សម្រាប់និស្សិត​កម្ពុជា​ដែល​មានបំណងចង់បន្តការសិក្សា​ថ្នាក់ក្រោយ​ឧត្តមសិក្សា និង​ថ្នាក់ឧត្តមសិក្សា នៅប្រទេសចិន ពេលនេះ ក្រសួងអប់រំ យុវជន និង​កីឡា បាន​ប្រកាស​ពីអាហារូបករណ៍​ចំនួន​៨កន្លែង សម្រាប់​សិស្ស និស្សិត មន្រ្តីរាជការ​កម្ពុជា បន្តការសិក្សា​នៅ​តាមសាកលវិទ្យាល័យនានា​ក្នុងខេត្ត​ក្វាងស៊ី ប្រទេស​ចិន។

បើតាម​ការ​បញ្ជាក់របស់ក្រសួងអប់រំ អាហារូបករណ៍នេះ ភាគីចិនរាប់រងថ្លៃសិក្សា កន្លែងស្នាក់នៅ និង​ផ្តល់​ប្រាក់​អាហារូបករណ៍​ប្រចាំខែ ។ រី​ឯ​ថ្លៃសំបុត្រ​យន្តហោះ​ទៅមក ជា​បន្ទុក​របស់សាម៉ីជន។

សាកលវិទ្យាល័យ និង​អាហារូបករណ៍​ដែលផ្តល់ជូន​មានដូចជា ៖ Guangxi University ថ្នាក់ឧត្តមសិក្សា ១កន្លែង, Guangxi Nomal University ថ្នាក់ឧត្តមសិក្សា ១កន្លែង, Guangxi University for Nationalities ថ្នាក់​ក្រោយឧត្តមសិក្សា ១កន្លែង, Guilin University of Technology ថ្នាក់ឧត្តមសិក្សា ១កន្លែង, Nanning Normal University ថ្នាក់​ឧត្តមសិក្សា ១កន្លែង, Youjang Medical University for Nationalities ថ្នាក់ឧត្តមសិក្សា ១កន្លែង, Guilin Medical University ថ្នាក់​ឧត្តមសិក្សា ១កន្លែង និង Ulin Normal University ថ្នាក់ឧត្តមសិក្សា ១កន្លែង។

លក្ខខណ្ឌ​នៃការ​ដាក់ពាក្យ​ប្រឡង​រួមមាន ៖ សម្រាប់ថ្នាក់​ឧត្តមសិក្សា (បរិញ្ញាបត្រ) បេក្ខជន​ទាំងពីរភេទ ត្រូវមានសញ្ជាតិខ្មែរ, មាន​អាយុមិនលើសពី ២២ឆ្នាំ, មានសញ្ញាបត្រមធ្យមសិក្សា​ទុតិយភូមិ ឬសញ្ញាបត្រ​ដែលមាន​តម្លៃសមមូល, មានចំណេះដឹងភាសាចិន ឬអង់គ្លេសជ្រៅជ្រះ, មានសុខភាពល្អបរិបូរណ៍ ទាំងកាយសម្បទា និង​សតិបញ្ញា, មិន​ធ្លាប់​ទទួលបាន​អាហារូបករណ៍​របស់សាធារណរដ្ឋប្រជាមានិតចិនពីមុនមក។

សម្រាប់ថ្នាក់ក្រោយ​ឧត្តមសិក្សា (បរិញ្ញាបត្រជាន់ខ្ពស់) បេក្ខជនទាំងពីរភេទ ត្រូវមានសញ្ញជាតិខ្មែរ, មានអាយុ​មិន​លើស​ពី ៣៥ឆ្នាំ, មាន​សញ្ញាបត្រ​ថ្នាក់​ឧត្តមសិក្សា (បរិញ្ញាបត្រ), មានចំណេះដឹងភាសាចិន ឬអង់គ្លេសជ្រៅជ្រះ, មានសុខភាពល្អបរិបូរណ៍ ទាំងកាយសម្បទា និងសតិបញ្ញា និង មិន​ធ្លាប់​ទទួលបានអាហារូបករណ៍​របស់​សាធារណរដ្ឋប្រជាមានិតចិនពីមុនមក។

សម្រាប់បេក្ខជនដែលចាប់អារម្មណ៍ សូម​ដាក់ពាក្យ​ចាប់ពីថ្ងៃផ្សាយ​ដំណឹង​នេះ រហូត​ដល់ថ្ងៃទី១៩ ខែមេសា ឆ្នាំ​២០២៤ វេលាម៉ោង ១៦:០០នាទី នៅ​ការិយាល័យអាហារូបករណ៍ និងកម្មសិក្សា នៃនាយកដ្ឋានទំនាក់ទំនងវប្បធម៌ និងអាហារូបករណ៍ ដែលមានអាសយដ្ឋាន ៖ អគារលេខ២៣ ផ្លូវលេខ៣៦០ សង្កាត់បឹងកេងកង១ ខណ្ឌបឹងកេងកង រាជធានីភ្នំពេញ៕