ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ពេញមួយខែវិច្ឆិកានេះ ក្រសួងការងារ និងបណ្តុះបណ្តាល វិជ្ជាជីវៈ នឹងរៀបចំធ្វើ ពិព័រណ៌ការងារ សន្តិសុខសង្កម និងបណ្តុះបណ្តាលវិជ្ជាជីវៈ នៅតាមបណ្តាខេត្តជាប់ព្រំដែនប្រទេសថៃ រួមមានខេត្តបាត់ដំបង បន្ទាយមានជ័យ និងខេត្តសៀមរាប សម្រាប់បងប្អូនអតីតពលករដែលត្រឡប់មកពីប្រទេសថៃវិញ។
ពិព័រណ៌នេះគ្រោងនឹងធ្វើនៅខេត្តបាត់ដំបង ពីថ្ងៃទី១៥ ដល់ថ្ងៃទី១៦ ខែវិច្ឆិកា ឆ្នាំ២០២៥, នៅខេត្តបន្ទាយមានជ័យ ពីថ្ងៃទី២២ ដល់ថ្ងៃទី ២៣ ខែវិច្ឆិកា និងខេត្តសៀមរាប ពីថ្ងៃទី២៩ ដល់ថ្ងៃទី ៣០ ខែវិច្ឆិកា។
បើតាមក្រសួងការងារ និងបណ្តុះបណ្តាលវិជ្ជាជីវៈ ពិព័រណ៌ការងារនេះ នឹងមានសហគ្រាស ក្រុមហ៊ុន រោងចក្រ អ្នកផ្តល់ការអប់រំបណ្តុះបណ្តាល និងសមាគម ចូលរួមផ្សព្វផ្សាយ និងដាក់តាំងបង្ហាញសមិទ្ធផលវគ្គអប់រំបណ្តុះបណ្តាល និងព័ត៌មានឱកាសការងារដែលមានតម្រូវការជ្រើសរើសកម្លាំងពលកម្ម ដោយមានការសម្ភាសជ្រើសរើសបុគ្គលិកដោយផ្ទាល់នៅហ្នឹងកន្លែង។
ឯកឧត្តម ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ មានប្រសាសន៍ថា ពិព័រណ៌ការងារ សន្តិសុខសង្កម និងបណ្តុះបណ្តាលវិជ្ជាជីវៈ គឺជាវេទិកាជំនួបដ៏ធំរវាងអ្នកស្វែងរកការងារ និងនិយោជក ដើម្បីដាក់ពាក្យស្វែងរកការងារ ជ្រើសរើសបុគ្គលិក សម្ភាសន៍ភ្លាម និងទទួលបានការងារភ្លាមនៅហ្នឹងកន្លែង ដោយមានឱកាសការងារដល់ទៅជា ៧ម៉ឺន៥ពាន់កន្លែង។
ជាមួយគ្នាក្នុងពិព័រណ៌នេះ ក៏មានការផ្សព្វផ្សាយបង្កើនការយល់ដឹងអំពីអត្ថប្រយោជន៍ នៃរបបសន្តិសុខសង្គម (ប.ស.ស.) សម្រាប់កម្មករនិយោជិតនៅពេលចូលបម្រើការងារក្នុងស្រុកផងដែរ ហើយអ្នកចូលរួមនឹងអាចទទួលបានការកាត់សក់ អាហារ ភេសជ្ជៈ និងអាវយឺត ដោយឥតគិតថ្លៃទៀតផង។
ដោយសារភាពតានតឹងតាមព្រំដែនរវាងកម្ពុជា និងថៃ បានបង្ខំឱ្យពលករកម្ពុជាប្រមាណ ៩០ម៉ឺននាក់ វិលត្រឡប់ពីប្រទេសថៃមកកម្ពុជាវិញ។ តាមអ្នកនាំពាក្យក្រសួងការងារ ក្នុងរយៈពេល ៣ខែកន្លងមកនេះ ក្រសួង សហការជាមួយវិស័យឯកជន សហជីព និងអ្នកពាក់ព័ន្ធផ្សេងទៀត បានជួយស្វែងរកការងារឱ្យបងប្អូនពលករខ្មែរត្រឡប់មកពីថៃវិញ បានជាង ៣៤ម៉ឺននាក់ ក្នុងនោះប្រមាណ ២៧ម៉ឺននាក់ បានចូលធ្វើការនៅក្នុងក្រមហ៊ុន សហគ្រាស និងរោងចក្រផ្លូវការ ហើយរាប់ម៉ឺននាក់ផ្សេងទៀត បានទទួលការងារនៅតាមសហគ្រាសខ្នាតតូច និងមធ្យម សិប្បកម្ម ភោជនីយដ្ឋាន ក៏ដូចជានៅតាមការដ្ឋានសំណង់ ជាដើម៕
