ក្រុម​យុវជន​តំណាងប្រទេស​កម្ពុជា ដែល​មាន​សមាជិក​៧នាក់ បាន​ជាប់​ចំណាត់​ថ្នាក់​លេខ១ ក្នុង​ការប្រឡង​តេស្ត​ភាសាអង់គ្លេស IELTS និង​ជាប់​ចំណាត់​ថ្នាក់​កិត្តិយស​ក្នុង​ការ​ប្រកួត​ធ្វើបទ​បង្ហាញ​ទ្រឹស្តី​អំពីកីឡា ក្នុងការប្រកួត​ប្រជែង​ភាសាអង់គ្លេស​អូឡាំព្យាដ​អន្តរជាតិ​លើកទី៩ រៀប​ចំដោយ​ក្រសួងអប់រំ និងយុវជន នៃ​ព្រះរាជា​ណាចក្រហ្សកដានី កាលពីពេលកន្លងទៅថ្មីៗនេះ។

កម្មវិធីនៃ​ការ​ប្រកួត​នេះ មានរយៈពេល​៣ថ្ងៃ ប្រព្រឹត្តទៅ​ចាប់ពីថ្ងៃទី៨-១០ ខែឧសភា ឆ្នាំ២០២៥ ដែលមាន​បេក្ខជន​ចូលរួមក្នុង​ការ​ប្រកួត​ប្រជែង​ប្រមាណ ១២០០រូប មកពី​សាលាមធ្យម​សិក្សាចំនួន ១៤០ នៃ​១៤ប្រទេសផ្សេងគ្នា។

យុវ​សិស្ស គឹមសាន សុចិត្រា ជាសិស្ស​ថ្នាក់ទី៨ នៃ​វិទ្យាល័យ​ព្រះស៊ីសុវត្ថិ សាលារៀន​ជំនាន់ថ្មី បានប្រាប់​ឱ្យដឹង​ថា ការតេស្ត​ភាសា​អង់គ្លេស IELTS ក្នុងកម្មវិធី​ប្រកួតនេះ មានដូចជា វេយ្យាករណ៍ ការ​ប្រើប្រាស់​ភាសា ការស្ដាប់ និង​ការអាន​ សរុបមាន៩៩សំណួរ។ ក្នុងនោះ ៦៤សំណួរ​ទាក់ទងទៅ​នឹងវេយ្យាករណ៍ និងការ​ប្រើប្រាស់​ភាសា ២៥សំណួរទាក់ទងនឹងការអាន​ និង១១សំណួរទាក់ទងនឹងការស្ដាប់។ សុចិត្រា បន្តថា សម្រាប់ការប្រកួតតេស្តភាសាអង់គ្លេស IELTS មិនសូវជួបឧបសគ្គច្រើនទេ​ក្នុងការប្រឡង ដោយ​សារ​កម្រិតសំណួរ IELTS ទាំងនោះ ពួកគេសុទ្ធតែបានឆ្លងកាត់ការរៀនសូត្រកន្លងមក។

សិស្សថ្នាក់ទី៨ នៃវិទ្យាល័យព្រះស៊ីសុវត្ថិ សាលារៀនជំនាន់ថ្មីរូបនេះ បន្ថែម​ទៀត​ថា ដំបូង​ឡើយ​រូបគេ​មិន​រំពឹង​ទេថា ក្រុមអាច​ជាប់ចំណាត់ថ្នាក់លេខ១​នេះ ដោយ​សារមាន​សិស្សចូលរួម​ប្រកួត​ច្រើន ប៉ុន្តែពេល​បានដឹង​លទ្ធផល​ចំណាត់​ថ្នាក់​លេខ១​នេះ គឺរូប​គេ និងក្រុម​មានអារម្មណ៍​រំភើប​ជាខ្លាំង។ សុចិត្រា បន្តថា បន្ទាប់ពីចូលរួម​ប្រកួត​កម្មវិធីនេះ រូបគេ​បានស្វែង​យល់កាន់​តែស៊ីជម្រៅ​អំពីតេស្ត​ភាសាអង់គ្លេស IELTS ដែលមាន​លក្ខណៈស្តង់ដា​អន្តរជាតិ បានជួប​មនុស្សថ្មីៗ​មកពីប្រទេសផ្សេងគ្នា ហើយ​បានបង្ហាញ​វប្បធម៌​រវាងប្រទេស និងប្រទេសផងដែរ។

