មាតាបិតា អ្នកអាណាព្យាបាល ប្រមាណជា១រយនាក់ នៃសាលារៀនវ៉េស្ទឡាញន៍ សាខាច្បារអំពៅ កាលពីថ្ងៃទី១៥ ខែកុម្ភៈ ឆ្នាំ២០២៥ចុងសប្តាហ៍កន្លងទៅនេះ បានទទួលការបណ្តុះបណ្តាលពីទម្លាប់ល្អទាំង៧របស់គ្រួសារឆ្នើម ដើម្បីទទួលបានគន្លឹះបន្ថែមក្នុងដំណើរជីវិតគ្រួសារប្រកបដោយសុខដុមរមនា។

លោក ឌុក នីន Trainer & Coach of 7 Habits, Franklin Covey Education, Cambodia មានប្រសាសន៍ថា គោលបំណងនៃការបណ្តុះបណ្តាល គឺជាការចែករំលែកនូវមេរៀនទម្លាប់ល្អទាំង៧របស់គ្រួសារឆ្នើមទៅដល់មាតាបិតាបានយកទៅប្រើប្រាស់ ដើម្បីចែករំលែកក្តីស្រឡាញ់ អ្វីដែលគ្រួសារមាន គោលបំណងរបស់គ្រួសារ អ្វីដែលគ្រួសាររំពឹងចង់បាន ហើយនឹងចែករំលែកទៅដល់កូនៗ។

ក្នុងវគ្គបណ្តុះបណ្តាលពេញមួយព្រឹកនោះ មាតាបិតា អ្នកអាណាព្យាបាល ទទួលបានការបណ្តុះបណ្តាលផ្នត់គំនិត ពីរបៀបផ្លាស់ប្ដូរទម្លាប់ឱ្យមានភាពម្ចាស់ការ, ចេះរៀបចំផែនការដោយមានគោលបំណងច្បាស់លាស់, ផ្តោតទៅលើការងារដែលសំខាន់បំផុត, ចេះប្រើការគិតបែបឈ្នះឈ្នះ, ចេះស្តាប់, សហការ និងចេះអភិវឌ្ឍខ្លួន។

បើតាមលោក ឌុក នីន បច្ចុប្បន្នសិស្សានុសិស្សនៃបណ្តាញសាលារៀនវេសឡាញន៍ និងសាលារៀនណត្សឡាញន៍ ពួកគេសុទ្ធសឹងតែបានសិក្សាពីទម្លាប់ល្អទាំង៧របស់បុគ្គលឆ្នើម ដូច្នេះនៅពេលដែលកូនៗបានសិក្សានៅសាលា ហើយមាតាបិតា អ្នកអាណាព្យាបាល ក៏បានសិក្សាដូចគ្នា ហើយយកទៅអនុវត្តនៅផ្ទះ នោះបានន័យថា គ្រួសារមួយបានអនុវត្តទម្លាប់ល្អទាំង៧រួមគ្នា គឺជាគ្រួសារមួយដែលហៅថា គ្រួសារឆ្នើម គ្រួសារដែលរស់នៅជាមួយគោលបំណងជាក់លាក់ គោលបំណងច្បាស់លាស់ ហើយនឹងដើរទៅរកគោលដៅដែលគ្រួសារចង់បាន។

“…នៅពេលដែលមាតាបិតាគាត់បានរៀន គាត់ដឹងថា កូនគាត់មករៀននៅសាលាយើងទទួលបានផលអ្វី? ហើយគាត់រៀនទៅបានផលអ្វី? ហើយយើងសហការគ្នាអនុវត្តរួមគ្នាជាមួយគ្រួសារ ទាំងកូន ទាំងគ្រួសារ ធ្វើឱ្យគ្រួសារមួយរីកចម្រើន ធ្វើឱ្យគ្រួសារមួយមានគោលដៅច្បាស់លាស់ ហើយនឹងចក្ខុវិស័យ និងដើរទៅរកគោលដៅរួមគ្នា ដូច្នេះធ្វើឱ្យកូនៗគាត់ដឹងថា ជីវិតរបស់គាត់ចង់បានអ្វី ជីវិតរបស់គ្រួសារចង់បានអ្វី នោះយើងនឹងដើររួមគ្នា នោះជាលទ្ធផលដែលយើងរំពឹងទុក”

គួរជំរាបថា ទម្លាប់ល្អទាំង៧របស់គ្រួសារឆ្នើម គឺជាផ្នែកនៃទម្លាប់ល្អទាំង៧របស់បុគ្គលឆ្នើម ស្ថិតក្នុងកម្មវិធី Leader in Me ដែលបណ្តាញគ្រឹះស្ថានអប់រំ វេសឡាញ អេឌ្យូឋេសិន គ្រុប ទទួលបានសិទ្ធិផ្តាច់មុខពីសហរដ្ឋអាមេរិក ក្នុងការចែកចាយនៅតាមសាលារៀននានាក្នុងប្រទេសកម្ពុជា។ បើតាមលោក ឌុក នីន ការអនុវត្តកម្មវិធី Leader in Me គឺជាការយកទម្លាប់ល្អរបស់បុគ្គលឆ្នើម យកមកអនុវត្ត និងបង្រៀនសិស្សនូវទម្លាប់ល្អទាំង៧ និងជំនាញសតវត្សរ៍ទី២១ ជាជំនាញដែលកំពុងត្រូវការក្នុងពេលបច្ចុប្បន្ន និងអនាគត ដែលជួយឱ្យកុមារ យុវជន រីកចម្រើនទាំងជីវិតផ្ទាល់ខ្លួន ការរស់នៅក្នុងគ្រួសារ សង្គម ពោលគឺពួកគេនឹងក្លាយជាពលរដ្ឋល្អម្នាក់ ជាសមាជិកគ្រួសារល្អ នៅក្នុងសហគមន៍ ក៏ដូចជាសង្គមយើង៕