ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – កញ្ញា ទូច ចាន់វត្តី ជាកីឡាការិនីកម្ពុជាដំបូងគេបង្អស់ដែលបានយកឈ្នះមេដាយមាសគុនខ្មែរលើកីឡាការិនីវៀតណាម Nguyen Thi Chi ក្នុងប្រភេទទម្ងន់ ៥៤គីឡូក្រាមផ្នែកនារី នៅវគ្គផ្ដាច់ព្រ័ត្រក្នុងព្រឹត្តិការណ៍ប្រកួតកីឡាស៊ីហ្គេម ។ បន្ទាប់ពីទទួលមេដាយមាសកាលពីរសៀលថ្ងៃទី១១ ខែឧសភាកន្លងទៅនៅពហុកីឡដ្ឋានជាតិមរតកតេជោ កីឡាការិនី ទូច ចាន់វត្តី បានបង្ហើបថា ចិត្តស្រឡាញ់គុនខ្មែរជំរុញឱ្យកញ្ញាប្រឹងប្រែងហ្វឹកហាត់កីឡាគុនខ្មែរ ដើម្បីប្រកួតយកមេដាយជូនកម្ពុជា ។
កញ្ញា ទូច ចាន់វត្តី កីឡាការិនីគុនខ្មែរអាយុ ១៨ឆ្នាំរូបនេះ បាននិយាយថា
“ដោយសារខ្ញុំស្រឡាញ់គុនខ្មែរតាំងពីក្មេង ទើបខ្ញុំហាត់ត្រៀមខ្លួនប្រកួតនៅស៊ីហ្គេមនេះ … ខ្ញុំនឹងប្រឹងហាត់បន្តទៀត ! សម្រាប់ការឈ្នះលើកនេះ (ស៊ីហ្គេម) ធ្វើឱ្យក្តីស្រមៃរបស់ខ្ញុំក្លាយជាការពិតយកមេដាយជូនជាតិ”
ទន្ទឹមគ្នានេះ កីឡាការិនី ទូច ចាន់វត្ដី បានឱ្យដឹងថា កញ្ញាសម្រេចចិត្តហាត់ និងចាប់អាជីពជាកីឡាការិនីប្រដាល់គុនខ្មែរ ព្រោះមានបំណងលើកស្ទួយវិស័យកីឡាគុនខ្មែរឱ្យកាន់តែល្បាញល្បី និងចង់ឱ្យបរទេសស្គាល់កាន់តែច្បាស់ពីមរតកកីឡារបស់ខ្មែរ ។ ជាមួយនឹងគោលបំណងនេះ នាកម្មវិធីប្រកួតវគ្គផ្ដាច់ព្រ័ត្រក្នុងព្រឹត្តិការណ៍ប្រកួតកីឡាស៊ីហ្គេម កីឡាប្រដាល់គុនខ្មែរ ទូច ចាន់វត្ដី សម្ដែងថ្វាយបង្គំគ្រូបែបឥន្ទ្រីសម្ដែងរិទ្ធយ៉ាងប៉ិនប្រសប់ ។
សូមជម្រាបថា បច្ចុប្បន្ននេះកញ្ញា ទូច ចាន់វត្តី កំពុងសិក្សាថ្នាក់ទី១២ ។ ស្របពេលដែលកម្ពុជារៀបចំព្រឹត្តិការណ៍ប្រកួតកីឡាអាស៊ីអាគ្នេយ៍ កីឡាការិនីគុនខ្មែរជម្រើសជាតិវ័យក្មេងរូបនេះ បានខិតខំហ្វឹកហាត់យ៉ាងទៀងទាត់ និងត្រៀមខ្លួនយកលទ្ធផលប្រសើរនៅពេលឡើងសង្វៀន ។ ទីបំផុតកញ្ញា ទូច ចាន់វត្តី បានយកឈ្នះកីឡាការិនីវៀតណាម ព្រមទាំងទទួលបានមេដាយមាសស៊ីហ្គេមផ្នែកកីឡាប្រដាល់គុនខ្មែរ ៕
