ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សម្រាប់ឪពុកម្តាយជាច្រើន ការវាយកូនដោយរំពាត់អាចជាវិធីលឿនបំផុត និងមានប្រសិទ្ធភាពក្នុងការប្តូរអាកប្បកិរិយារបស់ក្មេងបានភ្លាមៗ។ ប៉ុន្តែការសិក្សាបានបង្ហាញថា ការវាយកូន ឬដាក់ទណ្ឌកម្មលើរាងកាយអាចមានផលវិបាករយៈពេលវែងសម្រាប់កុមារ ។
នៅក្នុងអត្ថបទនេះ យើងនឹងបង្ហាញពីវិធីវិជ្ជមានចំនួន ៧ ដែលណែនាំដោយ Verywell Farmily ក្នុងការដាក់វិន័យកូន ជំនួសឱ្យការវាយដោយរំពាត់ ៖
១. ការកំណត់នាទី ឬ Time Out ៖ Time out គឺជាការពិន័យកំណត់នាទីឱ្យកូនឈរ ឬអង្គុយនៅកន្លែងណាមួយដែលស្ងប់ស្ងាត់តែម្នាក់ឯង ប៉ុន្តែមានសុវត្ថិភាព។ អ្នកអាចកំណត់នាទីទៅតាមវ័យរបស់កូន ឧទាហរណ៍ ១នាទីសម្រាប់ក្មេង ១ខួប។ បន្ទាប់មកនៅពេលចប់ Time out អ្នកអាចចាប់ផ្តើមនិយាយជាមួយកូនពីរឿងរ៉ាវដែលកើតឡើង និងការរំពឹងទុករបស់អ្នកចំពោះកូននៅពេលក្រោយ។ វិធីនេះ ផ្តល់ពេលវេលាឱ្យក្មេងអាចត្រជាក់ចិត្តបន្តិច រួចស្គាល់ថា ទង្វើណាដែលធ្វើទៅខុស។
២. ដកហូតរបស់ ឬ Losing Privileges ៖ នៅពេលពួកគេធ្វើអ្វីខុស ឬមិនស្តាប់បង្គាប់ អ្នកអាចដកហូតរបស់ដែលកូនចូលចិត្ត។ រយៈពេលដកហូតអាចត្រឹម ១ថ្ងៃគឺគ្រប់គ្រាន់ហើយ ។ ប៉ុន្តែត្រូវប្រាប់កូនថា របស់នោះមិនមែនដកហូតរហូតទេ តែនឹងប្រគល់ឱ្យគាត់វិញ។ គោលដៅមិនមែនដាក់ទណ្ឌកម្មឱ្យកូនត្រូវតែចុះចូលនឹងអ្នកទេ ប៉ុន្តែជួយពួកគេរៀនចេះជ្រើសរើសការសម្រេចដ៏ល្អនៅថ្ងៃអនាគត។
៣. មិនអើពើចំពោះអាកប្បកិរិយាមិនសមរម្យ ៖ វិធីនេះមានប្រសិទ្ធភាពខ្លាំងជាងវាយកូនទៀត ។ មិនអើពើនេះ មិនមែនមិនខ្វល់ពេលកូនកំពុងធ្វើរឿងគ្រោះថ្នាក់នោះទេ ប៉ុន្តែត្រូវប្រើពេលកូនធ្វើខុសហើយ តែចង់បានការចាប់អារម្មណ៍ពីអ្នក។ ឧទាហរណ៍ កូនចង់បានរបស់អ្វីមួយ តែស្រែកយំ រករឿង ឬត្អូញត្អែរ ដើម្បីយកឱ្យបាន ដូចនេះ វិធីទប់ទល់គឺមិនឆ្លើយតប ធ្វើមើលមិនឃើញ មិនលឺ រហូតដល់កូនមកនិយាយជាមួយអ្នកតាមសម្រួល មានអាកប្បកិរិយាល្អ ទើបអ្នកឆ្លើយតបជាមួយកូន ។ ទម្លាប់បែបនេះ ធ្វើឱ្យកូនដឹងថា ការនិយាយស្តី និងមានអាកប្បកិរិយាល្អ គឺជាផ្លូវល្អបំផុត ដើម្បីសម្រេចអ្វីដែលគេចង់បាន។
