ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បច្ចុប្បន្នជំនាញមេកានិចរថយន្ត ឬជំនាញជួសជុលរថយន្ត ដែលជាជំនាញមួយលេចធ្លោក្នុងចំណោមជំនាញវិជ្ជាជីវៈផ្សេងទៀត កំពុងទទួលបានការចាប់អារម្មណ៍ខ្ពស់ពីសំណាក់យុវនារី ខណៈដែលមានតម្រូវការការងារខ្ពស់ និងប្រាក់ខែសមរម្យ។
លោក ស៊ឹម សុរិន្ទ នាយកវិទ្យាស្ថានបច្ចេកទេស ហ្ស៊ី វ៉េ សេ (JVC) បានមានប្រសាសន៍ថា ជំនាញមេកានិចរថយន្ត ឬជំនាញជួសជុលរថយន្ត ជាជំនាញដ៏មានសក្ដានុពលមួយ អ្នកដែលបានបញ្ចប់ជំនាញនេះភាគច្រើនមិនខ្វះការងារ ខណៈតួលេខនៃយានជំនិះកើនឡើងខ្លាំងនៅប៉ុន្មានឆ្នាំចុងក្រោយនេះ។
លោកនាយកថា បច្ចុប្បន្ននៅទូទាំងប្រទេស សិស្សទាំងបុរស និងនារីភាគច្រើនដែលចេញពីសាលា JVC មានការងារធ្វើនៅតាមបណ្ដាក្រុមហ៊ុនរថយន្តល្បីៗក្នុងស្រុក និងហ្គារ៉ាស់ដែលបើកព្រោងព្រាធនៅរាជធានីភ្នំពេញ និងបណ្តាខេត្តនានា។ ជាមួយគ្នានេះ លោកក៏បានសង្កេតឃើញដែរថា កន្លងមកជំនាញមេកានិចរថយន្ត គឺមានតែសិស្សប្រុសៗទេដែលចាប់អារម្មណ៍ច្រើនព្រោះជំនាញនេះទាមទាឱ្យមានការប្រឹងប្រែងអត់ធ្មត់ ប្រើកម្លាំងកាយ និងប្រឡាក់ដៃជើងច្រើន។ ទោះបីជាយ៉ាងណា សិស្សនារីនាបច្ចុប្បន្ននេះវិញ ក៏មានការចាប់អារម្មណ៍ខ្លាំងមិនចាញ់បុរសដែរ ហើយពួកគាត់ក៏មានការតស៊ូ ប្រឹងប្រែង សិក្សារៀនសូត្រពីលោកគ្រូ អ្នកគ្រូយ៉ាងខ្លាំង ព្រមទាំងមានការចងចាំ និងស្មារតីល្អថែមទៀត។ លោកថា នៅសាលា JVC សព្វថ្ងៃនេះ មានសិស្សជានារីចំនួន ២០នាក់មកពីតាមបណ្ដាខេត្តផ្សេងៗគ្នា ដែលជាតួលេខគួរឱ្យកត់សម្គាល់ ព្រោះកន្លងមកធ្លាប់មានតែប្រុសៗទេដែលដាក់មករៀនច្រើន តែឥលូវពួកគាត់ជានារី ក៏មិនចាញ់បុរសដែរ។
យុវតី ជា មុន្នី អាយុ ២០ឆ្នាំ មានស្រុកកំណើតនៅខេត្តតាកែវ ជាសិស្សកំពុងសិក្សាជំនាញមេកានិចរថយន្តនៅវិទ្យាស្ថានបច្ចេកទេស ហ្ស៊ី វ៉េ សេ បាននិយាយថា កញ្ញាមានចំណាប់អារម្មណ៍ខ្លាំងក្នុងការរៀនជំនាញមេកានិចរថយន្ត ដោយសារតម្រូវការទីផ្សារខ្ពស់ និងប្រាក់ខែសមរម្យ។
យុវតីរូបនេះបន្តថា កញ្ញាបានសិក្សាចំនួន ៨ខែមកហើយ ខណៈដែលជំនាញមួយនេះត្រូវរៀនរយៈពេល២ឆ្នាំ។ ឆ្លងកាត់រយៈពេល ៨ខែនេះ កញ្ញាទទួលចំណេះដឹង និងបទពិសោធន៍ជាច្រើនពីលោកគ្រូ អ្នកគ្រូនៅ JVC ដោយសារពួកគាត់បានយកចិត្តទុកដាក់បង្ហាត់បង្រៀនទាំងទ្រឹស្ដី និងការអនុវត្តផ្ទាល់។
“ខ្ញុំមានក្ដីស្រមៃចង់ក្លាយជាអ្នកជំនាញបច្ចេកទេសម៉ាស៊ីនរថយន្ត ហើយក៏ចង់ក្លាយជាអ្នកលក់ដូរគ្រឿងបន្លាស់រថយន្តដែរ។ ខ្ញុំសង្ឃឹមថា ក្ដីស្រមៃនេះនឹងទទួលបានជោគជ័យ និងជួយឱ្យជីវភាពគ្រួសាររបស់ខ្ញុំកាន់តែធូរធារថែមទៀត”
យោងតាមរបាយការណ៍របស់ក្រសួងសាធារណការ និងដឹកជញ្ជូន គិតមកដល់បច្ចុប្បន្ននេះ មានយានយន្ដដែលបានចុះបញ្ជីចំនួនជាង ៧លានគ្រឿង ក្នុងនោះមានម៉ូតូ ៦ ៣៥៥ ២២៣គ្រឿង យានយន្តធុនស្រាល ៨២៨ ៣៤៤គ្រឿង និងយានយន្តធុនធ្ងន់ ២៩៩ ០៦៦គ្រឿង៕
