លោក ជក់ សុភា បច្ចុប្បន្នជាគ្រូបង្រៀននៃសាលារៀនជំនាន់ថ្មី វិទ្យាល័យព្រែកលៀប ស្ថិត​នៅ​ខណ្ឌជ្រោយចង្វារ រាជធានីភ្នំពេញ បានជាប់ជ័យលាភីលេខ១ «គ្រូបង្រៀនល្អ» ភាសាខ្មែរ ពានរង្វាន់សម្ដេចតេជោហ៊ុនសែន ឆ្នាំ២០២៣-២០២៤។

ម្ចាស់ជ័យលាភីរូបនេះ និយាយថា ការចូលរួមប្រកួតប្រជែង «គ្រូបង្រៀនល្អ» ពានរង្វាន់សម្ដេចតេជោហ៊ុនសែន ឆ្នាំ២០២៣-២០២៤ គឺលោកមានឆន្ទៈចង់ចូលរួមដោយផ្ទាល់ ព្រមទាំងមានការគាំទ្រជំរុញលើកទឹកចិត្តពីសំណាក់គណៈគ្រប់គ្រងសាលា និងមន្ទីរអប់រំ យុវជន និងកីឡា។

ដោយឡែកកត្តាដែលជំរុញឱ្យលោកអាចជាប់ជ័យលាភីគ្រូបង្រៀនល្អនេះ លោក ជក់ សុភា បញ្ជាក់ថា គឺដោយសារលោកបានគោរពទៅតាមលក្ខខណ្ឌ នៃការវាយតម្លៃរបស់គណៈកម្មការរៀបចំជ្រើសរើសគ្រូបង្រៀនល្អ។ ក្នុងនោះ លោកមានបទពិសោធន៍បង្រៀន៥ឆ្នាំ ដែលអាចមានសិទ្ធិចូលរួមប្រកួតប្រជែងនេះបាន។

គ្រូបង្រៀនថ្នាក់ទី១២ នៃសាលារៀនជំនាន់ថ្មី វិទ្យាល័យព្រែកលៀប រូបនេះ បន្ថែមថា ចំពោះការវាយតម្លៃក្នុងលក្ខខណ្ឌគ្រូបង្រៀនល្អនេះ គឺដំបូងបេក្ខជនត្រូវដាក់ពាក្យ បន្ទាប់មកមន្ទីរអប់រំ យុវជន និងកីឡា នឹងធ្វើការវាយតម្លៃតាមរយៈការត្រួតពិនិត្យការបង្រៀន ត្រួតពិនិត្យឯកសារ តាមរយៈការិយាល័យអធិការកិច្ច។ នៅពេលជាប់ថ្នាក់រាជធានីហើយ ត្រូវរៀបចំឯកសារ ស្លាយ (Slide) ទៅតាមសូចនាករនៃគ្រូបង្រៀន និងត្រូវបំពេញតាមលក្ខខណ្ឌដែលក្រសួងអប់រំបានកំណត់ ដោយភ្ជាប់វីដេអូសកម្មភាពបង្រៀន ផ្ញើទៅក្រសួងអប់រំ ដើម្បីធ្វើការជម្រុះបេក្ខជនមុនពេលទៅដល់វគ្គបញ្ចប់។

លោក ជក់ សុភា លើកឡើងថា នៅពេលបេក្ខជនបានជាប់នៅក្នុងចំណាត់ថ្នាក់១២នាក់ចុងក្រោយហើយ ក្រសួងអប់រំ គណៈកម្មការវាយតម្លៃគ្រូបង្រៀនល្អ នឹងចុះមកពិនិត្យគ្រូបង្រៀនទៅដល់សាលាតែម្ដង។ ក្នុងនោះក្រសួងនឹងពិនិត្យមើលការបង្រៀន វិធីសាស្រ្តបង្រៀន ពិនិត្យថ្នាក់រៀន សម្ភាសន៍គ្រូបង្រៀនផ្ទាល់ ក៏ដូចជាសម្ភាសន៍នាយកសាលា និងចំណាប់អារម្មណ៍សិស្សចំពោះការបង្រៀនរបស់គ្រូផងដែរ។

បើតាមលោក ជក់ សុភា ពាក្យថា «គ្រូបង្រៀនល្អ» ដែលមានការទទួលស្គាល់បែបនេះ មិនមែនគ្រប់គ្នាសុទ្ធតែទទួលបាននោះទេ មានន័យថា ទាល់តែមានការ​ខិតខំប្រឹងនៅក្នុងវិជ្ជាជីវៈមួយនេះទើបអាចទទួលបាន ហើយវាជាមោទនភាពមួយដែលគ្រូបង្រៀនចង់បានគ្រប់គ្នា។ លោក ជក់ សុភា បន្តថា លោកក៏មិននឹកស្មានដែរថា អាចទទួលបានជ័យលាភីលេខ១នេះឡើយ ពីព្រោះបេក្ខជន១២នាក់ចុងក្រោយ សុទ្ធតែមានសមត្ថភាពខ្លាំងពូកែតាមបណ្ដារាជធានី ខេត្តទាំង២៥។ “នៅពេលទទួលបានដំណឹងជាប់ជ័យលាភីនេះ ខ្ញុំមានអារម្មណ៍ថា សប្បាយរីករាយ រំភើបខ្លាំង និងជាមោទនភាពចំពោះអាជីពជាគ្រូបង្រៀនមួយនេះ”។

