ក្នុងបរិបថមួយចំនួន សិទ្ធិសេរីភាពរបស់ស្ត្រីនៅតែទទួលរងនូវការគាបសង្កត់ពីសង្គម និងគ្រួសារ។ ស្ត្រីភាគច្រើនត្រូវបានបង្ហាត់បង្រៀនឱ្យចេះកិច្ចការងារផ្ទះ និងមើលថែទាំគ្រួសារ ចំណែកឯការសិក្សាអប់រំគឺជារឿងបន្ទាប់បន្សំទៅវិញ។

ស្ត្រីមួយចំនួនទៀត ក៏មានការគាំទ្រពីក្រុមគ្រួសារក្នុងការសិក្សា រៀនសូត្រ នឹងដើរតាមក្ដីស្រមៃរបស់ ខ្លួន ប៉ុន្តែរហូតដល់ពេលជាក់លាក់ណាមួយ ពួកគេក៏ត្រូវបោះបង់ចោលនូវអ្វីដែលខ្លួនពេញចិត្តធ្វើទៅ ហើយនោះ ដើម្បីមកទទួលខុសត្រូវលើការងារថែទាំគ្រួសារវិញ។

ប៉ុន្តែ សម្រាប់លោកស្រី ប៊ុន ចាន់និមល ដែលបច្ចុប្បន្នជាអគ្គនាយិកាផលិតកម្ម Sastra Film បែរជា យល់ឃើញថា មូលហេតុពិតប្រាកដដែលស្ត្រីមិនអាចដើរតាមក្ដីស្រមៃរបស់ខ្លួនបានគឺចេញពីកត្តា ខ្លួនឯង។

ត្រង់ចំណុចនេះ លោកស្រីទទួលស្គាល់ថា ភាពជាស្ត្រីមិនអាចឱ្យលោកស្រីធ្វើការស្មើទៅនឹងបុរស នោះទេ ជាពិសេសការងារដែលមិនសូវមានស្ត្រីធ្វើ ដូចជាការងារក្នុងវិស័យភាពយន្ដជាដើម។ ប៉ុន្តែយ៉ាងណា ទឹកចិត្តដែលពុះពារពីក្នុងខ្លួនស្ត្រី គឺនឹងជំរុញឱ្យពួកគេអាចរកវិធីជំនះនូវកិច្ចការនោះបានដូចបុរសដែរ។

ចេញពីបទពិសោធន៍ផ្ទាល់ លោកស្រីបានឱ្យដឹងថា ក្នុងអំឡុងពេលនៃការចាប់ផ្ដើម Sastra Film ដំបូងៗ គឺលោកស្រីត្រូវចុះថត ចុះធ្វើការងារដែលភាគច្រើនគឺមនុស្សប្រុសជាអ្នកធ្វើ។ បើទោះបីជា លោកស្រីមិនអាចទៅធ្វើការងារធ្ងន់ៗដូចជា លើកសម្ភារៈថតជាដើម ប៉ុន្តែលោកស្រីនៅតែព្យាយាម រកការងារដែលស័ក្កសមនឹងខ្លួនបំផុត។

បើតាមការបញ្ជាក់របស់លោកស្រីគឺ កាលណោះលោកស្រីជាអ្នករៀបចំសម្លៀកបំពាក់ជូនតួអង្គដែល ត្រូវថត ហើយតួនាទីនេះផងដែរ បានជួយលោកស្រីឱ្យនៅជាប់ជាមួយការងារដែលខ្លួនស្រឡាញ់។

ឆ្លងកាត់ឧបសគ្គរាប់មិនអស់ ទម្រាំអាចឈរជើងលើវិស័យភាពយន្ដដូចបច្ចុប្បន្ន លោកស្រីបានបន្តជំរុញ និងលើកទឹកចិត្តថា៖ «សម្រាប់ក្មេងស្រីដែលមានក្ដីស្រមៃច្បាស់លាស់មួយ គួរតែព្យាយាមសម្រេចវាឱ្យបាន ធ្វើយ៉ាងណាកុំ ឱ្យភាពជាមនុស្សស្រីនេះមកបង្អាក់ដំណើររបស់យើង ជាពិសេសកុំឱ្យដៃគូមករារាំងក្ដីស្រមៃរបស់យើង ធ្វើយ៉ាងណាពន្យល់គ្នាឱ្យដឹងតាំងពីដំបូងមក ដើម្បីឱ្យគាត់ជួយគាំទ្រយើងវិញ»។

