ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
នៅពេលកូនរបស់អ្នកចម្រើនវ័យ ពួកគេអាចចំណាយពេលកាន់តែច្រើនប្រើប្រាស់ប្រព័ន្ធអនឡាញ។ ប្រព័ន្ធអនឡាញមានផលប្រយោជន៍វិជ្ជមានជាច្រើន ដូចជា ការបន្តទំនាក់ទំនងជាមួយមិត្តភក្ដិ និងគ្រួសារ ការធ្វើតាមចំណាប់អារម្មណ៍របស់ខ្លួន និងការចូលរួមជាផ្នែកមួយរបស់សហគមន៍។ ប៉ុន្តែវាមិនតែងតែជាបទពិសោធន៍វិជ្ជមាន និងសុវត្ថិភាពចំពោះកុមារនោះឡើយ។
ខាងក្រោមនេះ គឺជាវិធីចំនួន ៥ ដែលណែនាំដោយអង្គការយូណេសេហ្វ ក្នុងការជួយកូនៗរបស់លោកអ្នកឱ្យមានសុវត្ថិភាព និងជៀសវាងគ្រោះថ្នាក់ដែលអាចកើតមាននៅលើបណ្តាញអ៊ីនធឺណេត។
១. ការកំណត់វិន័យឱ្យបានច្បាស់លាស់ ៖ ត្រូវនិយាយដោយស្មោះត្រង់ជាមួយកូនៗរបស់អ្នកអំពីបុគ្គលដែលពួកគេទាក់ទងជាមួយ របៀបដែលពួកគេទាក់ទងគ្នា និងបុគ្គលដែលអាចមើលឃើញអ្វីដែលពួកគេបង្ហោះនៅតាមអនឡាញ។ ប្រសិនបើកូនរបស់អ្នកជួបប្រទះនឹងអ្វីមួយតាមអនឡាញដែលធ្វើឱ្យពួកគេមានអារម្មណ៍មិនសប្បាយចិត្ត មិនសុខស្រួល ឬខ្លាច សូមលើកទឹកចិត្តពួកគេឱ្យប្រាប់អ្នក ឬមនុស្សធមដែលពួកគេទុកចិត្តភ្លាម។
២. ប្រើប្រាស់បច្ចេកវិទ្យា ដើម្បីការពារពួកគេ ៖ ពិនិត្យមើលឧបករណ៍របស់កូនអ្នក ដើម្បីធ្វើឱ្យប្រកដថា ឧបករណ៍ទាំងនោះបានធ្វើបច្ចុប្បន្នភាព (update) និងកំពុងដំណើរការសូហ្វវែរ (software) ចុងក្រោយគេ។ បើកការកំណត់ឯកជនភាព ដើម្បីកាត់បន្ថយការប្រមូលទិន្នន័យផ្ទាល់ខ្លួនរបស់ពួកគេ និងរក្សាឯកជនភាព។
៣. ចំណាយពេលជាមួយគេតាមអនឡាញ ៖ សូមបង្កើតឱកាសនានា ដើម្បីឱ្យកូនរបស់អ្នកមានសុវត្ថិភាព និងទំនាក់ទំនងបែបវិជ្ជមានតាមអនឡាញជាមួយអ្នក មិត្តភក្តិ និងគ្រួសារ។ សូមជួយកូនរបស់អ្នកឱ្យស្គាល់ និងជៀសវាងព័ត៌មានមិនពិត មាតិកាមិនសមរម្យទៅតាមអាយុ និងមាតិកាដែលអាចបង្កភាពថប់បារម្ភ ឬគ្រោះថ្នាក់ផ្សេងទៀត។ សូមណែនាំបង្ហាញពួកគេអំពីប្រភពព័ត៌មានដែលគួរឱ្យទុកចិត្ត។
៤. ធ្វើជាគំរូ និងបង្ហាញទម្លាប់ល្អតាមអនឡាញ ៖ លើកកម្ពស់អាប្បកិរិយាវិជ្ជមានតាមអនឡាញ តាមរយៈការអនុវត្តអាកប្បកិរិយាបែបនេះដោយខ្លួនអ្នកផ្ទាល់។ សូមយកចិត្តទុកដាក់ចំពោះទង្វើដែលអ្នកធ្វើ និងអ្វីដែលអ្នកចែករំលែកអំពីកូនរបស់អ្នកតាមអនឡាញរួមទាំងរូបថត និងវីដេអូរបស់ពួកគេ។
សូមលើកទឹកចិត្តកូនរបស់អ្នកឱ្យមានចិត្តល្អតាមអនឡាញ។ ប្រសិនបើពួកគេរៀនតាមអនឡាញ សូមលើកទឹកចិត្តពួកគេឱ្យមានការគោរពចំពោះអ្នកដទៃ និងយកចិត្តទុកដាក់ចំពោះអ្វីដែលគេអាចមើលឃើញនៅលើកាមេរ៉ា ដើម្បីរក្សាឯកជនភាព។
៥. អនុញ្ញាតឱ្យពួកគេលេងសប្បាយ និងបង្ហាញអំពីខ្លួនឯង ៖ ការចំណាយពេលនៅតាមអនឡាញ អាចជាឱកាសដ៏អស្ចារ្យ ដើម្បីឱ្យកូនៗរបស់អ្នកមានភាពច្នៃប្រឌិត រៀនសូត្រ ចែករំលែកទស្សនៈ និងគាំទ្របុព្វហេតុដែលសំខាន់ចំពោះពួកគេ។ សូមលើកទឹកចិត្តកូនរបស់អ្នកឱ្យប្រើប្រាស់ធនធានតាមអនឡាញ ដើម្បីជួយពួកគេធ្វើចលនាដូចជា លំហាត់ប្រាណតាមអនឡាញជាដើម។ សូមចងចាំក្នុងការធ្វើឱ្យមានតុល្យភាពគ្នារវាងសកម្មភាពអនឡាញ និងអហ្វឡាញ៕
