ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ដោយសារតែក្តីស្រឡាញ់អាជីពជាគ្រូបង្រៀន និងចង់ក្លាយជាមន្រ្តីរាជការពេញសិទ្ធិមួយរូប លោក អេង ប៉ូលីសុវណ្ណ ដែលបច្ចុប្បន្នមានវ័យ៣២ឆ្នាំ បានចំណាយពេលរហូតដល់ទៅ១២ឆ្នាំ ក្នុងការដាក់ពាក្យប្រឡងចូលក្របខណ្ឌគ្រូបង្រៀន រហូត១៨ដង។ តែយ៉ាងណាការប្រឹងប្រែង និងឆន្ទៈរបស់ លោក ប៉ូលីសុវណ្ណ រយៈពេលជាង១០ឆ្នាំ មិនបានធ្វើឱ្យលោកខកចិត្តឡើយ ពោលគឺលោកបានប្រឡងជាប់ក្របខណ្ឌជាគ្រូបង្រៀនជាស្ថាពរ ក្នុងការប្រឡងលើកទី១៩របស់លោក នៅក្នុងឆ្នាំ២០២៣។
លោក ប៉ូលីសុវណ្ណ ដែលមានស្រុកកំណើតនៅខេត្តស្វាយរៀង រៀបរាប់ថា ក្រោយប្រឡងជាប់សញ្ញាបត្រមធ្យមសិក្សាទុតិយភូមិ ឬបាក់ឌុប កាលពីឆ្នាំ២០១១ លោកមិនមានលទ្ធភាពទៅបន្តការសិក្សានៅមហាវិទ្យាល័យនោះទេ ព្រោះតែស្ថានភាពគ្រួសារនាពេលនោះលំបាកខ្លាំង ខណៈឪពុករបស់លោកក៏បានអនិច្ចកម្មនៅគ្រានោះដែរ ដូច្នេះលោកត្រូវបង្ខំចិត្តចាកចេញពីស្រុកកំណើតទៅស្វែងរកការងារធ្វើដើម្បីបានកម្រៃខ្លះផ្គត់ផ្គង់គ្រួសារ ។ ការងារដែលលោកទទួលបាននៅពេលនោះ គឺការងារជាសន្តិសុខ ហើយបន្ទាប់មកក៏ជាកម្មកររោងចក្រជាដើម, ទោះជាកំពុងបំពេញការងារជាសន្តិសុខក្តី ក៏ជាកម្មកររោងចក្រក្តី តែលោកក៏មិនភ្លេចឆ្លៀតដាក់ពាក្យប្រឡងគ្រូ ដែលជាក្តីស្រម៉ៃរបស់លោកដែរ។ កាលនោះប្រហែលជាដោយសារតែលោករវល់ធ្វើការងារ មិនមានពេលច្រើនក្នុងការមើលមេរៀន ទើបបណ្តាលឱ្យលទ្ធផលប្រឡងរបស់លោកមិនបានល្អ។
នៅក្នុងឆ្នាំ២០១៥ ដែលអាចចាត់ទុកថាជាពន្លឺនៃក្តីស្រម៉ៃ លោកបានជាប់ជាគ្រូកិច្ចសន្យា នៅសាលាបឋមសិក្សាតានូ ស្ថិតនៅក្នុងស្រុកកំណើតរបស់លោកដែរ ។ ហើយជាមួយគ្នានេះ ពេលនោះ លោកក៏ទទួលបានអាហារូបករណ៍ អ.ម.ត. ដើម្បីបន្តការសិក្សាថ្នាក់បរិញ្ញាបត្រជំនាញធនាគារ និងហិរញ្ញវត្ថុ ថែមទៀត ដោយលោកបានបញ្ចប់ការសិក្សាថ្នាក់បរិញ្ញាបត្រនៅឆ្នាំ២០១៩។
