ភាពរីកចម្រើនទាំងសមត្ថភាពការងារ អាកប្បកិរិយា និងការប្រមូលផ្តុំដោយប្រភពគំនិតវិជ្ជមាន គឺជាទីប្រាថ្នាក្នុងក្រុមដើម្បីកសាងធនធានមនុស្សឱ្យរឹងមាំ, តែយ៉ាងណា ភាពវិជ្ជមានទាំងនេះ ត្រូវផ្តើមចេញពីខ្លួនឯងជាមុនសិនដើម្បីពង្រឹងសមត្ថភាពការងារ និងការគិតវិជ្ជមាននៅកន្លែងការងារ។ តាមរយៈ គេហទំព័រ When I Work បាន​បង្ហាញគន្លឹះ ៣ចំណុចដែលមានឥទ្ធិពល ជះដល់ការពង្រឹងសមត្ថភាពការងារ និងការគិតវិជ្ជមាន។

១. សាបព្រោះសេចក្ដីល្អចំពោះអ្នកដទៃ ៖ ធ្វើល្អជាមួយអ្នកដទៃ ជាកត្តានាំមកនូវសុភមង្គល និងជំរុញចិត្តឱ្យកាន់តែចង់អនុវត្តបន្តទៀត។ ការប្រតិបត្តិត្រឹមត្រូវដោយសាងនូវអំពើល្អជាមួយបុគ្គលដទៃ មិនត្រឹមតែផ្តល់អារម្មណ៍វិជ្ជមានចំពោះខ្លួនឯងតែមួយមុខនោះទេ ប៉ុន្តែសកម្មភាពមួយនេះ បានធ្វើឱ្យអ្នកដទៃទទួលបាននូវផលវិជ្ជមាន ដូចជា ទទួលបានភាពរីករាយ និងមានឱកាសអាចបំពេញបន្ថែមនូវតម្រូវការចាំបាច់ក្នុងការរស់នៅ។

២. កុំរំពឹងលើប្រភពវិជ្ជមានពីខាងក្រៅ ៖ ភាពស្អាតស្អំ ឬក៏ភាពវិជ្ជមាន ត្រូវតែផ្តើមពីខ្លួនឯងទៅជានិច្ច ដូច្នេះចាត់ទុកអាកប្បកិរិយាវិជ្ជមាន ឱ្យដូចជាតម្រូវការសម្រាប់ទ្រទ្រង់រាងកាយ ដែលយើងត្រូវដាក់តាមខ្លួនជានិច្ច។ ការជួបប្រទះភាពតានតឹង និងបញ្ហាប្រឈមផ្សេងៗពីខាងក្រៅ ហើយអ្វីដែលជាចំណែកសំខាន់ក្នុងការដោះស្រាយចំណោទតានតឹងទាំងនេះគឺ ចាប់ផ្តើមបណ្តុះផ្នត់គំនិតដោះស្រាយចេញពីក្នុងខ្លួនទៅ ទើបរក្សាប្រសិទ្ធភាពបានយូរអង្វែង។

៣. សកម្មភាពសំខាន់ៗដើម្បីចាក់ទម្លុះសមិទ្ធិផល ៖ ការសម្រេចរឿងសំខាន់ៗ ឬគិតទៅដល់ចំណុចសំខាន់បំផុត អាចថាជាការទន្ទឹងរង់ចាំថ្ងៃសំខាន់ៗ ដូចជា វិស្សមកាល ហើយការគិតអំពីថ្ងៃនេះជារឿយៗ ជាកត្តានាំមកនូវក្ដីសង្ឃឹម និងអារម្មណ៍វិជ្ជមានមួយចំណែក។ យ៉ាងណាមិញ ប្រសិនបើមិនមានថ្ងៃពិសេសៗកើតមាននៅឡើយទេ ការបង្កើតសកម្មភាពថ្មីៗដោយខ្លួន​ឯង ក្នុងការបំផុសដល់អារម្មណ៍រំភើប ក៏ជាចំណែកនាំទៅរកអារម្មណ៍ល្អៗដូចគ្នា។

មួយវិញទៀត ជៀសវាងការបរិភោគអាហារដែលមិនផ្តល់សារធាតុចិញ្ចឹម ដែលនាំឱ្យមានលទ្ធផលមិនល្អ ឬអាហារដែលធ្វើឱ្យអ្នកទទួលលទ្ធផលមិនល្អ ឬប៉ះពាល់សុខភាពជាដើម, បែងចែកពេលសម្រាកបានត្រឹមត្រូវគ្រប់គ្រាន់ ចេះរក្សាគម្លាតពីការងារក្នុងករណីដែលចាំបាច់, ការកំណត់សកម្មភាពរាងកាយ ដោយការកំណត់ពេលដើរលំហាត់ប្រាណ សមាធិ ឬក៏រកភ្លេងដើម្បីស្តាប់កំឡុងពេលបំពេញការងារ, ការទុកពេលស្វែងរកកន្លែងដែលស្ងាត់ដើម្បីអានសៀវភៅដែលពាក់ព័ន្ធនឹងការអភិវឌ្ឍសមត្ថភាពការងារ ជាដើម​ ទាំង​នេះ​គឺជាសកម្មភាពដើម្បីសម្រេចលទ្ធផល ដែលគួរចាប់ផ្តើមពីតូចៗ និងសាមញ្ញៗ ដោយមិនតម្រូវឱ្យប្រើប្រាស់ថវិកា ឬក៏ទម្លាប់ដែលប៉ះពាល់សុខភាព៕