ម្តងម្កាល​ ការប្រើប្រាស់ពេលពេញមួយថ្ងៃដោយមិនមានលទ្ធផលអ្វីសោះ បានបន្សល់នូវអារម្មណ៍មិនល្អកើតឡើង។ ក្នុង​ន័យនេះចង់សំដៅលើការប្រើប្រាស់ពេលវេលាខ្លួនឯងដោយគ្មានប្រសិទ្ធភាពដូចជា ការអូសបន្លាយពេលចោល ការប្រើប្រាស់ទូរស័ព្ទច្រើនលើសលប់ និងការចំណាយពេលជាច្រើនម៉ោងដើម្បីបញ្ចប់ការងារនីមួយៗ ខណ:ការងារខ្លះត្រូវការតែពេលតិចតួចប៉ុណ្ណោះក្នុងការអនុវត្ត ទាំងនេះសុទ្ធសឹងតែប៉ះពាល់ទៅកាន់អារម្មណ៍ល្អៗ និងបង្កបាននូវភាពស្មុគស្មាញក្នុងចិត្តបន្ថែម។ ទន្ទឹមគ្នានោះ មានវិធីសាស្រ្ត និងយុទ្ធសាស្រ្តជាច្រើន ដែលមនុស្សជ្រើសរើស មកអនុវត្តន៍ដើម្បីថែទាំសុខភាពប្រចាំថ្ងៃ និងការជំរុញបាននូវសុខដុមរមនាក្នុងដំណើរជីវិត។

តាមរយ:គេហទំព័រ Yourtango បានបង្ហាញអំពីការចាប់ផ្តើមគិតអំពីទម្លាប់ប្រចាំថ្ងៃ សាមញ្ញៗ តូចៗ និងមានលទ្ធភាពជួយរក្សាលំនឹង និងរក្សាទម្លាប់ល្អ ក្នុងការរស់នៅប្រចាំថ្ងៃជំនួសឱ្យការគេចពីភាពស្មុុគស្មាញដែលបានកើតឡើង ដែលទម្លាប់ទាំងនោះមានលម្អិតជូននៅខាងក្រោម ៖

១. មិនទម្រើសខ្លួនក្នុងការជ្រើសអាហារពេលល្ងាច ៖ ក្នុងរយៈពេលពេញមួយថ្ងៃ មនុស្សបានចំណាយពេលជាច្រើនជាមួយនឹងការងារយ៉ាងចម្រុះបែប ដូចជាការសម្រេចចិត្តលើការស្លៀកពាក់ ការជ្រើសរើសអាហារពេលព្រឹក និងពេលថ្ងៃ រួមទាំងគិតអំពីផែនការសកម្មភាពដទៃៗទៀត! ដូច្នេះការកាត់បន្ថយភាពតានតឹងពីការផ្តល់ភាពហ្មត់ចត់ពេកចំពោះអាហារពេលល្ងាច គឺជាការបន្ថយអាការស្ត្រេសបានមួយចំនួនធំដែរ។ គួរជម្រាបជូនដែរថា កាត់បន្ថយការខ្វាយខ្វល់ចំពោះអាហារពេលល្ងាច មិនមែនមានន័យថា បរិភោគអ្វីក៏បានតាមតែចិត្តនឹកឃើញនោះទេ ប៉ុន្តែចង់សំដៅលើការហូបរបស់ដែលមានស្រាប់នៅក្បែរៗខ្លួន និងងាយស្រួលរក រួមទាំងគិតពីប្រភេទអាហារដែលមានជីវជាតិ ដូចជាបន្លែផ្លែឈើជាដើម មួយវិញទៀតអាហារពេលល្ងាចពុំចាំបាច់ត្រូវហូបឱ្យឆ្អែតដូចទៅនឹងពេលព្រឹក​ ឬពេលថ្ងៃនោះទេ។

២. សម្អាតព័ត៌មានដែលពុំចាំបាច់ពីប្រព័ន្ធឌីជីថល ៖ ពេលខ្លះសារនៅក្នុងទូរស័ព្ទដៃ ឬកុំព្យូទ័រ ដែលប្រើប្រាស់ប្រចាំថ្ងៃ បានរួមចំណែកបង្កភាពស្មុគស្មាញ ជាពិសេសក្នុងអ៊ីម៉ែលចាស់ៗ ឬការតាមដានកម្មវីធីដែលមិនឆ្លើយតបនឹងតម្រូវការបច្ចុប្បន្ន ក៏ដូចជាការផ្ទុកឯកសារចម្រុះនានា ដែលមិនចាំបាច់ជាដើម។ ការសម្អាត ឬលុបចោលនូវព័ត៌មានដែលមិនត្រូវការចេញពីកម្មវិធីណាមួយ បានរួមចំណែកកាត់បន្ថយស្ត្រេស រួមទាំងផ្តល់ភាពងាយស្រួលក្នុងការតាមដានព័ត៌មានល្អៗ ឬស្វែងរកឯកសារសំខាន់ៗបានលឿនជាងមុន។

៣. រៀបចំទីតាំងដែលមានលក្ខណៈសាមញ្ញៗ ៖ ការតុបតែងដែលមានសម្ភារច្រើនពេក ជាពិសេសការតាំងសម្ភារដែលមិនផ្តល់អត្ថន័យទៅកាន់ខ្លួនឯង ឬក៏របស់របរដែលមានក៏បានអត់ក៏បានបន្តសេសសល់យ៉ាងច្រើន មិនថាទុកនៅកន្លែងធ្វើ ការ ឬទុកនៅផ្ទះទេ ការផ្ទុកច្រើនពេក នោះយូរៗទៅបង្កបានទៅអារម្មណ៍ស្មុគស្មាញ ព្រោះរវល់តែរៀបចុះរៀបឡើង និងសម្អាតរបស់ប្រើប្រាស់មិនចេះអស់ពីមួយថ្ងៃ ទៅមួយថ្ងៃ។ ដូច្នេះការលះបង់ចោលនូវសម្ភារដែលពុំចាំបាច់ចេញខ្លះជាវិធីសាមញ្ញមួយដើម្បីកាត់បន្ថយអាការស្ត្រេស៕