ភ្នំពេញ- សហភាពសហព័ន្ធយុវជនកម្ពុជារាជធានីភ្នំពេញ សហការណ៍ជាមួយសាកលវិទ្យាល័យក្រចេះ បានសម្រេច​ផ្ដល់អាហារូបករណ៍ថ្នាក់បរិញ្ញាបត្រចំនួន៣០កន្លែងដល់សាធារណជន សិស្ស និស្សិត និងយុវជនសម្រាប់ឆ្នាំសិក្សា២០២២-២០២៣ ។ អាហារូបករណ៍ផ្ដល់ជូន ១០០% សម្រាប់និទ្ទេស A និង B និង ៥០% សម្រាប់ C D និង E ។

ជំនាញដែលអាហារូបករណ៍ផ្ដល់ឱ្យសិក្សារួមមាន ពាណិជ្ជកម្ម និងសហគ្រិនភាព, អភិវឌ្ឍកសិកម្ម និងសហគមន៍ ភាសាអង់គ្លេស រដ្ឋបាសាធារណៈ គណិតវិទ្យា និងអក្សរសាស្ត្រខ្មែរ ។ វេនសិក្សាសម្រាប់អាហារូបករណ៍មានវេន ច័ន្ទ-សុក្រ ពេលព្រឹក៧:៣០-១១:៣០នាទី និងពេលរសៀល ១:០០-៥:០០នាទី វេនចុងសប្ដាហ៍ ពេលព្រឹក៨:០០-១១:០០ និងពេលរសៀល ២:០០-៥:០០នាទី ។

លក្ខខណ្ឌនៃការជ្រើសរើសបេក្ខជនត្រូវមានសញ្ញាបត្រមធ្យមសិក្សាទុតិយភូមិ(Bac II) ឬឯកសារបញ្ជាក់ដែលមានតម្លៃស្មើសម្រាប់ការសិក្សថ្នាក់បរិញ្ញាបត្រ ។ បេក្ខជនត្រូវឆ្លងកាត់ការប្រកួតប្រជែងជ្រើសរើសដែលរៀបចំដោយក្រុមការងារកម្មវិធីសាបព្រោះគ្រាប់ពូជនៃសហភាពសហព័ន្ធយុវជនកម្ពុជា រាជធានីភ្នំពេញ ។

ជាមួយគ្នានេះបេក្ខជនត្រូវភ្ជាប់ជាមួយឯកសារចាំបាច់មួយចំនួនដូចជា ពាក្យសុំអាហារូបករណ៍១ច្បាប់ បង្កាន់ដៃទទួលពាក្យស្នើសុំអាហារូបករណ៍១ច្បាប់ ជីវប្រវត្តិសង្ខេបដែលមានបិទរូបថតថ្មី(៤x៦)១ច្បាប់ អត្តសញ្ញាណប័ណ្ណសញ្ជាតិខ្មែរ ឬសេចក្ដីចម្លងសំបុត្រកំណើត/សំបុត្របញ្ជាក់កំណើត១ច្បាប់ រូបថតក្នុងពេលថ្មីៗទំហំ(៤x៦ ស.ម ថតពីមុខគ្មានវែនតា និងមានផ្ទៃខាងក្រោយពណ៌ស ចំនួន៣សន្លឹក ។

បេក្ខជនជ័យលាភីអាហារូបករណ៍នឹងទទួលបានអត្ថប្រយោជន៍នៃសិក្សាដូចជា កន្លែងស្នាក់នៅ (សម្រាប់បេក្ខជនដែលមានជីវភាពក្រីក្រ ឬពីតំបន់ដាច់ស្រយាល) មានឱកាសស្នើសុំបម្រើការងារជានិស្សិតស្ម័គ្រចិត្ត ឬជាជំនួយការគម្រោង ។ លើសពីនេះក្រោយបញ្ចប់ការសិក្សានិស្សិតអាចដាក់ពាក្យស្នើសុំបម្រើការងារជាមន្ត្រីជាប់កិច្ចសន្យាជាគ្រូជំនួយ ឬប្រឡងចូលបម្រើការងារពេញម៉ោងនៅសាកលវិទ្យាល័យក្រចេះដោយផ្ទាល់ ។

សម្រាប់បេក្ខជនដែលមានចំណាប់អារម្មណ៍ក្នុងការដាក់ពាក្យសូមបំពេញទម្រង់បែបបទស្នើសុំអាហារូបករណ៍ឱ្យបានត្រឹមថ្ងៃទី០៥ ខែកុម្ភៈ ឆ្នាំ២០២៣ វេលាម៉ោង៥:៣០នាទីល្ងាច ។ សម្រាប់ព៏ត៌មានបន្ថែមសូមទំនាក់ទំនទៅកាន់ ០១៦ ៨៣១ ៣៩៧ ៕