បច្ចុប្បន្ននេះ ភាសាបរទេសចំនួនពីរ គឺភាសាអង់គ្លេស និង​ភាសាចិន បានក្លាយទៅជាភាសានាំមុខគេក្នុងការប្រាស្រ័យទាក់ទង ក៏ដូចជាការធ្វើទំនាក់ទំនងពាណិជ្ជកម្មនានានៅលើសាកលលោក ។ ជាមួយ​គ្នានេះ នៅ​កម្ពុជា​បច្ចុប្បន្ន គេ​ក៏​ឃើញ​សាលា​រៀន​ឯកជន​ក្នុងស្រុក បាន​បង្កើត​ឱ្យមានថ្នាក់ភាសាបរទេស​ចាប់តាំងពីថ្នាក់មត្តេយ្យ​ឡើងទៅ ។ តើ​ការ​ឱ្យ​​កុមាររៀន​ភាសាបរទេស​ចាប់ពីថ្នាក់មត្តេយ្យមានផលប្រយោជន៍អ្វីខ្លះសម្រាប់ពួកគេ?

លោកស្រី អ៊ុក សូនីតា អ្នកជំនាញអប់រំកុមារតូច និងជានាយិកាសិក្សាធិការក្រុមហ៊ុនវេសឡាញ អេឌ្យូខេសិន គ្រុប មានប្រសាសន៍ថា ថ្នាក់មត្តេយ្យសិក្សាមានសារៈសំខាន់ណាស់ក្នុងការអភិវឌ្ឍកុមារ ដូចជា អភិវឌ្ឍទៅលើញាណទាំង៥ ដែលមានដូចជាការចាប់កាន់ ស្ទាប ហិត ភ្លក់ និងស្តាប់, ការអភិវឌ្ឍទៅលើផ្នែកទាំង៥ ដូចជា អភិវឌ្ឍទៅលើសង្គម និងអារម្មណ៍ ដែលបង្រៀនឱ្យកុមារចេះ មានទំនាក់ទំនងជាមួយកុមារដទៃ និងមនុស្សជុំវិញខ្លួន ដែលជាយាននាំទៅដល់ការអភិវឌ្ឍភាសា, អភិវឌ្ឍបញ្ញាស្មារតី, អភិវឌ្ឍផ្នែករាងកាយក៏ដូចជាការ អភិវឌ្ឍទៅលើជំនាញទន់ ឬជំនាញសតវត្សរ៍ទី២១ ដែលជាជំនាញដ៏សំខាន់មួយធ្វើឱ្យកុមារ មានភាពក្លាហាន មានទំនាក់ទំនង ចេះគិតបែបត្រិះរិះពិចារណា និងមានភាពច្នៃប្រឌិត។

ដោយឡែក ការដាក់បញ្ចូលភាសាបរទេសឱ្យកុមាររៀនចាប់ពីថ្នាក់មត្តេយ្យសិក្សា លោកស្រី សូនីតា បញ្ជាក់ថា ផ្អែកតាមការស្រាវជ្រាវផ្នែកគរុកោសល្យ កុមារ មានទុនពិសេសនៅក្នុងការរៀនសូត្រភាសាបានល្អជាងមនុស្សធំ ដោយកុមារ អាចរៀនភាសាបានដល់ទៅ៣ ឬរហូតដល់៥ភាសាទៅតាមបរិយាកាស ដែលគេរស់នៅដោយមិនបានកំណត់ថា កុមារដាច់ខាតត្រូវរៀនតែមួយភាសា ឬក៏ពីរភាសា ដើម្បីឱ្យសមល្មមនោះទេ។

លោកឧកញ៉ា ប៉ិច បូឡែន អ្នកជំនាញអប់រំ និងជាអគ្គនាយកក្រុមហ៊ុនវេសឡាញ អេឌ្យូខេសិន គ្រុប មានប្រសាសន៍ថា តាមរបត់នៃសេដ្ឋកិច្ចសង្គមប្រទេសជាច្រើននៅក្នុងតំបន់បានងាកមកប្រើប្រាស់ភាសាចិនក្នុងការប្រាស្រ័យទាក់ទងការងារ ក៏ដូចជា ការធ្វើទំនាក់ទំនងពាណិជ្ជកម្មជាដើម ។ ដោយ​មើលឃើញពីសារៈសំខាន់នេះ បណ្តាញសាលារៀនវ៉េស្ទឡាញន៍ ពិសេសសាលារៀនវ៉េស្ទឡាញន៍ សាខាក្រុងតាខ្មៅ នៅក្នុងឆ្នាំសិក្សាថ្មីនេះ កុមារដែល ចូលរៀនចាប់ពីថ្នាក់មត្តេយ្យនឹងទទួលបានចំណេះដឹងផ្នែកភាសាចំនួន៣ ដែល មានភាសាខ្មែរ ភាសាអង់គ្លេស និង ភាសាចិន ដែលជាទុនជួយដល់បុត្រធីតា របស់លោកអ្នកអាចប្រើប្រាស់នៅក្នុងការទំនាក់ទំនងជាសាកលនៅថ្ងៃអនាគត ពោលគឺសិស្សដែលបញ្ចប់ការសិក្សានៅវ៉េស្ទឡាញន៍អាចប្រើប្រាស់ ភាសាអង់គ្លេសបានថ្នឹក ព្រមជាមួយភាសាចិន ដែលអាចធ្វើការប្រាស្រ័យទាក់ទងការងារបាន៕