ក្នុងការបង្រៀនរយៈពេល៥ឆ្នាំកន្លងមកនេះ លោក ជក់ សុភា មិនដែលទម្លាក់ដៃចោលនោះទេ ពោលគឺលោកខិតខំប្រឹងប្រែងពីមួយថ្ងៃទៅមួយថ្ងៃ ក្នុងការបង្រៀនសិស្ស ដោយប្រើវិធីសាស្រ្តបង្រៀនថ្មីៗ ជួយសិស្សឱ្យទទួលលទ្ធផលសិក្សាល្អ និងជំនួបជាមួយអាណាព្យាបាលដើម្បីជួយបំពេញបន្ថែមចំណុចខ្វះខាតរបស់សិស្ស។

លោក ជក់ សុភា រៀបរាប់ទៀតថា ទម្រាំទទួលបានលទ្ធផលល្អនេះ លោកបានឆ្លងកាត់រឿងរ៉ាវលំបាកជាច្រើន និងមិនមែនជារឿងងាយស្រួលនោះឡើយ។ លោកបន្តថា ក្នុងនាមជាគ្រូបង្រៀន ត្រូវបង្រៀនសិស្សឱ្យទទួលបានទាំងចំណេះដឹង ទាំងសីលធម៌ក្នុងការរស់នៅជាពលរដ្ឋល្អ។ ទន្ទឹមគ្នានេះ ត្រូវរកវិធីសាស្រ្តបង្រៀនថ្មី ត្រូវចេះបច្ចេកវិទ្យាព័ត៌មាន (ICT) ភាពជាអ្នកដឹកនាំ ធ្វើយ៉ាងណាឱ្យសិស្សមានគំនិតច្នៃប្រតិដ្ឋបង្កើតថ្មី និងចូលរួមក្នុងកិច្ចការសង្គម។ ជាពិសេស ក្រៅពីការបង្រៀន គ្រូក៏ត្រូវមានបំណិនក្នុងការប្រាស័យទាក់ទងជាមួយអាណាព្យាបាលដែរ។

ម្ចាស់ពានរង្វាន់សម្ដេចហ៊ុនសែន រូបនេះ លើកឡើងទៀតថា បេសកកម្មរបស់គ្រូបង្រៀន គឺធ្វើឱ្យសិស្សក្លាយជាពលរដ្ឋល្អ ជាធនធានមនុស្សដ៏សំខាន់មួយសម្រាប់សង្គមជាតិ។ ជាក់ស្ដែងលទ្ធផលនៃការប្រឡងបាក់ឌុប រយៈពេល៤ឆ្នាំនៃការបង្រៀនអក្សរសាស្រ្តខ្មែររបស់លោក មិនមានសិស្សធ្លាក់សូម្បីម្នាក់ ហើយសិស្សភាគច្រើនទទួលបាននិទ្ទេស A និងB ដែលធ្វើឱ្យលោកមានមោទនភាពជាទីបំផុត។

បើតាម លោក ជក់ សុភា ដើម្បីជំនះការលំបាកក្នុងអាជីពជាគ្រូបង្រៀន គឺមានតែសេចក្ដីព្យាយាម អំណត់ រីករាយជាមួយការងារនេះ។ បើសិនយើងធ្វើការងារនេះ ដោយយកចិត្តទុកដាក់ នោះយើងនឹងទទួលផលមកវិញ គឺភាពជោគជ័យនៅថ្ងៃណាមួយមិនខាន។

នៅរយៈពេល៥ឆ្នាំទៅ១០ឆ្នាំខាងមុខ លោក ជក់ សុភា រំពឹងថា សិស្សានុសិស្សដែលលោកបានបង្ហាត់បង្រៀន នឹងក្លាយជាពលរដ្ឋល្អក្នុងសង្គម ដែលមានទាំងចំណេះដឹង សីលធម៌ អាចរស់នៅជាមួយគ្នាប្រកបដោយសេចក្ដីសុខ និងចូលរួមកសាងប្រទេសជាតិឱ្យមានភាពរីកចម្រើន។

គួរជម្រាបជូនថា លោក ជក់ សុភា ចាប់ផ្ដើមធ្វើជាគ្រូបង្រៀនតាំងពីឆ្នាំ២០២០ ព្រមទាំងធ្លាប់បានជាប់ជ័យលាភីក្នុងការប្រកួតស្នាដៃជាច្រើន រួមមាន កំណាព្យខ្លី ពានរង្វាន់ពុទ្ធសាសនបណ្ឌិត្យ ចំណាត់ថ្នាក់លេខ២ ឆ្នាំ២០២០, អត្ថបទសិក្សាកថា «រឿងរាមកេរ្តិ៍» ជ័យលាភីលេខ១ ក្នុងទិវាជាតិអំណានលើកទី៦ ឆ្នាំ២០២១, អត្ថបទសិក្សាកថា «តម្លៃអក្សរសិល្ប៍ពុទ្ធនិយមក្រោយសម័យអង្គរ» ជ័យលាភីលេខ១ ក្នុងទិវាជាតិអំណានលើកទី៧ ឆ្នាំ២០២២ និងអត្ថបទសិក្សាកថា ជ័យលាភីលេខ៨ ក្នុងទិវាជាតិអំណានលើកទី៩ ឆ្នាំ២០២៤៕