គ្មាននរណាម្នាក់នឹកស្មានទេថា រ៉ុន សុភី ជាក្មេងស្រីដែលផ្ញើរជីវិត​លើទីលានសំរាម អាច​រៀនពូកែ រហូត​ទទួលបាន​អាហារូបករណ៍​សិក្សា​នៅ​សាកលវិទ្យាល័យ​មែលប៊ន ប្រទេស​អូស្រ្តាលី ដែលមានតម្លៃ៣០ម៉ឺន​ដុល្លារនោះឡើយ។

ថ្លែង​នៅ​លើវេទិកា​នៃសាកលវិទ្យាល័យ​មែលប៊ន ក្នុងពិធីទទួលសញ្ញាបត្របញ្ចប់ការសិក្សាឆ្នាំមូលដ្ឋាន កាលពីពេលថ្មីៗនេះ សុភី រំលឹកថា កាលពី១០ឆ្នាំមុន នាងគឺជាក្មេងស្រីដ៏តូចម្នាក់ និងមានតួនាទីជួយសម្រួលបន្ទុកគ្រួសារ  ជាមួយបងស្រីធំ តាមរយៈការដើររើសសំរាម និងមិនដែលស្គាល់ថ្ងៃសម្រាកឡើយ។ ស្ថិតនៅក្នុងស្ថានភាពជាក្មេងរស់នៅទីលានគំនរសំរាម សុភី តែងស្វែងរកអាហារ នៅក្នុងកាកសំណល់ដែលគេបានបោះចោល ។

កញ្ញា រ៉ុន សុភី

“កាក់សំណល់ដែលគេបោះចោលនៅក្នុងគំនរសំរាម ខ្ញុំបានយកវាមកធ្វើជាអាហារសម្រាប់បរិភោគដើម្បីចម្អែតក្រពះទាំងពេលព្រឹក និងល្ងាច”

កញ្ញា រ៉ុន សុភី បាន​បន្ត​រំលឹកថា រូបនាងធ្លាប់ទទួលបទពិសោធន៍ ត្រូវបានបណ្តេញចេញដោយម្ចាស់ផ្ទះមួយកន្លែង ក្រោយពីគ្រួសាររបស់នាងមិនមានលទ្ធភាពបង់ថ្លៃជួលកន្លែងស្នាក់នៅ ឱ្យទាន់ពេលវេលា។ ដូច្នេះនាងគ្មានជម្រើសអ្វីក្រៅតែពីបន្តទៅមុខទៀត ប៉ុន្តែក៏ទៅណាមិនឆ្ងាយពីបរិវេណគំនរសំរាមដែរ ពីព្រោះវាជាទីតាំងដែលធ្វើឱ្យនាងអាចរកចំណូលបាន។

បើនិយាយពីការ​សិក្សា​វិញ សុភី ពិតជាមិនដែលដឹងនោះទេថា សាលារៀនមានរូបរាងបែបណា មិនដែលស្គាល់អ្វីទៅជាភាសារអង់គ្លេស ហើយក៏មិនដែលដឹងសោះឡើយថា សាលាគឺជាកន្លែងដែលស្រស់ស្អាតយ៉ាងនេះ ព្រោះអ្វីដែល សុភី បានពាល់ និងស្គាល់កំឡុងពេលជាក្មេងរើសសំរាម គឺត្រូវប្រឹងរើសវត្ថុដែលអាចច្នៃជាលុយពីគំនរសំរាម ឱ្យបានច្រើនតាមដែលអាចធ្វើបាន ដើម្បីប្រកួតជាមួយបងស្រី និងទទួលបាននូវអារម្មណ៍មោទកភាពពីកិច្ចការទាំងនោះ។ មួយវិញទៀត នាងក៏មិនដែលដឹងទេថា កាលដែលមានមិត្តម្នាក់ដើម្បីជជែកគ្នាពេលមានបញ្ហា គឺជារឿងដ៏អស្ចារ្យយ៉ាងនេះទេ។

តែយ៉ាងណា ក្រោយ​ពី​រូបនាង​ត្រូវ​បានជ្រើសរើសដោយ​​អង្គការ​មូលនិធិ​កុមារ​កម្ពុជា (CCF) ដែលផ្តល់​ឱកាស​ឱ្យ​រូបនាងបានចូលរៀន វាបានផ្លាស់ប្តូរវាសនា​របស់​នាង​យ៉ាងខ្លាំង ដោយ​នាង​មាន​ឱកាស​អាចចេះ​និយាយភាសាអង់គ្លេស ទទួលបានបទពិសោធន៍ក្នុងសង្គម បង្កើតមិត្តថ្មីៗ និងមានទំនុកចិត្តច្រើនជាមុន។

កញ្ញា រ៉ុន សុភី

“បើខ្ញុំមិនមានឱកាសទទួលបានការសិក្សាទេ នោះគឺ បើមិនរៀបការនៅវ័យក្មេង ក៏ស្លាប់ដោយសារជំងឺអាសន្នរោគណាមួយដែរ”

យ៉ាងណាក៏ដោយនិស្សិតអាហាររូបករណ៍រូបនេះសង្ឃឹមថា អ្នកទាំងអស់គ្នា គួរតែក្លាយជាផ្នែកមួយនៃសហគមន៍ ដោយការចូលរួមគាំទ្រកម្មវិធីអ្នកដឹកនាំវ័យក្មេង (Young leader program) ដែលជាកម្មវិធីមួយរបស់សិស្សអាហារូបករណ៍សកល តាមរយៈការជួយគាំទ្រនូវថវិកា ព្រោះថា វាជាការផ្តល់ពន្លឺទៅកាន់មនុស្សដែលមិនមានឱកាស ជាក់ស្ដែងដូចជារូបនាងផ្ទាល់ វាពិតជាមានន័យណាស់សម្រាប់នាង ក៏ដូចជាអ្នកគ្រប់គ្នា ដែលទទួលបានឱកាសពីកម្មវិធីអាហារូបករណ៍នេះ៕