ក្នុងពិធីបញ្ចុះ​បឋមសិលា​សាងសង់សារមន្ទីរ​សម្តេច​ព្រះព្រហ្មរតនមុនី ពិន សែម នៅក្រុងសៀមរាប នាព្រឹក​ថ្ងៃទី១៨ កក្កដា សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណា​ចក្រ​កម្ពុជា មានប្រសាសន៍​ដោយលើកឡើងថា ដូនខ្មែរ​បាន​សាងសង់ប្រាសាទជាច្រើន តែនៅពេលមានសង្រ្គាម​រូបចម្លាក់ត្រូវ​គេ​កាត់យកទៅលក់តគ្នា, សម្តេចបញ្ជាក់ថា សង្រ្គាមមិន​ត្រឹមតែធ្វើ​ឱ្យ​មនុស្ស​បែកបាក់គ្រួសារនោះទេ សូម្បីតែរូបសំណាកជា​ព្រលឹងដូនតាយើងនៅ​ក្នុងថ្ម ក៏​ត្រូវបែកបាក់ដែរ។

សម្តេចធិបតីមានប្រសាសន៍ថា នៅពេលដែលយើងចាប់ផ្តើមបែកបាក់ដោយសារសង្រ្គាម នោះនឹងធ្វើ​ឱ្យ​មនុស្សស្លាប់ជាបន្តបន្ទាប់តាមរយៈការ​ច្បាំងគ្នា, យើងបាត់បង់ទឹកដីជាបន្តបន្ទាប់, សម្បត្តិវប្បធម៌ បេតិកភណ្ឌផ្សេងៗ ជាពិសេស​ប្រាង្គប្រាសាទដែលដូនតាយើងបានកសាងមួយចំនួនត្រូវខ្ទេចខ្ទាំដោយសារការប្រយុទ្ធគ្នា ចំនួនបានបោះបង់ចោលនៅក្នុងព្រៃរាប់សិបឆ្នាំ ហើយ​មួយចំនួនទៀតក៏ត្រូវបានខ្ទេចខ្ទាំ​តាមរយៈការ​លួច។ សម្តេចសង្កត់ធ្ងន់ថា នេះហើយ​ជាកាកសំណល់នៃសង្រ្គាម ដោយមិនគិតពីគ្រាប់មីន ឬជាតិផ្ទុះនៅក្នុងដីនោះទេ ប៉ុន្តែជាកាកសំណល់នៅក្នុងសង្គមសេដ្ឋកិច្ច។

យ៉ាងណាក៏ដោយ ក្រោយបញ្ចប់សង្រ្គាម​តាមរយៈនយោបាយឈ្នះឈ្នះ យើងមានការ​ឯកភាពជាតិគ្នា ធ្វើ​ឱ្យ​យើងទទួលបានផល ទី១ ឈប់ស្លាប់ដោយសារសង្រ្គាមតទៅទៀត, ទី២ ទឹកដីយើងលែងបាត់បង់ យើងត្រូវការពារ, ទី៣ បេតិកភណ្ឌ សម្បត្តិវប្បធម៌ ជាពិសេស​ប្រាង្គប្រាសាទរបស់យើង ឈប់ខ្ទេចខ្ទាំដោយសារសង្រ្គាម ហើយយើងថែមទាំងជួសជុលឡើងវិញនូវប្រាសាទ ថែរក្សា​ជាគោលដៅទេសចរណ៍ ហើយក្រៅពីនោះយើងបានចុះបញ្ជីជាបេតិកភណ្ឌពិភពលោក ដើម្បី​ឱ្យ​អន្តរជាតិចូលរួមថែរក្សា​សម្បត្តិដែលដូនតារបស់យើងបានធ្វើ។

តាមប្រសាសន៍របស់សម្តេចធិបតី​នាយករដ្ឋមន្រ្តី គិតពីឆ្នាំ​១៩៩៦ រហូត​ដល់ឆ្នាំ​២០២៤នេះ វត្ថុបុរាណ​ប្រមាណជា ១០៩៨ដុំ ត្រូវ​បានប្រមូលពី១៥ប្រទេសត្រឡប់មក​កម្ពុជាវិញ ហើយបច្ចុប្បន្ន​ក្រសួងវប្បធម៌​កំពុង​តែរៀបចំបញ្ជូនវត្ថុបុរាណខ្មែរចំនួន៥៥ដុំពីទីក្រុងញូយ៉ក សហរដ្ឋអាមេរិក និងជាង៧០ដុំ ពី​ប្រទេសអង់គ្លេស មក​កាន់ប្រទេស​កំណើតវិញ។ “សង្រ្គាម វាបែកបាក់មិនត្រឹមតែមនុស្សទេ តែព្រលឹងដូនតាយើងនៅក្នុងថ្មក៏​ត្រូវបែកបាក់ដែរ តែឥឡូវចប់សង្រ្គាម​យើងយកមកវិញ យើងយកមកផ្គុំ យើងយកមកទុក យើងអញ្ជើញគាត់ត្រឡប់មកវិញ មកកន្លែងដើម… ត្រឡប់មកជុំគ្នានៅលើទឹកដីអង្គររបស់យើង នេះគឺជាមោទនភាពនៃសន្តិភាព​​”៕