ធនាគារ​អភិវឌ្ឍន៍​អាស៊ី (ADB)​ កាលពីថ្ងៃព្រហស្បត្តិ៍ (៣១ តុលា) បានអនុម័ត​ប្រាក់កម្ចី​ចំនួន៨០លានដុល្លារ ដើម្បីពង្រឹង​ការ​អប់រំ​កម្រិត​មធ្យមសិក្សា​នៅ​កម្ពុជា ដោយផ្តោត​លើជំនាញ “សតវត្សទី២១” ដូចជា​ការ​គិតស៊ីជម្រៅ និងដោយភាពច្នៃប្រឌិត ការ​បង្រៀន​ដោយ​បរិយាបន្ន​សម្រាប់ទាំងសិស្ស​ប្រុស និង​សិស្ស​ស្រី និង​ការ​ត្រួសត្រាយ​ផ្លូវ​សម្រាប់​ការ​អប់រំ​ក្រោយ​មធ្យមសិក្សា។

លោកស្រី Jyotsana Varma នាយិកា ធនាគារអភិវឌ្ឍន៍អាស៊ីប្រចាំកម្ពុជា មានប្រសាសន៍ថា«កម្ពុជាត្រូវពន្លឿនការផ្លាស់ប្តូរទៅរកសកម្មភាពសេដ្ឋកិច្ចដែលបន្ថែមតម្លៃខ្ពស់ ជាពិសេសសកម្មភាពដែលជំរុញដោយបច្ចេកវិទ្យា ដើម្បីរក្សាសមត្ថភាពប្រកួតប្រជែងជាសកល និងពង្រឹងវឌ្ឍនភាពសេដ្ឋកិច្ចដ៏គួរឱ្យ កត់សម្គាល់របស់ខ្លួនកន្លងមកនេះ។

“កម្លាំងពលកម្មប្រកបដោយជំនាញ និង ការអប់រំ គឺជាតម្រូវការ មូលដ្ឋានដើម្បីសម្រេចបានគោលដៅនេះ។ ឈរលើសមិទ្ធផលនៃការវិនិយោគជាបន្តបន្ទាប់របស់ ADB ក្នុង វិស័យអប់រំ និងអភិវឌ្ឍន៍ជំនាញ គម្រោងនេះមានគោលបំណងពង្រីកសក្តានុពលនៃចំនួនពលរដ្ឋវ័យក្មេងរបស់កម្ពុជា ដើម្បីជំរុញកំណើនសេដ្ឋកិច្ចនាពេលអនាគត”

លោកជំទាវ ឃួន វិច្ឆិកា មន្រ្តីជាន់ខ្ពស់ និង​ជាអ្នកនាំពាក្យ​ក្រសួងអប់រំ យុវជន និងកីឡា មានប្រសាសន៍ថា ថវិកានៃកម្ចី៨០លានដុល្លារនេះ នឹងត្រូវ​ប្រើប្រាស់​ក្នុងគម្រោង​មធ្យមសិក្សា សម្រាប់​ការ​ប្រកួត​ប្រជែអ​មូលធន​មនុស្ស ដោយ​រំពឹងថា នឹងនាំ​មក​នូវ​ភាព​ប្រសើរ​ឡើងចំពោះ​ការ​អប់រំ​មធ្យមសិក្សា​ទុតិយភូមិ​ដែលមាន​គុណភាព, ការអប់រំមធ្យមសិក្សា​ដែលស្របជាមួយ​ជំនាញសតវត្សទី២១, រង្វាយតម្លៃ​លទ្ធផល​ការរៀន​មធ្យម​សិក្សា និង ការ​អប់រំក្រោយ​មធ្យមសិក្សា។

ជាមួយ​គ្នានេះ បើយោង​តាមសេចក្តីប្រកាស​របស់ ADB គម្រោងអប់រំថ្នាក់មធ្យមសិក្សា​នេះ នឹងបង្កើន​ចំនួនអគារ​សិក្សា​ដែលធន់​នឹង​អាកាសធាតុ​ប្រកប​ដោយបរិយាបន្ន (រួមទាំងថ្នាក់រៀន​បន្ថែម​ចំនួន៤០០) ដើម្បីដោះស្រាយ​ស្ថានភាព​ចង្អៀត​ក្នុងថ្នាក់រៀន និង​ពង្រីក​លទ្ធភាព​ទទួលបាន​ការ​អប់រំ​មធ្យមសិក្សា​ទុតិយភូិ​ប្រកប​ដោយ​គុណភាព។ គម្រោងនេះ ក៏​នឹងធ្វើ​ឱ្យ​ប្រសើរ​ឡើង​នូវ​លទ្ធភាព​ទទួលបានការ​អប់រំ ជាពិសេស​សម្រាប់សិស្សា​នុសិស្ស​ដែលមាន​ពិការភាព​ក្នុងការ​សិក្សា តាមរយៈ​ការ​អភិវឌ្ឍ​បច្ចេកវិទ្យាជំនួយ និង​ការគាំទ្រ​សាលា​មធ្យមសិក្សា​អប់រំពិសេស។ គម្រោងនេះនឹងលើកកម្ពស់ការអប់រំលើមុខវិជ្ជាវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) ដើម្បីរៀបចំក្រុមកំលាំងពលកម្មសម្រាប់ពេលអនាគត ដែលមានជំនាញស្រប តាមតម្រូវការឧស្សាហកម្ម។

សម្រាប់គោលដៅដូចគ្នានេះដែរ គម្រោងក៏នឹងអភិវឌ្ឍជំនាញទន់ ដូចជាការ ទំនាក់ទំនង ការសហការ និងការគិតប្រកបដោយការត្រិះរិះ និង ការគិតស៊ីជម្រៅនិងដោយភាពច្នៃប្រឌិត សម្រាប់សិស្សានុសិស្ស។ គម្រោងនេះនឹងវិនិយោគលើការកែលម្អការអភិវឌ្ឍវិជ្ជាជីវៈរបស់គ្រូបង្រៀន ដើម្បី ជំរុញវិធីសាស្ត្របង្រៀនតាមបែបគម្រោង ដែលរួមបញ្ចូលការងារជាក្រុម ការដោះស្រាយបញ្ហា ជាក់ ស្តែង និងការចូលរួមជាមួយសហគមន៍៕