិសោធន៍នេះ ហ៊ានប្រឈមជជែកជាមួយនឹងគ្រូ មិត្ត គ្រួសារ ប្រកបដោយសិល្ប៍វិធី ការប្រើហេតុផល និងភ័ស្តុតាង ដើម្បីយកទៅការពារគុណតម្លៃ និងគំនិតរបស់ពួកគេ ប្រកបដោយការគោរពគ្នាទៅវិញទៅមក។

លោក មាស សុបញ្ញា អ្នករៀបចំកម្មវិធី NDSC បានឱ្យដឹងថា ការនិយាយជាសាធារណៈ និងការតស៊ូមតិមិនមែនគ្រាន់តែជាការនិយាយយកចាញ់ យកឈ្នះ ក្នុងកម្មវិធីប្រកួតនោះទេ ផ្ទុយទៅវិញ វិញ្ញាសាទាំងនោះគឺជាការនិយាយប្រកបដោយហេតុផលជាក់លាក់ភ្ជាប់មកជាមួយនូវទឡ្ហីករណ៍រឹងមាំបញ្ចូលបន្ថែមនូវសិល្បៈក្នុងការនិយាយទាក់ទាញយកចំណាប់អារម្មណ៍គណៈកម្មការ និងទស្សនិកជនឱ្យយល់ស្របតាមទស្សនៈខ្លួន។

លោក មាស សុបញ្ញា អ្នករៀបចំកម្មវិធី NDSC

“ដោយយល់ឃើញពីតម្រូវការនៃការតស៊ូមតិនិងនិយាយជាសាធារណៈចាប់ផ្តើមកើនឡើង និងសក្តានុពលដ៏ខ្លាំងរបស់វាដែលអាចជំរុញការទំនាក់ទំនង សមត្ថភាពភាសា និងការគិតបែបស៊ីជម្រៅ ទើប National Debate Society Cambodia ត្រូវបានបង្កើតឡើង”

លោក មាស សុបញ្ញា បន្តថា ការចូលរួមប្រកួតប្រជែងក្នុងការប្រកួតតស៊ូមតិ និងនិយាយជាសាធារណៈរបស់ National Debate Society Cambodia លោកសង្ឃឹមថាបេក្ខជននឹងបានស្វែងយល់បន្ថែម អំពីការតស៊ូមតិ ឬនិយាយជាសាធារណៈពិសេសអំពីគន្លឹះ និងសិល្បៈនៃការលើកដាក់និយាយឱ្យមានភាពប៉ិនប្រសប់ពីគ្រូណែនាំ និងគណៈកម្មការដាក់ពិន្ទុរបស់កម្មវិធី ។ ហើយបេក្ខជន បេក្ខនារីទាំងអស់ នៅតែបន្តអភិវឌ្ឍន៍សមត្ថភាពតស៊ូមតិ ឬនិយាយជាសាធារណៈជាភាសាអង់គ្លេសដែលមានសារៈសំខាន់ខ្លាំងនាសតវត្សរ៍ទី២១នេះ។ ចំណែកទស្សនិកជនវិញ លោកសង្ឃឹមថា ពួកគាត់នឹងបានស្វែងយល់ពីសារៈសំខាន់នៃការតស៊ូមតិ និងនិយាយជាសាធារណៈ ថែមទាំងអាចឈានទៅដល់ការចូលរួមជាអ្នកតស៊ូមតិ និងនិយាយជាសាធារណៈនៅពេលខាងមុខ។

លោកបន្តថា នៅពេលខាងមុខ កម្មវិធីមានគម្រោងដឹកនាំជើងឯកតស៊ូមតិ និងនិយាយជាសាធារណៈ ជាពិសេសជើងឯកតស៊ូមតិ និងនិយាយជាសាធារណៈជាភាសាអង់គ្លេសឆ្នាំ២០២៣នេះ ទៅប្រកួតថ្នាក់អន្តរជាតិតំណាងឱ្យកម្ពុជា។ លើសពីនេះទៅទៀតសម្រាប់ឆ្នាំបន្ទាន់ កម្មវិធីគ្រោងនឹងពង្រីកវគ្គចម្រុះស្វែងរកជើងឯកប្រចាំនៅតាមខេត្ត/ក្រុង ឬតំបន់រួចទើបបន្តមកដល់វគ្គចម្រុះរកជើងឯកទូទាំងប្រទេស ដែលការធ្វើបែបនេះអាចផ្តល់ឱកាសឱ្យយុវជនកម្ពុជាមានចំនួនកាន់តែច្រើនជាងមុន ក្នុងការស្វែងយល់និងអភិវឌ្ឍន៍សមត្ថភាពតស៊ូមតិ និងនិយាយសាធារណៈជាភាសាអង់គ្លេស។

ទន្ទឹមគ្នានោះ លោកបានថ្លែងអំណរគុណដល់ដៃគូពាក់ព័ទ្ធទាំងអស់ បេក្ខជន បេក្ខនារី យុវជនស្ម័គ្រចិត្ត និងទស្សនិកជនគ្រប់រូបដែលបានចូលរួម និងគាំទ្រឱ្យការប្រកួតនេះកើតមានឡើង។ ហើយសូមអបអរសាទរដល់ជើងឯកលើគ្រប់វិញ្ញាសានៃការប្រកួតប្រចាំឆ្នាំ២០២៣នេះ ហើយសូមលើកទឹកចិត្តដល់បេក្ខជន បេក្ខនារីដែលមិនបានជាប់មកដល់វគ្គផ្តាច់ព្រ័ត្រខិតខំដុះខាត់សមត្ថភាពខ្លួនបន្ថែមទៀតដើម្បីទទួលបានភាពជោគជ័យនាពេលខាងមុខ។

លោក សុបញ្ញា បានរំលេចឱ្យដឹងបន្ថែមថា ដើម្បីចូលរួមប្រកួតនៅក្នុងកម្មវិធីតស៊ូមតិ និងនិយាយជាសាធារណៈរបស់ National Debate Society Cambodia នាពេលខាងមុខ យុវជនគួរគប្បីហ្វឹកហាត់និយាយភាសាអង់គ្លេស និងចាប់ផ្តើមស្វែងយល់អំពីការតស៊ូមតិ ឬការនិយាយជាសាធារណៈជាភាសាអង់គ្លេស។

សូម​បញ្ជាក់ថា កម្មវិធី National Debate Society Cambodia (NDSC) ត្រូវបានបង្កើតឡើងនៅឆ្នាំ២០១២ ជាផ្នែកមួយនៃ ‘SpringBoard4Society’ ដែលមានគោលបំណងជំរុញក៏ដូចជាផ្តល់ឱកាសឱ្យយុវជនស្វែងយល់ អភិវឌ្ឍន៍សមត្ថភាពតស៊ូមតិ និងនិយាយជាសាធារណៈ ជាភាសាអង់គ្លេស។ NDSC តែងតែរៀបចំកម្មវិធីប្រកួតថ្នាក់ជាតិ ស្វែងរកជើងឯកតស៊ូមតិ និងនិយាយជាសាធារណៈជារៀងរាល់ឆ្នាំ ហើយជាលើកទី៩នៅក្នុងឆ្នាំ២០២៣នេះ៕