ការជ្រើសរើសជំនាញ ឬសាកលវិទ្យាល័យ ដើម្បីបន្ត​ការ​សិក្សា​ក្រោយ​បញ្ចប់ថ្នាក់មធ្យមសិក្សាអាច​ជារឿង​លំបាក​សម្រាប់យុវជន​មួយ​ចំនួនធំ ដោយថា ការ​ជ្រើសរើសនេះ វាពាក់ព័ន្ធទៅ​នឹង​អាជីព​ដែល​នឹង​ត្រូវ​ធ្វើ​នាថ្ងៃអនាគត ។ សម្រាប់​ កញ្ញា ឡៅ ដានេ បច្ចុប្បន្ន​កំពុងតែបន្តការសិក្សា​នៅ​ប្រទេស​អូស្រ្តាលី លើជំនាញប្រព័ន្ធផ្សព្វផ្សាយ និងសារគមនាគមន៍ បាននិយាយថា ដើម្បីជ្រើសរើសជំនាញ ឬសាកលវិទ្យាល័យឱ្យ​ត្រឹម​ត្រូវ ឈាន​ទៅ​ទទួលបានអាជីព​មួយ​ដែល​ខ្លួន​ពេញចិត្ត ការ​ស្គាល់ខ្លួន​ឯង និងស្វែងរក​ព័ត៌មាន​ពីជំនាញ និង​សាកលវិទ្យាល័យ​គឺជា​រឿង​ដ៏សំខាន់។

កញ្ញា ដានេ លើកឡើងថា សិស្សដែលបញ្ចប់ការសិក្សាមធ្យមសិក្សាទុតិយភូមិនាពេល​បច្ចុប្បន្ន​ហាក់សំបូរដោយព័ត៌មានច្រើនជាងមុន ព្រោះតែ​ភាពរីកចម្រើន នៃ​សង្គម​របស់យើងបច្ចុប្បន្ន ។ បើងាកទៅមើលស្ថានភាពនាងកាលពីប្រមាណ៧ឆ្នាំមុនវិញ ពុំ​មានបច្ចេកវិទ្យា ឬទូរស័ព្ទស្មាតហ្វូនប្រើប្រាស់ ការ​ជ្រើសជំនាញរៀនគឺហាក់ពិបាកបន្តិច ដោយ​ កញ្ញា ដានេ ត្រូវស្វះស្វែងមកសាកសួរព័ត៌មានដោយផ្ទាល់នៅតាមបណ្តាសាកលវិទ្យាល័យក្នុងរាជធានីភ្នំពេញ ខណៈនាងមិនមានសូម្បីសាច់ញាតិ ឬអ្នកស្គាល់គ្នាណាឡើយ។ យ៉ាងណាមិញ មិនថាស្ថិតក្នុងស្ថានភាពបែបណានោះទេ កញ្ញា ដានេ មានផ្នត់គំនិតថា ការទទួលបានព័ត៌មានពិត ជំរុញឱ្យការសម្រេចចិត្តមានភាពល្អប្រសើរទៅតាមនោះដែរ។

កញ្ញា ឡៅ ដានេ

“ខ្ញុំសូមឱ្យអ្នកទាំងអស់គ្នាឱ្យតម្លៃខ្ពស់ទៅលើព័ត៌មាន ជាពិសេសសិស្សានុសិស្សដែលបញ្ចប់ថ្នាក់ទី១២ និងស្វែងរកមុខជំនាញដើម្បីបន្តសិក្សា”

កញ្ញា ដានេ រំលឹកថា គ្រានោះ នៅ​ពេលដែលទៅសុំយោបល់ និងសាកសួរព័ត៌មាននៅសាកលវិទ្យាល័យ នាងមិនបានដឹងថាខ្លួនឯងចង់រៀនអ្វីនៅឡើយទេ រួចក៏បង្ហាញប្រាប់នូវភាពស្រពេចស្រពិលទាំងនោះទៅកាន់អ្នកផ្តល់ព័ត៌មាននៅតាមសាកលវិទ្យាល័យដែល ដានេ គ្រោងនឹងចូលសិក្សា។ ការប្រាប់ទៅកាន់អ្នកប្រឹក្សាដោយក្ដីស្មោះត្រង់បែបនេះ គឺដើម្បីទទួលបានការបង្ហាញផ្លូវដ៏ត្រឹមត្រូវមួយ។