៤. លទ្ធផលនៅតាមទង្វើជាក់ស្តែង ៖ ពិន័យនេះ គឺបង្កើតឡើងដោយឪពុកម្តាយ នៅពេលកូនមិនស្តាប់បង្គាប់។ ឧទាហរណ៍ ៖ បើកូនមិនញ៉ាំអាហារពេលល្ងាច កុំឱ្យកូនញ៉ាំចំណីពេលយប់ ។ ឬប្រសិនកូនមិនព្រមរើសឡានទេ កុំឱ្យពួកគេលេងឡាននោះមួយថ្ងៃ។ ឪពុកម្តាយត្រូវឱ្យកូនដឹងពីលទ្ធផលភ្លាមៗចំពោះកំហុសរបស់គេ ដើម្បីឱ្យក្មេងដឹងថា ការបង្កើតកំហុសរបស់គេ នឹងមានផលវិបាកតាមក្រោយ។
៥. លទ្ធផលទៅតាមទង្វើបែបធម្មជាតិ ៖ បណ្តោយកូនឱ្យធ្វើតាមចិត្ត ដើម្បីឱ្យកូនរៀនពីមេរៀនជីវិត និងដឹងពីកំហុសខ្លួនឯង។ ប៉ុន្តែឪពុកម្តាយត្រូវមើលថា រឿងដែលកូនធ្វើ មិនមែនជារឿងគ្រោះថ្នាក់។ ឧទាហរណ៍ កូនមិនព្រមពាក់អាវក្រៅ កុំបង្ខំ ឱ្យកូនស្គាល់ពីភាពត្រជាក់ដែលអត់មានអាវក្រៅចុះ។ កូនមិនព្រមយករបស់លេងទុកក្នុងផ្ទះ ទុកឱ្យរបស់នោះសើម ឬប្រឡាក់ហ្នឹងចុះ កុំយកទុកឱ្យកូន ដូចនេះ បើកូនចង់លេងរបស់ហ្នឹងទៀត ឱ្យកូនសម្អាតខ្លួនឯង។
៦. ឱ្យរង្វាន់ពេលកូនមានអាកប្បកិរិយាល្អ ៖ ប្រសិនបើកូនអ្នកឈ្លោះជាមួយបងប្អូនញឹកញាប់ ចូររៀបចំការផ្តល់រង្វាន់ ដើម្បីលើកទឹកចិត្តពួកគេឱ្យចុះសម្រុងគ្នា។ ឧទាហរណ៍ ថ្ងៃនេះពួកគេមិនឈ្លោះគ្នា ពួកគេនឹងបានស្ករគ្រាប់ម្នាក់មួយ ។ ការធ្វើបែបនេះ ធ្វើឱ្យកូនផ្តោតការធ្វើល្អ ដើម្បីបានរង្វាន់ជាជាងធ្វើរឿងមិនល្អ។
៧. សរសើរសម្រាប់ការធ្វើបានល្អ ៖ ពេលឃើញកូនថ្ងៃនេះលេងរួច ចេះរៀបចំរបស់លេងទុក អ្នកត្រូវសរសើរកូនថា ធ្វើបានល្អ ។ ឬពេលនៅក្នុងបន្ទប់មួយមានក្មេងច្រើន អ្នកសរសើរក្មេងណាដែលធ្វើបានល្អ មានអាកប្បកិរិយាល្អ ដើម្បីជាគំរូឱ្យក្មេងដទៃទៀត។ ក្មេងដ៏ទៃនឹងចង់ធ្វើជាក្មេងល្អ ដើម្បីបានការសរសើរដែរ៕
