សាលារៀនជំនាន់ថ្មី (NGS) ទាំងអស់ស្ថិតនៅក្នុងកំណែទម្រង់កម្មវិធីអប់រំរបស់ក្រសួងអប់រំ យុវជន និងកីឡា ។ សិស្សានុសិស្សដែលបន្តការសិក្សានៅទីនេះ ភាគច្រើនអនុវត្តទម្លាប់រៀន និងរៀនស្រាវជ្រាវដោយខ្លួនឯង ច្រើនជាងរង់ចាំទទួលចំណេះដឹងពីគ្រូបង្រៀន ។ កម្មវិធីសិក្សារបស់សាលារៀនជំនាន់ថ្មីតម្រូវឱ្យសិស្សអនុវត្តទ្រឹស្តីចេញពីមេរៀន ដើម្បីឆ្លើយតបនឹងតម្រូវការជីវភាពរស់នៅជាក់ស្តែង ។ ការអនុវត្តវិធីសាស្ត្រស្រាវជ្រាវជារបៀបសិក្សាមួយដែលជួយពន្លឿនគុណភាពសិក្សាសិស្សឱ្យកាន់តែប្រសើរ ។ នេះបើតាមការលើកឡើងរបស់លោក លោក សម្យ កំសាន្ត នាយករងវិទ្យាល័យព្រះស៊ីសុវត្តិ ទទួលបន្ទុកសាលារៀនជំនាន់ថ្មី ។

ក្រៅពីបង្កើនម៉ោងសិក្សាពេញមួយថ្ងៃ ព្រឹកនិងល្ងាចសម្រាប់សិស្សានុសិស្ស សាលារៀនជំនាន់ថ្មី នៃវិទ្យាល័យព្រះស៊ីសុវត្ថិ បានរៀបចំកម្មវិធីសិក្សាមានស្តង់ដាខុសប្លែកពីបណ្តាគ្រឹះស្ថានសិក្សាសាធារណៈផ្សេងៗ សម្រាប់កម្រិតអប់រំវិទ្យាល័យទូទាំងប្រទេសកម្ពុជា ។ កំណែទម្រង់កម្មវិធីសិក្សាថ្មីៗផ្តោតលើការអប់រំផ្នែកវិទ្យាសាស្ត្រជាចម្បងនេះ អាចនឹងក្លាយសាលារៀនគំរូមួយនៅកម្ពុជា ។

កូនសិស្សដែលមកទីនេះ ពួកគេមិនមែនរៀនផ្តោតលើការត្រៀមប្រឡងនោះទេ ពួកគេត្រៀមប្រឡងជារឿងមួយ តែរៀនបែបស្រាវជ្រាវ បែបបង្កើតស្នាដៃថ្មីៗ ដោយសារពួកគេនៅទីនេះមានការកត់ត្រាស្នាដៃ ! អញ្ចឹងកាលណាពួកគេមានស្នាដៃច្រើន ក្រោយពីប្រឡងចប់ថ្នាក់ទី១២ ពួកគេអាចយកស្នាដៃទាំងនោះទៅស្នើសុំអាហារូបករណ៍ផ្សេងៗបានដោយងាយ

លោក សម្យ កំសាន្ត នាយករងវិទ្យាល័យព្រះស៊ីសុវត្ថិ ទទួលបន្ទុកសាលារៀនជំនាន់ថ្មី

ទន្ទឹមគ្នានេះ លោក សម្យ កំសាន្ត បានបញ្ជាក់បន្ថែមថា សាលារៀនជំនាន់ថ្មីនៃវិទ្យាល័យព្រះស៊ីសុវត្ថិ ផ្តល់ឱកាសនិងលទ្ធភាពឱ្យសិស្សានុសិស្សស្រាវជ្រាវ ព្រមទាំងអនុវត្តបំណិនរបស់ខ្លួនដោយឯករាជ្យ ។ តែយ៉ាងណាសេរីភាពនៃការសិក្សានេះ ត្រូវស្ថិតនៅក្រោមការគ្រប់គ្រងដោយផ្ទាល់ពីសាលារៀន ។

សារៈសំខាន់នៃការបង្កើតគំនិតស្រាវជ្រាវជួយឱ្យសិស្សមានស្មារតីទទួលខុសត្រូវ បង្កើតឱ្យមានការប្រកួតប្រជែង ព្រមទាំងកសាងសមត្ថភាពសិក្សាបានលឿនរហ័ស ។ កាលណាសិស្សមានគំនិតបង្កើតកិច្ចការស្រាវជ្រាវ នោះសិស្សពេញចិត្តលទ្ធផលសិក្សា និងពេញចិត្តការសិក្សារបស់ពួកគេ ។ ចំណែកគ្រូបង្រៀននៅសាលារៀនជំនាន់ថ្មី ត្រូវបង្កើនសមត្ថភាពស្រាវជ្រាវគំនិតអប់រំថ្មីៗជាប្រចាំ ស្វែងរកវិធីសាស្ត្របង្រៀនប្រកបដោយប្រសិទ្ធភាព ដើម្បីផ្តល់ជំនួយដល់ការសិក្សារបស់សិស្ស ។

គួរបញ្ជាក់ថា សម្រាប់លទ្ធផលចេញពីការអប់រំខាងលើ បើតាមការបញ្ជាក់របស់លោក សម្យ កំសាន្ត បានឱ្យដឹងថា នៅឆ្នាំសិក្សា២០២២-២០២៣ សិស្សសាលារៀនជំនាន់ថ្មី នៃវិទ្យាល័យព្រះស៊ីសុវត្តិ បានទទួលមេដាយមាស និងមេដាយជ័យលាភីប្រកួតកម្មវិធីផ្សេងៗទាំងជាតិ និងអន្តរជាតិប្រមាណជាង ៣៥០ – ៣៧០ គ្រឿង ។ នៅដំណាក់កាលនៃការរីករាលដាលជំងឺកូវីដ-១៩ សិស្សសាលារៀនជំនាន់ថ្មី នៃវិទ្យាល័យព្រះស៊ីសុវត្ថិ អាចស្វែងរកមេដាយជ័យលាភីពីការប្រកួតប្រជែងនានា បានរវាង ១៥០គ្រឿងក្នុងមួយឆ្នាំ ៕