សំណងសមូហភាពសម្រាប់អ្នករស់រានមានជីវិតពីអំពើហិង្សាផ្លូវភេទនៅក្នុងរបបខ្មែរក្រហម បានសម្ពោធដាក់ឱ្យប្រើប្រាស់នៅក្នុងបរិវេណវត្តភ្នំឆ្មា ស្ថិតក្នុងភូមិគក ឃុំម្រោម ស្រុកអង្គរជ័យ ខេត្តកំពត ដោយអង្គការក្តីករុណា អង្គការចិត្តសង្គមអន្តរវប្បធម៌កម្ពុជា និងមូលនិធិអ្នករស់រានមានជីវិតសកល (Global Survivors Fund) កាលពីទី២៧ ខែតុលា កន្លងទៅ។

ការដាក់ឱ្យប្រើប្រាស់សំណងសមូហភាពនេះ គឺជាសមិទ្ធផលដ៏មានអត្ថន័យមួយក្នុងការទទួលស្គាល់បទពិសោធ និងការឈឺចាប់របស់អ្នករស់រានមានជីវិតពីអំពើហិង្សាផ្លូវភេទក្នុងរបបខ្មែរក្រហម ការស្តារសេចក្តីថ្លៃថ្នូរ ការរក្សាការចងចាំជាសមូហភាព និងការលើកកម្ពស់សុខុមាលភាពរបស់សហគមន៍។ សំណងសមូហភាពនេះ ក៏អាចដើរតួនាទីជាកន្លែងសម្រាប់ការរៀនសូត្រអំពីប្រវត្តិសាស្ត្រ ការចែករំលែកបទពិសោធន៍ ការផ្សះផ្សា និងការពង្រឹងទំនាក់ទំនងក្នុងសហគមន៍ ព្រមទាំងជួយជំរុញការកសាងសន្តិភាពប្រកបដោយចីរភាពសម្រាប់ប្រជាពលរដ្ឋ និងកូនចៅជំនាន់ក្រោយ។

លោក ម៉ួង នឿន អភិបាលស្រុកអង្គរជ័យ មានប្រសាសន៍ថា សំណងសមូហភាពនេះ មិនត្រឹមតែរួមចំណែកក្នុងការកែលម្អជីវភាពរស់នៅរបស់ប្រជាពលរដ្ឋប៉ុណ្ណោះទេ ប៉ុន្តែថែមទាំងផ្តល់អត្ថប្រយោជន៍រួមដល់សហគមន៍ផងដែរ។ ទីតាំងនេះ អាចបម្រើជាកន្លែងជួបជុំ និងអនុវត្តសកម្មភាពរបស់សមាគមមនុស្សចាស់ ព្រមទាំងជាទីកន្លែងសម្រាប់សិស្សានុសិស្ស និងយុវជនជំនាន់ក្រោយសិក្សាស្វែងយល់អំពីប្រវត្តិសាស្ត្រកម្ពុជាក្នុងរបបខ្មែរក្រហម។

អភិបាលស្រុកអង្គរជ័យ បន្ថែមថា សំណងសមូហភាពនេះ មានសារៈសំខាន់ក្នុងការរំលឹក និងរក្សាការចងចាំអំពីអំពើឃោរឃៅដែលបានកើតឡើងក្នុងរបបខ្មែរក្រហម ដូចជា៖ ការរៀបការដោយបង្ខំ ការធ្វើទារុណកម្ម អំពើហិង្សាផ្លូវភេទ និងការរំលោភបំពានសិទ្ធិមនុស្សផ្សេងៗទៀត។ ការសិក្សាស្វែងយល់ពីប្រវត្តិសាស្ត្រទាំងនេះ នឹងជួយឱ្យយុវជនជំនាន់ក្រោយយល់ដឹងកាន់តែច្បាស់អំពីផលវិបាកនៃអំពើហិង្សា និងចូលរួមលើកកម្ពស់ការគោរពសិទ្ធិមនុស្ស សន្តិភាព និងការមិនប្រើអំពើហិង្សាក្នុងសង្គម។

លោកស្រី ឡាទីស្យា បុននេត អ្នកសម្របសម្រួលប្រចាំតំបន់អាស៊ី នៃមូលនិធិសកលសម្រាប់អ្នករស់រានមានជីវិត បានលើកឡើងថា សំណងសមូហភាពនេះ កើតចេញពីគំនិតផ្តួចផ្តើម និងចក្ខុវិស័យរបស់អ្នករស់រានមានជីវិតពីអំពើហិង្សាផ្លូវភេទក្នុងរបបខ្មែរក្រហម។ លោកស្រី ឡាទីស្យា បុននេត បន្តថា សំណងសមូហភាពនេះ មិនត្រឹមតែជាទីកន្លែងសម្រាប់បម្រើប្រយោជន៍រួមក្នុងសហគមន៍ប៉ុណ្ណោះទេ ប៉ុន្តែថែមទាំងជាកន្លែងសម្រាប់លើកកម្ពស់សេចក្តីថ្លៃថ្នូរ និងការទទួលស្គាល់ចំពោះអ្នករស់រានមានជីវិតផងដែរ។

