ក្នុងឱកាសសម្ពោធដាក់ឱ្យ​ប្រើប្រាស់អគារសិក្សា អគារបណ្ណាល័យ អគារសយណដ្ឋាន និងសមិទ្ធផលថ្មីៗក្នុងវិស័យអប់រំខេត្តរតនគិរី សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានជំរុញឱ្យ​សិស្សា​នុសិស្ស​ប្រើប្រាស់បច្ចេកវិទ្យាទូរស័ព្ទឆ្លាតវៃ (ស្មាតហ្វូន) ដើម្បីបំពេញប្រយោជន៍ដល់ការ​សិក្សា​ ជំនួសឱ្យ​ការប្រើប្រាស់ដើម្បីតែការកម្សាន្ត។

សម្តេចនាយករដ្ឋមន្ត្រី បានសង្កត់ធ្ងន់ថា បច្ចេកវិទ្យាគឺជាឧបករណ៍មួយដ៏មានសក្តានុពលសម្រាប់ការស្រាវជ្រាវ និងអភិវឌ្ឍន៍ចំណេះដឹង ប៉ុន្តែប្រសិនបើប្រើខុសគោលបំណង វាអាចក្លាយជាឧបសគ្គដល់ការសិក្សា។ ក្នុងន័យនេះ សម្តេចបានផ្តល់អនុសាសន៍ឱ្យ​មានការចូលរួមពីគ្រួសារ និងស្ថាប័នអប់រំ ក្នុងការអប់រំដឹកនាំឱ្យ​សិស្សយល់ពីរបៀបប្រើប្រាស់បច្ចេកវិទ្យាឱ្យមានប្រសិទ្ធភាព។

“ឥឡូវប្អូនៗសិស្សានុសិស្សមានទូរស័ព្ទក្នុងដៃហើយ សូមប្រើឱ្យបានផល។ ទោះយ៉ាងណាក៏កុំភ្លេចឥរិយាបទល្អ មិនមែនចេះតែចំណេះដឹង ហើយច្រង៉េងច្រង៉ាង ធ្វើសកម្មភាពខូចអនាគត បំផ្លាញសង្គមមិនល្អទេ គឺត្រូវយកចិត្តទុកដាក់សិក្សារៀនសូត្រ”

លោកបណ្ឌិត ឈត ប៊ុនថង មន្ត្រីស្រាវជ្រាវផ្នែកទំនាក់ទំនង វប្បធម៌ អប់រំ និងទេសចរណ៍ នៃរាជបណ្ឌិត្យសភាកម្ពុជា មានប្រសាសន៍ថា តាមការសង្កេតផ្ទាល់ឃើញថា ក្មួយៗជាសិស្សានុសិស្សក្នុងពេលបច្ចុប្បន្នហាក់ប្រើប្រាស់ទូរស័ព្ទដៃសម្រាប់ការកម្សាន្តច្រើនជាងប្រើសម្រាប់ការសិក្សាស្រាវជ្រាវ។ នេះមិនមែនមានន័យថា សិស្សានុសិស្សមិនបានប្រើទូរស័ព្ទសម្រាប់សិក្សាទេ គ្រាន់តែការប្រើប្រាស់ទូរស័ព្ទដៃសម្រាប់សិក្សាការស្រាវជ្រាវនេះ មិនទាន់ដល់កម្រិតមួយសមស្រប។

មន្ត្រីស្រាវជ្រាវផ្នែកទំនាក់ទំនង វប្បធម៌ អប់រំ និងទេសចរណ៍ នៃរាជបណ្ឌិត្យសភាកម្ពុជា បន្ថែមថា ដើម្បីឱ្យសិស្សប្រើប្រាស់ទូរស័ព្ទឆ្លាតវៃសម្រាប់ការសិក្សាស្រាវជ្រាវឱ្យបានច្រើនជាងការកម្សាន្ត គឺ ទី១.មានការកំណត់ពីឪពុកម្ដាយក្នុងការប្រើប្រាស់សម្រាប់ការកម្សាន្ត ដូចជា លេងហ្គេម​ជាដើម, ទី២.សាលារៀនត្រូវមានវិន័យ មិនអនុញ្ញាតិឱ្យសិស្សានុសិស្សប្រើប្រាស់ទូរស័ព្ទដៃដោយសេរី មានន័យថា នៅក្នុងថ្នាក់រៀនគ្រូជាអ្នកកំណត់ការប្រើប្រាស់ទូរស័ព្ទដៃ ពេលណាអាចប្រើបាន និងពេលណាមិនអាចប្រើ។

លោកបណ្ឌិត ឈត ប៊ុនថង បន្ថែមទៀតថា ក្រសួងអប់រំ អាចពិចារណាផ្ដល់វគ្គសិក្សាខ្លី ឬផលិតវីដេអូបង្រៀនពីរបៀបប្រើប្រាស់ទូរស័ព្ទដៃឆ្លាតវៃ កម្មវិធីក្នុងទូរស័ព្ទដៃ ជាក់ស្ដែងដូច កម្មវិធី AI កម្មវិធី google បណ្ដាញសង្គមផ្សេងៗ ដែលមានការបង្រៀន និងតម្រង់ទិសពីអ្នកជំនាញ។ លោកបណ្ឌិតបន្តថា ប្រសិនបើគ្មានការតម្រង់ទិសបែបនេះទេ បញ្ហានេះមិនអាចដោះស្រាយ គឺសិស្សានុសិស្សនៅតែប្រើស្មាតហ្វូនសម្រាប់ការកម្សាន្ត លេងហ្គេមច្រើនជាងការរៀនសូត្រ ក្មេងខ្លះអាចញៀន ឬបាត់បង់ទំនាក់ទំនងជាមួយគ្រួសារ និងសង្គម៕