ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
មន្រ្តីជាន់ខ្ពស់ក្រសួងអប់រំ យុវជន និងកីឡា បានឱ្យដឹងថា កម្មវិធីមគ្គុទ្ទេសក៍អាជីព និងការផ្តល់ប្រឹក្សា ដែលនឹងជួយដល់សិស្សានុសិស្សអភិវឌ្ឍសមត្ថភាពផ្ទាល់ខ្លួន និងកំណត់គោលដៅអាជីពនាពេលអនាគត នឹងត្រូវដាក់បញ្ចូលទៅក្នុងប្រព័ន្ធអប់រំកម្ពុជា នាពេលខាងមុខនេះ ប៉ុន្តែគ្រាដំបូងនឹងចាប់ផ្តើមពីថ្នាក់មធ្យមសិក្សា។
ក្នុងសិក្ខាសាលាតម្រង់ទិសស្ដីពី “ការកសាងផែនការគោល កម្មវិធីមគ្គុទ្ទេសក៍អាជីព និងការផ្ដល់ប្រឹក្សា ឆ្នាំ២០២៥-២០៣៥” កាលពីពេលថ្មីៗនេះ ឯកឧត្តមបណ្ឌិត អ៊ឹម កុច រដ្ឋលេខាធិការក្រសួងអប់រំ យុវជន និងកីឡា មានប្រសាសន៍ថា ក្រសួងអប់រំ នឹងរៀបចំគន្លងអប់រំថ្មីនៅកម្រិតមធ្យមសិក្សាទុតិយភូមិ ដោយបែងចែកជាបីគន្លងរួមមាន គន្លងវិទ្យាសាស្ត្រ គន្លងវិទ្យាសាស្ត្រសង្គម និងគន្លងវិជ្ជាជីវៈ។ ក្នុងន័យនេះ ក្រសួងនឹងជ្រើសរើសគន្លងអប់រំចាប់ពីថ្នាក់ទី១០ឡើងទៅ ដើម្បីឱ្យសិស្សសិក្សាឈ្វេងយល់ពីខ្លួនឯង រៀបចំផែនការសិក្សា និងផែនការអាជីព។
រដ្ឋលេខាធិការក្រសួងអប់រំរូបនេះបន្ថែមថា ផែនការគោលដែលនឹងត្រូវកសាងឡើងនេះ នឹងក្លាយទៅជាផែនទីបង្ហាញផ្លូវមួយដ៏សំខាន់ក្នុងការអនុវត្តកម្មវិធីមគ្គុទ្ទេសក៍អាជីព និងការផ្ដល់ប្រឹក្សា ក្នុងប្រព័ន្ធអប់រំជាតិ ចាប់ពីការអប់រំកុមារតូច រហូតដល់ការអប់រំឧត្តមសិក្សា និងការអប់រំក្រៅប្រព័ន្ធ ព្រមទាំងចូលរួមចំណែកដ៏សំខាន់ក្នុងការជួយឱ្យសម្រេចបាននូវការអនុវត្តគន្លងអប់រំថ្មី នៅតាមគ្រឹះស្ថានមធ្យមសិក្សានាពេលខាងមុខ។
ជាមួយគ្នានេះ លោក រ័ត្ន សារ៉ា ប្រធាននាយកដ្ឋានតម្រង់ទិស នៃក្រសួងអប់រំយុវជន និងកីឡា មានប្រសាសន៍ថា កម្មវិធីមគ្គុទ្ទេសក៍អាជីព និងការផ្ដល់ប្រឹក្សា ក្នុងប្រព័ន្ធអប់រំកម្ពុជា មានភាពចាំបាច់ក្នុងការកសាងផែនការគោល ឱ្យមានភាពប្រទាក់ក្រឡាគ្នាពីភូមិសិក្សាមួយទៅភូមិសិក្សាមួយ ក្នុងស្មារតីគាំទ្រដល់សិស្សានុសិស្សឱ្យមានលទ្ធភាពកាន់តែប្រសើរក្នុងការអភិវឌ្ឍសមត្ថភាពផ្ទាល់ខ្លួន និងកំណត់គោលដៅអាជីពនាពេលអនាគត។
លោក យី គឹមថាន នាយកស្ដីទីប្រចាំប្រទេសអង្គការភ្លែនអន្ដរជាតិកម្ពុជា មានប្រសាសន៍ថា អង្គការភ្លែនក៏កំពុងតែផ្ដល់អន្ដរាគមន៍គាំទ្រសិស្សនៅតាមគ្រឹះស្ថានមធ្យមសិក្សាគោលដៅចំនួន២៦ ក្នុងខេត្តសៀមរាប ខេត្តរតនគិរី និងខេត្តស្ទឹងត្រែង ក្នុងការរៀបចំផែនការសិក្សា ផែនការអាជីព ស្គាល់ពីប្រភេទការងារ មុខរបរ សម្រាប់ជាស្ពានបន្ដការសិក្សាទៅសាកលវិទ្យាល័យ។
នាយកស្ដីទីប្រចាំប្រទេសអង្គការភ្លែនអន្ដរជាតិកម្ពុជា ក៏បានបង្ហាគការប្ដេជ្ញាចិត្តក្នុងការបន្ដផ្ដល់ការគាំទ្រដល់នាយកដ្ឋានជំនាញក្នុងការពង្រីកកម្មវិធីមគ្គុទ្ទេសក៍អាជីព និងការផ្ដល់ប្រឹក្សា និងការកសាងផែនការគោល ឆ្នាំ២០២៥-២០៣៥ ឱ្យលេចចេញជារូបរាងមកនាពេលខាងមុខ។
បើតាមឯកសាររបស់ក្រសួងអប់រំ កម្មវិធីមគ្គុទ្ទេសក៍អាជីព និងការផ្ដល់ប្រឹក្សា ត្រូវបានរៀបចំឡើងដើម្បីដាក់ឱ្យអនុវត្តនៅកម្រិតសាលារៀនតាមរយៈគ្រូប្រឹក្សាតាមសាលារៀន ដោយផ្អែកលើគោលដៅធំៗចំនួន៣ រួមមាន ការអភិវឌ្ឍផ្នែកអប់រំ ការអភិវឌ្ឍផ្នែកអាជីព និងការអភិវឌ្ឍផ្នែកបុគ្គលិកលក្ខណៈ ដើម្បីពួកគេអាចធ្វើសមាហរណកម្មខ្លួនទៅក្នុងស្ថានភាពជម្រើស នៃការអប់រំបន្ត និងអាជីពមុខរបរ ប្រកបដោយទំនុកចិត្ត ការប្ដេជ្ញាចិត្ត ជំនឿ គុណតម្លៃ និងគុណធម៌ក្នុងជីវិត៕