ទោះជាទទួលបានសញ្ញាបត្របរិញ្ញាបត្រហើយក្តី តែមិនបានធ្វើឱ្យលោក ប៉ូលីសុវណ្ណ បំភ្លេចចោលនូវការប៉ុនប៉ងការប្រឡងដើម្បីយកក្របខណ្ឌរដ្ឋនោះទេ ខណៈសញ្ញាបត្របរិញ្ញាបត្រមួយសន្លឹកនេះ បែរជាធ្វើឱ្យលោកមានឱកាស និងសិទ្ធិប្រឡងកាន់តែច្រើន ។ បើតាមលោក ប៉ូលីសុវណ្ណ ដោយសារតែចង់ក្លាយជាមន្រ្តីរាជការ និងក្លាយជាគ្រូបង្រៀនពេញសិទ្ធិម្នាក់ ឆ្នាំខ្លះលោកដាក់ពាក្យប្រឡងចូលក្របខណ្ឌរហូតដល់ទៅ៣ដង ប៉ុន្តែមិនទទួលបានជោគជ័យ រហូតដល់ឆ្នាំ២០២៣ ទើបលោកប្រឡងជាប់ជាមន្រ្តីអប់រំ ហើយបច្ចុប្បន្នលោកគឺជាគរុនិស្សិតបរិញ្ញាបត្រ+២ ឯកទេសសេដ្ឋកិច្ច។
លោក ប៉ូលីសុវណ្ណ ក៏បាននិយាយដែរថា សម្រាប់ឆន្ទៈធ្វើជាមន្រ្តីរាជការ ធ្វើជាគ្រូបង្រៀនពេញសិទ្ធិ គឺលោកមិនបោះបង់ឡើយ ហើយប្រសិនបើនៅក្នុងឆ្នាំ២០២៣នោះ លោកមិនអាចប្រឡងជាប់ទេ លោកនឹងបន្តការសិក្សារហូតដល់ថ្នាក់អនុបណ្ឌិតថែមទៀត ដើម្បីអាចមានសិទ្ធិផ្នែកអាយុ ដាក់ពាក្យប្រឡងយកក្របខណ្ឌបន្តទៀត ពោលគឺលោកនឹងព្យាយាមរហូតដល់ទីបំផុត។
សម្រាប់ឆន្ទៈរបស់ខ្ញុំ ខ្ញុំនៅតែសន្យានឹងខ្លួនឯងថា ធ្វើយ៉ាងម៉េចក៏ដោយ ត្រូវតែប្រឡងគ្រូឱ្យជាប់ ទោះបីជាគៀកនឹងដល់អាយុផុតកំណត់ក៏ដោយ ព្រោះសម្រាប់អ្នកមានសញ្ញាបត្របរិញ្ញាអាចប្រឡងបានត្រឹមអាយុ ៣៥ឆ្នាំ។ នៅអំឡុងពេលដែលខ្ញុំប្រឡងនេះ ខ្ញុំមានអាយុ ៣១, ហេតុនេះ ខ្ញុំនៅមានពេល៤ ឆ្នាំទៀត។ ដូច្នេះ ស៊ូធ្វើម៉េច ខ្ញុំនឹងពង្រឹងចំណេះដឹងកបន្ថែម ហើយតស៊ូប្រឡងឱ្យជាប់នៅក្នុងឆ្នាំ ដែលយើងមិនទាន់ផុតអាយុ។
ជាមួយគ្នានេះ លោក អេង ប៉ូលីសុវណ្ណ ក៏បានចែករំលែកបទពិសោធន៍របស់លោកដែលជោគជ័យ ក្នុងការដាក់ពាក្យប្រឡងចូលក្របខណ្ឌជាគ្រូបង្រៀនដល់យុវជនដែរ ដោយក្នុងនោះ គឺយុវជនត្រូវមានការត្រៀមលក្ខណៈ ដូចជា ស្វែងរកឯកសារសិក្សា, តាមដានព័ត៌មានសង្គម, ហ្វឹកហាត់ធ្វើវិញ្ញាសាប្រឡងឆ្នាំចាស់ៗ, សរសេរអក្សរឱ្យស្អាត មានរចនាបទ និងអក្ខរាវិរុទ្ធត្រឹមត្រូវ, ពេលប្រឡងត្រូវមើលសំណួរ និងអានសំណួរឱ្យបានច្បាស់, ការឆ្លើយសំណួរត្រូវខ្លី និងចំអ្វីដែលគេចង់បាន ហើយរាល់ចម្លើយត្រូវមានសេចក្ដីសន្និដ្ឋាន។
លោក ប៉ូលីសុវណ្ណ និយាយថា ការប្រឡងចូលជាមន្រ្តីរាជការ គឺមិនងាយស្រួលឡើយ គឺមានតែអ្នកមានសមត្ថភាពពិតប្រាកដប៉ុណ្ណោះ ទើបទទួលបានជោគជ័យ ដូច្នេះសម្រាប់យុវជនដែលមានបំណងចង់ប្រឡងចូលក្របខណ្ឌមន្រ្តីរាជការសូមខិតខំប្រឹងប្រែងរៀនសូត្រ៕