លោកស្រី ឡាទីស្យា បុននេត ក៏បានស្នើឱ្យរាជរដ្ឋាភិបាល និងអង្គជំនុំជម្រះវិសាមញ្ញក្នុងតុលាការកម្ពុជា អនុវត្តការងារដែលនៅសេសសល់របស់ខ្លួន ប្រើប្រាស់បទពិសោធនៃការអនុវត្តគម្រោងនេះ ជាពិសេសការបង្កើត និងពង្រឹងសមាគមមនុស្សចាស់ដែលមានការចូលរួមពីអ្នករស់រានមានជីវិត ដើម្បីឱ្យតំបន់ផ្សេងៗអាចសិក្សា និងយកគំរូល្អៗទៅអនុវត្តតាមតម្រូវការជាក់ស្តែងរបស់ខ្លួន។

លោក ទឹម មីនា នាយកប្រតិបត្តិអង្គការក្តីករុណា បានអំពាវនាវដល់អាជ្ញាធរមូលដ្ឋាន និងភាគីពាក់ព័ន្ធ បន្តផ្តល់ការគាំទ្រ និងពង្រឹងកិច្ចសហការឱ្យកាន់តែជិតស្និទ្ធ ដើម្បីធានាឱ្យសំណងសមូហភាពនេះ អាចដំណើរការបានល្អ និងផ្តល់អត្ថប្រយោជន៍យូរអង្វែងដល់សហគមន៍។ លោកក៏បានសង្កត់ធ្ងន់លើសារៈសំខាន់នៃការជំរុញការអនុវត្តផែនការពាក់ព័ន្ធនឹងការបង្កើត និងពង្រឹងសមាគមមនុស្សចាស់ឱ្យស្របតាមគោលនយោបាយជាតិ ដើម្បីលើកកម្ពស់តួនាទី ការចូលរួម និងសុខុមាលភាពរបស់មនុស្សចាស់នៅក្នុងសហគមន៍។

លោក នួន វណ្ណា តំណាងអ្នករស់រានមានជីវិតពីអំពើហិង្សាផ្លូវភេទក្នុងរបបខ្មែរក្រហម បានថ្លែងអំណរគុណចំពោះដៃគូអនុវត្តគម្រោង រួមមាន មូលនិធិសកលអ្នករស់រានមានជីវិតសកល អង្គការក្តីករុណា អង្គការចិត្តសង្គមអន្តរវប្បធម៌កម្ពុជា និងអង្គការមនុស្សចាស់កម្ពុជា ដែលបានផ្តួចផ្តើម និងគាំទ្រការអនុវត្តគម្រោង “វិធានការសំណងក្រៅប្រព័ន្ធតុលាការ” សម្រាប់អ្នករស់រានមានជីវិតពីអំពើហិង្សាផ្លូវភេទក្នុងរបបខ្មែរក្រហម។ លោកបានលើកឡើងថា ក្នុងរយៈពេលជាងមួយឆ្នាំកន្លងមកនេះ អ្នករស់រានមានជីវិតបានទទួលសំណងជាលក្ខណៈបុគ្គល ដែលឆ្លើយតបទៅនឹងតម្រូវការជាក់ស្តែងរបស់ពួកគាត់ និងជួយគាំទ្រដល់ការស្តារកិត្តិយស និងសេចក្តីថ្លៃថ្នូរឡើងវិញ។

ដោយផ្អែកលើបទពិសោធ និងលទ្ធផលដែលទទួលបានពីគម្រោង លោក នួន វណ្ណា បានសំណូមពរឱ្យមានការបន្តគាំទ្រដល់អ្នករស់រានមានជីវិត និងសហគមន៍របស់គាត់ រួមមាន ១. បន្តគាំទ្រសមាគមមនុស្សចាស់ ២. ចូលរួមក្នុងការអប់រំអំពីប្រវត្តិសាស្ត្រ ៣. ពង្រីកបណ្តាញអ្នករស់រានមានជីវិត ៤. លើកកម្ពស់សុខុមាលភាពសង្គម ៥. ផ្សព្វផ្សាយអំពីសមាគមមនុស្សចាស់ ៦. ពង្រីកឱកាសទទួលបានសំណង និង៧. គាំទ្របណ្តាញ និងសមាគមអ្នករស់រានមានជីវិត។

គួរជម្រាបជូនថា ការបន្តកិច្ចសហការរវាងរាជរដ្ឋាភិបាល អាជ្ញាធរមូលដ្ឋាន អង្គការដៃគូ និងសហគមន៍ នឹងមានសារៈសំខាន់ក្នុងការធានាឱ្យសំណងសមូហភាពនេះ អាចបន្តបម្រើប្រយោជន៍ដល់ប្រជាពលរដ្ឋ និងគាំទ្រអ្នករស់រានមានជីវិតឱ្យរស់នៅប្រកបដោយសេចក្តីថ្លៃថ្នូរ សុខុមាលភាព និងការទទួលស្គាល់ពីសង្គម៕