សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រី នៃព្រះរាជាណាចក្រកម្ពុជា នឹងអញ្ជើញជួបសំណេះសំណាលជាមួយសិស្សនិទ្ទេស A ក្នុងការប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០២៣ ព្រមទាំងនាយក នាយិកាសាលាដែលមានសិស្សនិទ្ទេស A នាថ្ងៃទី០៩ ខែ មករា ឆ្នាំ២០២៤​ខាងមុខ នៅមជ្ឈមណ្ឌលសន្និបាត និងពិព័រណ៍អន្តរជាតិជ្រោយចង្វារ រាជធានីភ្នំពេញ។

ក្នុងលិខិតចុះថ្ងៃពីថ្ងៃទី២១ ខែធ្នូ ឆ្នាំ២០២៣ ក្រសួងអប់រំ យុវជន និងកីឡា បានស្នើដល់មន្ទីរអប់រំចាត់តំណាងឱ្យមកទទួលយកស្លាកឈ្មោះសិស្សនិទ្ទេស A និងស្លាកឈ្មោះគណៈប្រតិភូ នៅនាយកដ្ឋានកិច្ចការ ប្រឡងនៅថ្ងៃទី០៨ ខែមករា ឆ្នាំ២០២៤ និងរៀបចំសម្របសម្រួលការចូលរួមឱ្យមានប្រសិទ្ធភាព ហើយរាល់ការចំណាយក្នុងការចូលរួមពិធីរបស់បុគ្គលិកអប់រំ នៃមន្ទីរ ជាបន្ទុករបស់មន្ទីរអប់រំ យុវជន និងកីឡារាជធានីខេត្តសាម៉ី។

លោកស្រីបណ្ឌិត ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា ជំនួបសំណេះសំណាលជាមួយសិស្សនិទ្ទេស A ដែលគ្រោងនឹងធ្វើ​ឡើងនៅថ្ងៃទី៩ មករា ខាងមុខនេះ ធ្វើឡើងក្នុងគោលបំណងអបអរសាទរចំពោះសិស្សនិទ្ទេស A និងអាណាព្យាបាលទាំងអស់ដែលមានកូនក្លាយជាសិស្សឆ្នើម ក៏ដូចជាលើកទឹកចិត្តឱ្យសិស្សានុសិស្សដែលទទួលបាននិទ្ទេស A បន្តខិតខំប្រឹងប្រែងរៀនសូត្រដើម្បីក្លាយជាសសរទ្រូងរបស់ប្រទេសជាតិ ព្រមទាំងជាចលករក្នុងការលើកទឹកចិត្តឱ្យប្អូនៗជំនាន់ក្រោយបន្តខិតខំរៀនសូត្រផងដែរ។

អ្នកនាំពាក្យក្រសួងអប់រំ យុវជន និងកីឡា បញ្ជាក់បន្ថែមថា សម្រាប់រង្វាន់ដែលគ្រោងនឹងផ្តល់ជូនសិស្សនិទ្ទេស A សម្តេចមហាបវរធិបតី ហ៊ុន ម៉ាណែត នឹងពិនិត្យរៀបចំ។

គួរជំរាបជូនដែរថា កាលប្រឡងសញ្ញាបត្រមធ្យមសិក្សា​ទុតិយភូមិ ឆ្នាំសិក្សា២០២២-២០២៣ បានប្រព្រឹត្តទៅ​កាលពីថ្ងៃទី០៦ ខែវិច្ឆិកា ឆ្នាំ២០២៣ ដោយក្នុងនោះជាលទ្ធផល មានបេក្ខជនប្រឡងជាប់សរុបមានចំនួន ៩៨,៤៦០នាក់ ដែលស្មើនឹង៧២.៨៩% ។ ក្នុងនោះ សិស្សទទួលបាននិទ្ទេស A មានចំនួនចំនួន ១៦៧៣នាក់, និទ្ទេស B ចំនួន ៦៩៦៤នាក់, និទ្ទេស C ចំនួន ១៨ ៣០៨នាក់, និទ្ទេស D ចំនួន ៣៤ ២៤៦នាក់ និងនិទ្ទេស E ចំនួន ៣៧ ២៦៩នាក់៕