មិនមែនជារឿងងាយស្រួលប៉ុន្មានឡើយ សម្រាប់អ្នកអាណាព្យាបាល​ក្នុងសម័យឌីជីថល ក្នុងការទាញកូនកុំឱ្យប្រើប្រាស់អេក្រង់គ្រឿងអេឡិចត្រូនិចក្នុងបរិមាណដ៏លើសលប់ មិនថា ទូរស័ព្ទ កុំព្យូទ័រ និងទូរទស្សន៍ជាដើម។ តែយ៉ាងណា បើតាមគេហទំព័រ wealthofgeeks គេបានបង្ហាញគន្លឹះបីចំណុចដើម្បីធ្វើឱ្យកុមារចាកចេញពីអេក្រង់គ្រឿងអេឡិចត្រូនិច និងផ្តោតលើការរស់នៅក្នុងពិភព នៃខ្លួនឯង។

១. កំណត់ពេលឱ្យជាក់លាក់ចំពោះឧបករណ៍នីមួយៗ ៖ មុននឹងប្រគល់គ្រឿងអេឡិចត្រូនិចទៅកាន់កុមារ អ្នក​អាណាព្យាបាលត្រូវមានសមត្ថភាពដឹងអំពីកម្រិតនៃការប្រើប្រាស់ឧបរណ៍ទាំងនោះ ដើម្បីបង្កើនភាពងាយស្រួលក្នុងការកំណត់រយៈពេលនៃការប្រើប្រាស់ឱ្យមានប្រសិទ្ធភាព។ អ្នក​អាណាព្យាបាល ត្រូវមានការកំណត់ពេលឱ្យបានច្បាស់ និងដាក់វិន័យឱ្យហ្មត់ចត់ មុននឹងអនុញ្ញាតិឱ្យកុមារប្រើប្រាស់អេក្រង់ ដោយកំណត់ថា តើមួយថ្ងៃ ឬមួយសប្តាហ៍ កុមារអាចប្រើអេក្រង់បានប៉ុន្មានម៉ោងដែលមិនជះឥទ្ធិពលអាក្រក់ខ្លាំងទៅកាន់ខួរក្បាលក្មេងៗ ។ ចំពោះការកំណត់ គឺ មានទាំងគ្រឿងអេឡិចត្រូនិច និងកម្មវិធីដែលមាននៅក្នុងឧបករណ៍ទាំងនោះ។

២. លើកទឹចិត្តកុមារឱ្យមានសកម្មភាពនៅខាងក្រៅ ៖ បន្ទាប់ពីការកំណត់រយៈពេលនៃការប្រើប្រាស់អេក្រង់គ្រឿងអេឡិចត្រូនិចហើយ អ្វីដែលគួរអនុវត្តន៍បន្ទាប់ គឺលើកទឹកចិត្ត និងនាំកុមារឱ្យចេញទៅក្រៅ ឬកម្សាន្តនៅខាងក្រៅ ដើម្បីបង្កើនតុល្យភាពនៃការចំណាយពេលរបស់កុមារ។ បន្ស៉ាំ ឬនាំកុមារទៅកន្លែងដែលមានធម្មជាតិ ទៅលេងកីឡា និងសកម្មភាពផ្សេងៗទៀតស្ថិតក្នុងចំណាប់អារម្មណ៍របស់កុមារ ដែលសកម្មភាពទាំងនេះជាចំណែកជួយបង្កើនបទពិសោធន៍ល្អៗក្នុងវ័យកុមារភាព និងលើកកម្ពស់សុខភាពផ្លូវចិត្តទៅកាន់កុមារ។

៣. បង្ហាញភាពជាគំរូ ​៖ អ្នក​អាណាព្យាបាល ក៏ត្រូវបង្កើ​តនូវគំរូភាព តាមរយៈការបណ្តុះនូវបរិយាកាសដែលមានផាសុកភាព និងការកំណត់ពេលក្នុងការប្រើប្រាស់អេក្រង់គ្រឿងអេឡិចត្រូនិចចំពោះខ្លួនឯងដែរ។ ពីព្រោះជាទូទៅកុមារ រៀនតាមរយៈការសង្កេត ដូច្នេះការធ្វើជាគំរូភាព គឺជារបៀបណែនាំដ៏មានឥទ្ធិពលមួយ៕