ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
យោងតាមទិន្នន័យកម្លាំងពលកម្មក្នុងឆ្នាំ២០២៤ បានបង្ហាញថា កម្លាំងពលកម្មក្នុងវិស័យឧស្សាហកម្ម កំពុងកើនឡើងពី៨,២% មកដល់៣០,៥% ខណៈកម្លាំងពលកម្មក្នុងវិស័យកសិកម្មកំពុងធ្លាក់ចុះ ពី៧១,៨% មកដល់ ២៩%។ ក្នុងពិធីបិទសន្និបាតក្រសួងការងារកាលពីចុងសប្តាហ៍នេះ ឯកឧត្តម ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា លទ្ធផលទាំងនេះ បង្ហាញពីការបោះជំហានចូលក្នុងអភិក្រមឧស្សាហូបនីយកម្ម ហើយវាគឺជាលើកទីមួយក្នុងប្រវត្តិសាស្រ្តរបស់កម្ពុជា។
ឯកឧត្តម ហង់ជួន ណារ៉ុន មានប្រសាសន៍ថា កំណើនខ្ពស់នៃសេដ្ឋកិច្ច ដែលបន្តជាប់គ្នារយៈពេលជាង២ទសវត្សរ៍ បានចូលរួមដំឡើងកម្រិត និងពិពិធកម្មរចនាសម្ព័ន្ធសេដ្ឋកិច្ចកម្ពុជា ពីម៉ូដែលពឹងផ្អែកលើកសិកម្មប្រពៃណី ទៅកាន់ម៉ូដែលសេដ្ឋកិច្ច ដែលពឹងផ្អែកកាន់តែច្រើនទៅលើវិស័យឧស្សាហកម្ម កសិកម្មវៃឆ្លាត និងសេវាកម្ម ដែលមានតម្លៃបន្ថែមកាន់តែខ្ពស់។ ក្នុងន័យនេះ សមាហរណកម្មទៅក្នុងច្រវាក់ផលិតកម្ម និងអ្នកផ្គត់ផ្គង់ក្នុងតំបន់ និងសកល កាន់តែស៊ីជម្រៅ និងប្រទាក់ក្រឡាកាន់តែខ្លាំង ហើយរយៈពេល២ឆ្នាំចុងក្រោយនេះ រចនាសម្ព័ន្ធសេដ្ឋកិច្ចរបស់ប្រទេសកម្ពុជា បានធ្វើពិពិធកម្មចេញពីការពឹងផ្អែកចម្បងលើវិស័យកសិកម្ម មកពឹងផ្អែកលើវិស័យឧស្សាហកម្មជាចម្បងវិញ។
បើតាមឯកឧត្តមឧបនាយករដ្ឋមន្រ្តី ក្នុងឆ្នាំ២០២៣ ផ.ស.ស. សរុបរបស់កម្ពុជា ត្រូវបានរួមចំណែកយ៉ាងរឹងមាំពីវិស័យឧស្សាហកម្មក្នុងសមាមាត្រ ៣៨,៧% ចំណែកឯវិស័យសេវាកម្ម និងកសិកម្ម មានសមាមាត្រ ៣៧,៨% និង២៣,៦% នៃ ផ.ស.ស. សរុប។ នៅក្នុងអភិក្រមស្របគ្នានេះ រចនាសម្ព័ន្ធកម្លាំងពលកម្មកម្ពុជា ទទួលបានវឌ្ឍនភាពគួរឱ្យកត់សម្គាល់ ពោលគឺកំណើនកម្លាំងពលកម្មសម្រាប់វិស័យឧស្សាហកម្ម បានកើនពី ៨,២% ក្នុងឆ្នាំ២០០០ ដល់៣០,៥% ក្នុងឆ្នាំ២០២៤, កម្លាំងពលកម្មក្នុងវិស័យសេវាកម្ម មានសមាមាត្រ ២០%ក្នុងឆ្នាំ២០០០ កើនដល់ ៤១,៨% ក្នុងឆ្នាំ២០២៤ រីឯកម្លាំងពលកម្មវិស័យកសិកម្ម បានថយចុះពី ៧១,៨% មកដល់ ២៩%។
ឯកឧត្តម ហង់ជួន ណារ៉ុន មានប្រសាសន៍បញ្ជាក់ថា សមិទ្ធផលទាំងនេះ គឺជាលទ្ធផលនៃការអនុវត្តយ៉ាងសកម្ម និងដោយជោគជ័យនូវគោលនយោបាយ និងយុទ្ធសាស្រ្តអភិវឌ្ឍន៍សំខាន់ៗរបស់រាជរដ្ឋាភិបាល ដែលផ្តោតចម្បងលើការប្រើប្រាស់ភាពខ្លាំងក្នុងស្រុករបស់ខ្លួន ។ ក្នុងនោះរាជរដ្ឋាភិបាលបានផ្តល់អាទិភាពដល់ការអភិវឌ្ឍឧស្សាហកម្មអតិពលកម្ម ដែលជាមូលដ្ឋានគ្រឹះ នៃការចាប់ផ្តើមឡើងជណ្តើរឧស្សាហូបនីយកម្ម។
ជាមួយគ្នានេះ ក្រសួងការងារ និងបណ្តុះបណ្តាលវិជ្ជាជីវៈ តែងដើរតួយ៉ាងសំខាន់បំពេញតួនាទីរបស់រដ្ឋ (Role of the State) ក្នុងការជំរុញកំណើនអនុគមន៍ផលិតកម្ម តាមរយៈការជួយជ្រោមជ្រែងវិស័យឯកជនក្នុងការផ្គូផ្គង់កម្លាំងពលកម្ម ការផ្គត់ផ្គង់កម្លាំងពលកម្មជំនាញ និងការសម្របសម្រួលស្ថាប័ន ដែលបានចូលរួមបង្កើនផលិតភាព រួមចំណែកដល់ឋាមវន្តភាពនាំចេញ និងស្ថិរភាពកំណើនការងារ។
គួរជំរាបជូនថា រាជរដ្ឋាភិបាលកម្ពុជាបានកំណត់ចក្ខុវិស័យប្រទេសកម្ពុជាក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសដែលមានចំណូលខ្ពស់នៅឆ្នាំ២០៥០។ ដើម្បីសម្រេចបាននូវចក្ខុវិស័យនេះ វិស័យឧស្សាហកម្ម បានដើរតួនាទីយ៉ាងសំខាន់ក្នុងការជំរុញកំណើន ការងារ និងប្រាក់ចំណូល និងការកាត់បន្ថយភាពក្រីក្រ។ ដូច្នេះដើម្បីគាំទ្រការធ្វើអន្តរកម្មនេះ ការលើកកម្ពស់ដល់យុវជនឱ្យទទួលបានជំនាញកម្រិតខ្ពស់ឆ្លើយតបទៅនឹងតម្រូវការគឺជារឿងចាំបាច់៕