យុវសិស្ស គឹមសាន សុចិត្រា បញ្ជក់ថា ភាសាអង់គ្លេស ពិតជាសំខាន់ក្នុងពេលបច្ចុប្បន្ននេះ ព្រោះវាបានផ្ដល់ឱកាសឱ្យយើងងាយស្រួល​ដាក់ពាក្យ​អាហារូបករណ៍សិក្សា​នៅ​ក្រៅប្រទេស ងាយស្រួល​ដាក់ពាក្យធ្វើការងារ និងងាយស្រួល​ក្នុងការទំនាក់ទំនង​ជាមួយអ្នកប្រើ​ភាសាអង់គ្លេស។ សុចិត្រា ក៏បាន​លើក​ទឹកចិត្ត​យុវជន សិស្សានុសិស្ស ខិតខំ​ប្រឹងប្រែង​រៀនសូត្រ ពង្រឹង​សមត្ថភាព ព្រមទាំងឆ្លៀត​ឱកាសចូលរួម​ប្រកួតប្រជែង​ក្នុងកម្មវិធី​នានា​ដើម្បី​ពង្រឹង​សមត្ថភាព និង​ទទួល​ជ័យលាភី​សម្រាប់​លើក​កិត្តិយស​ប្រទេស​កម្ពុជា។

ជាមួយ​គ្នានេះ យុវតី លឹម សុគន្ធាវី ជាសិស្សថ្នាក់ទី១១ វិទ្យាល័យ​ព្រះស៊ីសុវត្ថិ សាលារៀន​ជំនាន់ថ្មី ក៏​បាន​លើកឡើង​ដែរ​ថា មុនពេល​ចូលរួម​ការប្រកួត​កម្មវិធី​នេះ គឺក្រុម​តំណាង​កម្ពុជា បាន​រៀន​ត្រៀម​ភាសា​អង់គ្លេស​នៅមជ្ឈមណ្ឌល​អូស្រ្តាលី​សម្រាប់ការបណ្តុះបណ្តាល (ACE) រយៈពេល២ខែ។ សុគន្ធាវី បន្តថា រូបគេ និង​ក្រុមមាន​អារម្មណ៍​ថា រំភើប និងសប្បាយចិត្ត​ជាខ្លាំងនៅ​ពេល​ទទួលបាន​ចំណាត់ថ្នាក់លេខ​១នេះ។

សិស្សថ្នាក់ទី១១ រូបនេះ បន្ថែម​ថា កត្តាដែល​ជំរុញឱ្យក្រុមខ្លួន​ជាប់ចំណាត់ថ្នាក់​លេខ១នេះ គឺទី១. កត្តាខ្លួនឯង ៖ សមាជិក​ក្រុម​ម្នាក់ៗសុទ្ធតែ​បាន​ត្រៀមខ្លួន និងបាន​ហ្វឹកហាត់​តេស្ត​ភាសា​អង់គ្លេស IELTS រួចជាស្រេច​មុន​ការប្រកួត​មកដល់។ ទី២. កត្តា​គ្រូបង្រៀន៖ គ្រូបង្រៀន​នៅវិទ្យាល័យ​ព្រះស៊ីសុវត្ថិ និងនៅ ACE បានខិតខំប្រឹងប្រែង​យកចិត្តទុកដាក់​ក្នុងការប្រៀន។ ទី៣. កត្តា​គ្រួសារ៖ ក្រុមគ្រួសារ​បាន​ខិតខំជំរុញ និងផ្ដល់​កម្លាំង​ចិត្តឱ្យកូនៗ​ចូលរួម​ប្រកួត និងទី៤. ការផ្ដល់​ឱកាស​ពី​ក្រសួង​អប់រំ យុវជន និង​កីឡា ដែលបាន​ដឹកនាំក្នុង​ដំណើរ​ការប្រកួត​ប្រកប​ដោយភាព​កក់ក្ដៅ​រហូត​ទទួល​បាន​លទ្ធល្អ។

សម្រាប់​យុវសិស្ស គឹម អ៊ីងម៉េង ជាសិស្សថ្នាក់ទី១០ នៃ​សាលា​អាមេរិកាំង​ប៉ាស៊ីហ្វិច លើក​ឡើងដែរ​ថា រូបគេមាន​អារម្មណ៍​រំភើបខ្លាំង និង​សប្បាយ​ចិត្ត ដែលក្រុម​អាចទទួល​បានចំណាត់​ថ្នាក់​លេខ១​ក្នុងការ​តេស្ត​ភាសា​អង់គ្លេស IELTS នៅ​ប្រទេស​ហ្សកដានី​នេះ។ អ៊ីងម៉េង បន្តថា លទ្ធផល​ល្អនេះ ក៏ដោយ​សារ​សមាជិក​ក្រុម​ចេះជួយគ្នា​ទៅវិញ​ទៅមក និងចេះ​សហការ​គ្នាជា​ក្រុម​បាន​ល្អ។ នៅ​ថ្ងៃអនាគត ពួកគេ នឹងខិតខំ​ប្រឹងប្រែង​បន្ថែម​ទៀត៕