កញ្ញា ឡៅ ដានេ

“ខ្ញុំយល់ថា ការប្រាប់ពីចំណេះបច្ចុប្បន្ន ទៅកាន់អ្នកប្រឹក្សាព័ត៌មាន មុនពេលសម្រេចចិត្តសិក្សា មិនមែនជាការទម្លាយនូវ​ចំណុចខ្សោយទេ ប៉ុន្តែជាការស្វែររកព័តមានដ៏ត្រឹមត្រូវមួយដើម្បីបំពេញបន្ថែម“

ដានេ បន្តថា ពេលទៅប្រឹក្សានៅសាកលវិទ្យាល័យ នាងបានប្រាប់គេថា នាងចូលចិត្តនិយាយ ប៉ុន្តែមិនទាន់មានភាពក្លាហានគ្រប់គ្រាន់នៅឡើយ ។ មួយវិញទៀតនាងបានរកឃើញថា ឱ្យតែមានប្រភេទការងារដែលនិយាយចែករំលែក នាងហាក់រីករាយនឹងភារកិច្ចទាំងនោះ។ បន្ទាប់ពីប្រាប់នូវ​អ្វីដែលចូលចិត្តរួចហើយ ដានេ សួរទៅកាន់អ្នកផ្តល់ព័ត៌មានថា តើលក្ខណៈសម្បត្តិរបស់នាង​បែបនេះ គួរតែរៀនមុខវិជ្ជាអ្វី? តាមរយៈការអនុវត្តន៍ និងការសាកសួរបែបនេះហើយ ទើបធ្វើឱ្យ ដានេ ពេញចិត្តនឹងអ្វីដែលនាងកំពុងធ្វើបច្ចុប្បន្ន។

កញ្ញា ឡៅ ដានេ

“ខ្ញុំនៅតែយល់ថាព័ត៌មានសំខាន់ខ្លាំងមែនទែន ហើយក្តាប់ព័ត៌មានឱ្យបាន កុំធ្វើការសម្រេចចិត្តដោយស្មាន។ ទាំងនេះជាវិធីសាស្រ្ត ដែលខ្ញុំដើរមក ហេតុដូច្នេះហើយបានជាខ្ញុំជ្រើសរើសមុខជំនាញដែលវាត្រូវនឹងសមត្ថភាពដែលខ្ញុំមាន”

កញ្ញា ដានេ បន្ថែមថា កន្លងមកនាងបានសង្កេតឃើញថា មាននិស្សិតមួយចំនួនបានផ្លាស់ប្តូរជំនាញសិក្សា ជាពិសេសនៅឆ្នាំទី១ និងទី២ គឺដោយហេតុមានការប៉ានស្មាន មិនបានស្វែងរកព័ត៌មានឱ្យបានច្បាស់លាស់ ហើយមួយទៀតនៅមានភាពខ្មាសអៀនអំពីការប្រាប់នូវភាពខ្វះចន្លោះ ពេលដែលទៅសាកសួរព័ត៌មាន។ ការមិនបានបង្ហាញពីសក្ដានុពល ឬភាពពូកែដែលខ្លួនមានទាំងនេះហើយ គឺជាកត្តា ធ្វើឱ្យបង្កើតនូវ​ភាពស្ដាយក្រោយពេលដែលសម្រេចចិត្ត។

ជាចុងក្រោយ កញ្ញាដានេ នៅតែអះអាងថា ការស្វែងរកឱ្យឃើញនៅភាពខ្លាំងខ្លួនឯង និងព័ត៌មានពិត គឺជាចំណែកសំខាន់មុនពេលសម្រេចចិត្តចូលរៀននៅសាកលវិទ្យាល័យ៕