ការដឹងអំពីទេពកោសល្យរបស់ខ្លួន ឬចំណង់ចំណូលចិត្តរបស់ខ្លួនពូកែផ្នែកអ្វី គឺជារឿងសំខាន់សម្រាប់យុវជន​ ដើម្បីត្រៀមខ្លួនក្នុងការចាប់យកជំនាញសិក្សា អាជីពការងារ ដែលកំពុងមានតម្រូវការទីផ្សារការងារ។ លោក គីម ដារ៉ា ស្ថាបនិកសាលាបង្វឹក Startup Community មានប្រសាសន៍ថា ការអនុញ្ញាតិឱ្យខ្លួនឯងសាកល្បង ជារបៀបដែលយុវជនស្វែងរកខ្លួនឯងឃើញ។

លោក គីម ដារ៉ា បញ្ជាក់បន្ថែមថា ដើម្បីដឹងថា យុវជនខ្លួនឯងមានទេពកោសល្យខាងអ្វី​ ឬចូលចិត្តអ្វី លុះត្រាតែយុវជនឧស្សាហ៍សង្កេត ត្រួតពិនិត្យខ្លួនឯង និងឧស្សាហ៍សាកល្បងដោយខ្លួនឯង។ លោក គីម ដារ៉ា បន្តថា យុវជនត្រូវតែឧស្សាហ៍សង្កេតមើលខ្លួនឯង ហើយស្វែងយល់ពីខ្លួនឯង សិក្សាស្រាវជ្រាវ កាលណាកាន់តែរៀនកាន់តែដឹង មានជម្រើសកាន់តែច្រើន នោះយើងអាចតេស្តទៅលើជម្រើសនីមួយៗ។

ឧទាហរណ៍ យើងចូលចិត្តការងារផ្នែកសំណង់ យើងអាចចូលទៅសាកល្បងចុះទៅលើការងារនោះផ្ទាល់ ដើម្បីដឹងថា ខ្លួនឯងស្រឡាញ់ ឬអត់? ប្រសិនបើយើងមានអារម្មណ៍ធុញទ្រាន់ នោះមិនមែនជាអ្វីដែលយើងស្រឡាញ់ពិតប្រាកដទេ។ ប៉ុន្តែបើកិច្ចការនោះ យើងធ្វើទៅបើទោះជាមានសម្ពាធក៏នៅតែធ្វើ ព្រោះយើងមានអារម្មណ៍ស្រឡាញ់ចូលចិត្ត ទោះមានរឿងអ្វីក៏មិនបោះបង់ នោះហើយជាភាពខ្លាំង។

«មនុស្សអាចនឹងចំណាយពេលជាមួយការងារជាង៤០ឆ្នាំ ដូច្នេះពេលរៀនចប់ ប្រសិនយើងធ្វើការងារដែលមិនស្រឡាញ់នឹងស្រ្តេស គឺជារឿងពិបាក។ ដូច្នេះ យុវជន ត្រូវតែរើសជំនាញណាស្របនឹងទេពកោសល្យនិងចំណង់ចំណូលចិត្ត ទើបធ្វើឱ្យជក់ចិត្តបំពេញការងារនោះ ធ្វើកាន់តែយូរកាន់តែពូកែ»។

បើតាម លោក គីម ដារ៉ា តម្រូវការទីផ្សារការងារបច្ចុប្បន្ននៅកម្ពុជា គឺនៅខ្វះអ្នកជំនាញដែលចេះច្បាស់ជាច្រើនជំនាញ ដូច្នេះ យុវជនចង់រៀនជំនាញអ្វីក៏មិនខុសដែរឱ្យតែចេះច្បាស់។  លោក គីម ដារ៉ា បន្តថា ដើម្បីសម្រួចជំនាញដែលជាទេពកោសល្យរបស់ខ្លួន តាមតម្រូវការទីផ្សារការងារចង់បាន គឺយុវជនត្រូវយល់ជំនាញដែលខ្លួនរៀនឱ្យច្បាស់ ចេះឱ្យច្បាស់ នោះទីផ្សារការងារនឹងត្រូវការ។

អ្នកស្រី ម៉ៅ សុជាតិ នាយិការប្រតិបត្តិក្រុមហ៊ុន Global Talents មានប្រសាសន៍ថា យុវជនជ្រើសរើសជំនាញស្របតាមទេពកោសល្យពីធម្មជាតិ គឺជាដើមទុនជំរុញមួយបន្ថែមលើជំនាញដែលយើងកំពុងចូលចិត្តក្នុងការធ្វើការដោយអត់ធ្មត់ លះបង់ តស៊ូ និងមិនបោះបង់ចោលកណ្ដាលទី។

នាយិការប្រតិបត្តិក្រុមហ៊ុន Global Talents បន្ថែមថា ផ្អែកលើទិន្នន័យដែលក្រុមធនធានមនុស្សផ្ដល់សេវាកម្មផ្នែកជ្រើសរើសបុគ្គលិក ជំនាញដែលមានតម្រូវការច្រើន រួមមាន ផ្នែកឌីជីថល ការផ្សាយពាណិជ្ជកម្មលើប្រពន្ធអនឡាញ គណនេយ្យករ ផ្នែកលក់ អ្នកបង្កើតមាតិកា ដែលមានជំនាញច្បាស់លាស់។

គួរជម្រាបជូនថា បើតាមការវិភាគទៅលើដំណឹងជ្រើសរើសបុគ្គលិកចំនួន ២២៨លានកន្លែងនៅសហរដ្ឋអាមេរិក អ្នកជំនាញបានរកឃើញថា មានជំនាញឌីជីថលចំនួន ៤ដែលកំពុងមានការរីកចម្រើនលឿន និងមានតម្រូវការខ្ពស់ មានដូចជា ១. បញ្ញសប្បនិម្មិត (AI)/ ម៉ាស៊ីនសិក្សា (Machine learning [ML]) ២. អ្នកជំនាញផ្នែកផ្ទុកទិន្នន័យពពក (Cloud computing) ៣. ជំនាញផ្នែកគ្រប់គ្រងផលិតផល (Product Management) និង៤. អ្នកជំនាញផ្នែកបណ្ដាញសង្គម (Social Media)៕