ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងអប់រំ យុវជន និងកីឡា នៅថ្ងៃនេះ (៣ កុម្ភៈ) បានប្រកាសពីការរៀបចំការប្រឡងសិស្សពូកែទូទាំងប្រទេសសម្រាប់ឆ្នាំសិក្សា២០២៤-២០២៥ ឡើងវិញ បន្ទាប់ពីប្រកាសផ្អាកការរៀបចំការប្រឡង ដោយលើកទឹកចិត្តឱ្យរាជធានី-ខេត្ត ម្ចាស់ការក្នុងការរៀបចំការប្រឡងនេះ កាលពីសប្តាហ៍កន្លងទៅ។
យោងតាមសេចក្ដីជូនដំណឹងចុះថ្ងៃទី៣ ខែកុម្ភៈ ឆ្នាំ២០២៥ របស់ក្រសួងអប់រំ យុវជន និងកីឡា បានឱ្យដឹងថា សម្រាប់ឆ្នាំសិក្សា២០២៤-២០២៥ ក្រសួងអប់រំ យុវជន និងកីឡា នឹងបន្តរៀបចំការប្រឡងជ្រើសរើសសិស្សពូកែទូទាំងប្រទេស ដោយរៀបចំដូចលំនាំ នៃការប្រឡងនៅឆ្នាំសិក្សា២០២៣-២០២៤។ ទន្ទឹមគ្នានេះ ក្រសួង នឹងចេញសេចក្ដីណែនាំបច្ចេកទេសសម្រាប់ការប្រឡងជ្រើសរើសសិស្សពូកែប្រចាំរាជធានី ខេត្ត និងទូទាំងប្រទេសសម្រាប់ឆ្នាំសិក្សា ២០២៤-២០២៥ក្នុងពេលឆាប់ៗនេះ។
លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា ការដែលក្រសួងអប់រំ យុវជន និងកីឡា សម្រេចបន្តរៀបចំការប្រឡងសិស្សពូកែទូទាំងប្រទេសឡើងវិញ ក៏ព្រោះទទួលបាននូវសំណើរ ក៏ដូចជាសំណូមពរពីប្អូនៗសិស្សានុសិស្សជាច្រើនឱ្យក្រសួងរៀបចំការប្រឡងសិស្សពូកែទូទាំងប្រទេស។ លោកជំទាវបន្តថា ក្រសួងបានខិតខំប្រឹងប្រែងនៅក្នុងការរៀបចំនៅលើកម្មវិធីនេះឡើងវិញ ហើយក្រសួងអប់រំ ក៏សូមលើកទឹកចិត្តប្អូនៗនៅក្នុងការបន្តការខិតខំប្រឹងប្រែងរៀនសូត្រចូលរួមប្រឡង ក៏ដូចជាត្រៀមលក្ខណៈនៅក្នុងការអាចចូលរួមការប្រកួតនៅក្នុងពេលអនាគត។ ក្រសួងអប់រំ នឹងរៀបចំការណែនាំបច្ចេកទេស ដើម្បីផ្សព្វផ្សាយទៅដល់មន្ទីរអប់រំរាជធានី ខេត្ត ក្រុងនានា អនុវត្តនៅក្នុងពេលឆាប់ៗខាងមុខ។
លោក សាន គីមស័ង អតីតសិស្សពូកែគណិតវិទ្យាទូទាំងប្រទេសឆ្នាំ២០១៩ នៃវិទ្យាល័យព្រះសីហនុ ខេត្តកំពង់ចាម បានប្រាប់ឱ្យដឹងថា រូបលោកផ្ទាល់មានអារម្មណ៍សប្បាយរីករាយ និងថ្លែងអំណរគុណដល់ក្រសួងអប់រំ យុវជន និងកីឡា ដែលសម្រេចបន្តរៀបចំការប្រឡងសិស្សពូកែទូទាំងប្រទេសឡើងវិញ។ លោកថា ការរៀបចំឱ្យមានការប្រឡងសិស្សពូកែនេះ នឹងជួយឱ្យសិស្សានុសិស្សជំនាន់ក្រោយខិតខំប្រឹងប្រែងរៀនសូត្រ ដើម្បីទទួលបានជ័យលាភីសិស្សពូកែ ក៏ដូចជាលើកទឹកចិត្តទៅដល់សិស្សពូកែដែលខិតខំបង្កើតមាតិកាប្រឡងសិស្សពូកែបានបញ្ចេញសមត្ថភាព៕
