ក្រសួងអប់រំ យុវជន និងកីឡា ប្រកាសជ្រើសរើសគ្រូបង្រៀនចូលរួមកម្មវិធីប្រកួតប្រជែងគ្រូបង្រៀនដែលមានគំនិតច្នៃប្រឌិតខ្ពស់ផ្នែកបច្ចេកវិទ្យាអប់រំ ឆ្នាំ២០២៥ (EdTech Teacher Competition 2025)។ កម្មវិធីនេះ ធ្វើឡើងស្របពេលរៀបចំសន្និសីទ និងពិព័រណ៍បច្ចេកវិទ្យាអប់រំកម្ពុជាលើកទី១ ក្រោមប្រធានបទ “មាគ៌ាកម្ពុជាឆ្ពោះទៅកាន់ការអប់រំឌីជីថល” ចាប់ពីថ្ងៃទី១៧ ដល់ថ្ងៃទី១៨ ខែកុម្ភៈ ឆ្នាំ២០២៥ នៅវិទ្យាស្ថានបច្ចេកវិទ្យាកម្ពុជា។

កម្មវិធីប្រកួតនេះ ផ្ដល់ឱកាសដល់គ្រូបង្រៀនដែលកំពុងបង្រៀននៅតាមគ្រឹះស្ថានសិក្សាចំណេះទូទៅសាធារណៈ ឬឯកជន ដែលមានគំនិតច្នៃប្រឌិតខ្ពស់ក្នុងការប្រើប្រាស់បច្ចេកវិទ្យាព័ត៌មានជំនួយដល់ការបង្រៀន និងរៀន។ ក្រោយឆ្លងកាត់ការវាយតម្លៃដោយក្រុមការងារបច្ចេកទេស បេក្ខជនជ័យលាភីចំនួន ៣រូប នឹងឡើងធ្វើបទបង្ហាញដោយផ្ទាល់នៅក្នុងសន្និសីទ និងពិព័រណ៍បច្ចេកវិទ្យាអប់រំកម្ពុជាលើកទី១។ ក្នុងនោះ បេក្ខជនជ័យលាភីលេខ១ នឹងទទួលបានប្រាក់រង្វាន់ចំនួន ៤លានរៀល, ជ័យលាភីលេខ២ នឹងទទួលបានប្រាក់រង្វាន់ចំនួន ៣លានរៀល និងជ័យលាភីលេខ៣ នឹងទទួលបានប្រាក់រង្វាន់ចំនួន ២លានរៀល។

សម្រាប់លក្ខខណ្ឌ នៃចូលរួមប្រកួត ៖ បេក្ខជនត្រូវតែជាជនជាតិខ្មែរ និងកំពុងស្នាក់នៅក្នុងប្រទេសកម្ពុជា, ជាគ្រូបង្រៀន ដែលកំពុងបង្រៀននៅតាមគ្រឹះស្ថានសិក្សាសាធារណៈ ឬឯកជនមានគំនិតច្នៃប្រឌិតខ្ពស់ក្នុងការប្រើប្រាស់បច្ចេកវិទ្យាគាំទ្រដល់ការបង្រៀន និងរៀន និងការសិក្សាស្រាវជ្រាវ, មានការគាំទ្រពីគណៈគ្រប់គ្រងសាលារៀនឱ្យចូលរួមកម្មវិធីប្រកួតប្រជែងនេះ។

ចំពោះការបំពេញពាក្យស្នើសុំ បេក្ខជនត្រូវបំពេញព័ត៌មានលម្អិតអំពីគំនិតច្នៃប្រឌិតក្នុងការប្រើប្រាស់បច្ចេកវិទ្យាអប់រំ, ថតវីដេអូខ្លី (រយៈពេល ៧នាទី) បរិយាយអំពី គំនិតច្នៃប្រឌិតក្នុងការប្រើប្រាស់បច្ចេកវិទ្យាបម្រើការបង្រៀននិងរៀន និងការសិក្សាស្រាវជ្រាវ។

បេក្ខជនជាគ្រូបង្រៀនដែលមានចំណាប់អារម្មណ៍ចង់ចូលរួមប្រកួតប្រជែង អាចដាក់ពាក្យស្នើសុំតាមតំណ៖ https://edtechcambodia.org/edtechteacher2025  ចាប់ពីថ្ងៃជូនដំណឹងរហូតដល់ថ្ងៃទី០៨ ខែកុម្ភៈ ឆ្នាំ២០២៥ វេលាម៉ោង ១៧:០០ ជាកំណត់។ បេក្ខជនត្រូវផ្ញើទម្រង់ព័ត៌មានលម្អិត និងវីដេអូខ្លី ជូនក្រុមការងារតាមរយៈអ៊ីមែល tongsrengdopo@gmail.com  ឬតាមលេខទូរស័ព្ទ ឬតេឡេក្រាម 096 981 1186។

គួរជម្រាបជូនថា សន្និសីទ និងពិព័រណ៍បច្ចេកវិទ្យាអប់រំកម្ពុជាលើកទី១ មានកម្មវិធីចម្រុះ រួមមាន ការធ្វើបទបង្ហាញរបស់វាគ្មិនជាតិ និងអន្តរជាតិលើបរិវត្តកម្មឌីជីថលសម្រាប់ការអប់រំ, កិច្ចពិភាក្សាយុទ្ធសាស្ត្រអប់រំឌីជីថលសម្រាប់សាលារៀន, ការតាំងពិព័រណ៍បច្ចេកវិទ្យាអប់រំពីវិស័យសាធារណៈ និងឯកជន, ការប្រកួតប្រជែងគ្រូបង្រៀនផ្នែកបច្ចេកវិទ្យាអប់រំប្រកបដោយភាពច្នៃប្រឌិតបំផុតរបស់កម្ពុជាឆ្នាំ២០២៥ និងការប្រកួតប្រជែងសមត្ថភាពឌីជីថល ដែលអ្នកចូលរួមទាំងអស់អាចប្រកួតប្រជែងសមត្ថភាព និងចំណេះដឹងផ្នែកឌីជីថលនៅក្នុងព្រឹត្តិការណ៍នេះ៕