លោកស្រីសង្កត់ធ្ងន់ថា មនុស្សស្រីជាច្រើនដែលបាត់បង់ឱកាសបន្ទាប់ពីមានគ្រួសារហើយ ដោយសារតែស្វាមី ឬគ្រួសាររបស់ពួកគេមិនគាំទ្រ ឬស្ត្រីខ្លួនឯងដែលត្រូវរ៉ាប់រងការងារផ្ទះច្រើន ហើយយល់ថាខ្លួនលែងមានពេលធ្វើអ្វីដែលខ្លួនស្រឡាញ់តទៅទៀត។

ម្ចាស់ផលិតកម្មភាពយន្ដរូបនេះបានបន្តចែករំលែកទៀតថា ការរើសគូស្រកគឺរិតតែសំខាន់ថែមទៀត ព្រោះថារវាងគ្រួសារ និងការងារគឺសំខាន់ដូចគ្នា។ ម្លោះហើយស្ត្រីគួររើសយកគូជីវិតម្នាក់ដែលយល់ពី គោលដៅ និងគាំទ្រខ្លួនឱ្យឆាប់សម្រេចបាននូវក្ដីស្រមៃរបស់ពួកគេ។

យ៉ាងណាមិញ ទឹកចិត្តពុះពារតែមួយមុខក៏មិនទាន់គ្រប់គ្រាន់ដែរ សម្រាប់លោកស្រី ភាពឆ្លាតវៃ រហ័សរហួននៅតែមានតម្លៃនៅគ្រប់ការងារទាំងអស់។ ជាក់ស្ដែង វិស័យភាពយន្ដនៅកម្ពុជាក្នុងអំឡុង ឆ្នាំ ២០១៥ គឺនៅមានកម្រិតនៅឡើយ ការគាំទ្រទៀតក៏កាន់តែមានតិចតួច។

មិនត្រឹមតែប៉ុណ្ណោះ ការចូលធ្វើការក្នុងផលិតកម្មផ្សេងៗក៏កាន់តែចង្អៀតថែមទៀត ដូច្នេះហើយ បានជាលោកស្រីសម្រេចចិត្តបង្កើតឱកាសឱ្យខ្លួនឯង តាមរយៈការបង្កើតផលិតកម្មដោយខ្លួនឯង តែម្ដង។

យើងមិនអាចអង្គុយរង់ចាំឱកាសមកដល់ ទើបយើងធ្វើនោះទេ យើងអាចបង្កើតឱកាសដោយខ្លួនឯង បង្កើតទីផ្សារដោយខ្លួនឯង និយាយរួមគឺរកផ្លូវដើរដោយខ្លួនឯង

លោកស្រី ប៊ុន ចាន់និមល

គួរបញ្ជាក់ថា ផលិតកម្មភាពយន្ដ Sastra ត្រូវបានបង្កើតឡើងកាលពីឆ្នាំ ២០១៥ ជាផលិតកម្ម ដំបូងគេដែល មានលទ្ធភាពអាចផលិតភាពយន្ដបានរាប់រយចំណងជើងក្នុងមួយឆ្នាំ។ រហូតមកដល់បច្ចុប្បន្ន Sastra បានផលិតរឿងប្រមាណជាង ៤០០ចំណងជើង ដោយក្នុងនោះ មានបែងចែកជាប្រភេទសាច់រឿងខុសៗគ្នា។ បច្ចុប្បន្ននេះផងដែរ លោកស្រីកំពុងតែធ្វើការជាមួយ ដៃគូនៅក្រៅប្រទេសដើម្បីនាំយករឿងដែល Sastra ផលិតបាន ទៅចាក់បញ្ចាំងនៅក្រៅប្រទេស សំដៅលើកស្ទួយវិស័យភាពយន្ដនៅកម្ពុជាឱ្យកាន់តែប្រសើរ៕