យុវតី ផារី ជាក្មេងស្រីម្នាក់រស់នៅ​ក្នុងស្រុកអណ្ដូងមាស នៃខេត្តរតនៈគិរី, ដំបូងឡើយ​គ្រួសាររបស់នាង ​មិនមានមុខរបរ​ ឬការងារច្បាស់លាស់នោះឡើយ ដែលនាំ​ឱ្យ​ជីវភាពមានការ​លំបាក​ជាខ្លាំង ។ តែក្រោយពី ផារី បាន​ចូលរៀន​ជំនាញសំអាងកាយ បច្ចុប្បន្ន​នេះ ផារី ទទួលបាន​ជំនាញ​មួយ​ច្បាស់លាស់ ហើយ​ក៏​មាន​មុខរបររកទទួលទាន មានប្រាក់ចំណូល​ ជួយ​ឱ្យ​ជីវភាព​គ្រួសារ​ប្រសើរជាងមុន។

ផារី បានរៀបរាប់ថា ខ្លួនបានស្គាល់ និងមានឱកាសសិក្សាជំនាញសំអាងកាយតាមរយៈ កម្មវីធីសិក្សាជំនាញដើម្បីភាពជោគជ័យរបស់រដ្ឋាភិបាលអាល្លឺម៉ង់ សហការរជាមួយង្គការភ្លែនអន្តរជាតិកម្ពុជា និងគាំទ្រដោយមជ្ឈមណ្ឌលបណ្ដុះបណ្ដាលវិជ្ជាជីវៈខេត្តរតនៈគិរី ដោយរៀននៅក្នុងសហគ្រាសមួយក្នុងស្រុកវើនសៃ។ ផារី បន្តថា មុនសិក្សាជំនាញនេះខ្លួនមិនមានការងារធ្វើ មិនមានមុខរបរច្បាស់លាស់ និងមិនមានប្រាក់ចំណុលសម្រាប់ជួយខ្លួនឯង និងគ្រួសារបានឡើយព្រោះមិនមានជំនាញក្នុងខ្លួន។

កញ្ញា ផារី បានបន្ថែមថា ត្បិតកំឡុងការសិក្សាជំនាញនេះមានផលលំបាកជាច្រើនព្រោះមិនធ្លាប់ធ្វើ និងអនុវត្តនកន្លងមកពិតមែន ប៉ុន្តែក្រោយបញ្ចប់ការរៀនជំនាញនេះបានផ្លាស់ប្ដូរជីវិត៩០ភាគរយ ជាពិសេស ផារី អាចបង្កើតមុខរបរមួយសម្រាប់ខ្លួនឯង។

បច្ចុប្បន្ន ផារី ជាម្ចាស់កន្លែងផាត់មុខ ធ្វើសក់មួយកន្លែងដែលអាចរកចំណូលជាប្រចាំខែ និងអាចសន្សំបានខ្លះដើម្បីសម្រេចក្ដីស្រមៃនាពេលអនាគតផងដែរ។ ផារី លើកឡើងដោយក្ដីសង្ឃឹមថា ជំនាញមួយនេះបានផ្ដល់អត្ថប្រយោជន៍ជាច្រើនសម្រាប់ជីវិតរបស់ខ្លួន ជាពិសេសកែប្រែពីក្មេងស្រីម្នាក់ដែលមិនមានការងារធ្វើ ឱ្យក្លាយជាម្ចាស់របរតូចមួយសមរម្យនៅក្នុងស្រុកដែលខ្លួនរស់នៅ និងទទួលបានការគាំទ្រពីភ្ញៀវផងដែរ។

ជាមួយគ្នានេះ យុវតី ផារី បានលើកទឹកចិត្តដល់យុវជន យុវនារីទាំងអស់ដែលបានបោះបង់ការសិក្សាព្រោះកត្តាជីវភាព ឬកត្តាផ្សេងៗអាចស្វែងរកឱកាសរៀនជំនាញវគ្គខ្លីផ្សេងៗដើម្បីមានជំនាញមួយពិតប្រាកដក្នុងខ្លួន។ ជាក់ស្ដែងប្រជាពលរដ្ឋដែលរស់នៅក្នុងខេត្តរតនៈគិរី អាចទៅចុះឈ្មោះ និងប្រឹក្សាយោបល់អំពីជំនាញផ្សេៗនៅមជ្ឈមណ្ឌលបណ្ដុះបណ្ដាលវិជ្ជាជីវៈខេត្តរតនៈគិរី។

គួរ​បញ្ជាក់ដែរថា កាលពីខែវិច្ឆិកា ឆ្នាំ​២០២៣ រាជរដ្ឋាភិបាល​កម្ពុជាបានប្រកាស​ដាក់​ឱ្យ​ដំណើរ​ការ​កម្មវិធី​បណ្តុះបណ្តាល​ជំនាញវិជ្ជាជីវៈ និង​បច្ចេកទេស ដល់យុវជន​មក​ពី​គ្រួសារក្រីក្រ និង​គ្រួសារងាយរងហានិភ័យចំនួន ១.៥លាននាក់ លើវិស័យអាទិភាពចំនួន១០ និង៣៨មុខជំនាញផ្សេងគ្នា ។ ការដាក់​ឱ្យដំណើរ​ការ​កម្មវិធីបណ្តុះបណ្តាលជំនាញវិជ្ជាជីវៈនេះ គឺដើម្បីឱ្យយុវជនក្រុមគោលដៅ ឆាប់ទទួលបានឱកាសការងារសមរម្យក្នុងរយៈពេលខ្លីក្នុងទិសដៅកែប្រែ និងលើកម្ពស់ជីវភាពគ្រួសារឱ្យកាន់តែប្រសើរតាមរយៈយុវជនម្នាក់មានជំនាញមួយយ៉ាងតិចប្រចាំជីវិត៕