ការ​សរសេរ​គោលដៅ​ជីវិត​មិន​មែន​ជា​រឿងងាយស្រួល​នោះ​ឡើយ មនុស្ស​ភាគច្រើន​មានការ​លំបាក​នៅ​ក្នុង​ការ​សរសេរ​វា ។ តើ​ហេតុ​អ្វី​ចាំបាច់​ត្រូ​វសរសេរពី​គោលដៅជីវិត ? តើ​ការ​សរសេរ​ពីគោលដៅ​ជីវិត​មានសារៈសំខាន់អ្វីខ្លះ?

សិក្ខាសាលា​ស្តីពី «របៀប​សរសេរ​គោលដៅ​ជីវិត ២០២៣ (អធិដ្ឋានចិត្ត)» ដែល​ឧបត្ថម្ភ​ដោយ FWD insurance ​នឹង​រៀបចំ​ធ្វើ​ឡើង​នៅ​ថ្ងៃទី៤ ខែកុម្ភៈ ឆ្នាំ​២០២៣ ខាងមុខ​នេះ ពីវេលាម៉ោង១រសៀល រហូត​ដល់​ម៉ោង​៥ល្ងាច នៅ​សាលអង្គរ​គីហ្សូណា នៃមជ្ឈមណ្ឌល​សហប្រតិបត្តិការ​កម្ពុជា-ជប៉ុន (CJCC) ។

លោក នឹម ឈុន្នី ស្ថាបនិក​ក្រុមហ៊ុន VIPASSA ដែលសហការ​រៀបចំ​សិក្ខា​សាលា​នេះ​​លើក​ឡើងថា គោល​បំណង​នៃការរៀបចំសិក្ខា​សាលានេះ គឺក្រោយ​ពីមើលឃើញថា ការ​មានគោលដៅ​នៅក្នុងជីវិត គឺជារឿងសំខាន់ ដោយវា​ជាផែនទីក្នុង​ការ​ដឹកនាំជីវិត​របស់យើង​ទៅ​កាន់គោលដៅដែលបានកំណត់។

“បើសិនជា​យើង​មានផែនទីនៅ​ក្នុងដៃច្បាស់​ យើង​ប្រាកដជាទៅ​កន្លែងណាមួយ​​ដោយ​ងាយស្រួល​ តែនៅពេល​ដែល​យើង​ចង់ទៅ​កន្លែង​ដែលអត់ស្គាល់ ហើយ​​អត់មានផែនទី យើង​នឹង​ចំណាយពេល​យូរ…”

បើតាម​លោក ឈុន្នី នៅ​ក្នុងសិក្ខា​សាលានោះ នឹង​បង្ហាញ​ឱ្យ​យល់ច្បាស់អំពី​ទិសដៅ​ដែល​យើង​ចង់ទៅ ឱ្យ​យល់​អំពីរបៀបសរសេរ​គោលដៅ របៀប​អធិដ្ឋានចិត្ត សមាធិ ការ​គ្រប់គ្រងផ្លូវចិត្ត និង​អនុវត្ត​ទៅ​លើអ្វី​ដែលចង់បាន ។

សិក្ខា​សាលា​ដែល​គ្រោង​ធ្វើ​ឡើង​នៅ​ថ្ងៃសៅរ៍​ខាងមុខនេះ នឹង​មានការ​ចូលរួមបង្ហាញពី​វាគ្មិនល្បីៗជាច្រើនរូប ដូចជា ភិក្ខុវជិរប្បញ្ញោ គូ សុភាព សាស្រ្តាចារ្យ នៃសាកលវិទ្យាល័យបញ្ញាសាស្រ្តកម្ពុជា, ភិក្ខុ កស្សប ហ៊ុន ខេមរា ទីប្រឹក្សាពុទ្ធមណ្ឌលវិបស្សនាធុរៈ នៃព្រះរាជាណាចក្រកម្ពុជា, លោកស្រី អ៊ុម វណ្ណឌី អគ្គនាយិកា នៃហាងអលង្ការ CBVH, លោក ចាន់ រដ្ឋា អគ្គនាយកក្រុមហ៊ុន FWD Cambodia និងលោក នឹម ឈុន្នី ស្ថាបនិកក្រុមហ៊ុន VIPASSA។

តើនរណាខ្លះគួរតែចូលរួម​នៅ​ក្នុង​សិក្ខា​សាលានេះ?

តាមការ​បញ្ជាក់របស់​លោក នឹម ឈុន្នី សិក្ខាសាលាមួយនេះ បើកឱ្យ​មានការចូលរួមសម្រាប់មនុស្ស​ទូទៅ ។ លោក ឈុន្នី លើកឡើងថា ទោះបីយើង​មានទ្រព្យសម្បត្តិ មានភាពជោគជ័យ​ហើយ​ក៏​ដោយ ប៉ុន្តែមនុស្ស​គ្រប់គ្នា​មានក្តីសុបិន្ត ដូច្នេះ​នៅពេលមានក្តីសុបិន្ត​ដែលចង់បាន គេនឹងចាប់ផ្តើម​មានគោលដៅ ហើយ​និងដាក់សកម្មភាព ដូច្នេះសិក្ខាសាលាមួយ​នេះ មនុស្ស​គ្រប់រូប​បើមានពេល​គួរ​តែចូលរួម ។ សម្រាប់ការ​ចុះឈ្មោះចូលរួម https://forms.gle/P9DhhmCV26PV8FDs9 ៕