ក្នុងឱកាសអញ្ជើញជាអធិបតី​ក្នុងពិធី​ប្រគល់​សញ្ញាបត្រ​ជូននិស្សិតសាកលវិទ្យាល័យ​ អាស៊ី អឺរ៉ុប នាព្រឹក​ថ្ងៃទី១៩ ខែកុម្ភៈ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រ​កម្ពុជា បានមានប្រសាសន៍ទៅកាន់​និស្សិត​ជ័យលាភីទាំងអស់ ចាំបាច់​បន្តសិក្សា​រៀនសូត្រ​បន្ថែមពេញមួយ​ជីវិត ដើម្បីពង្រីកចំណេះដឹងរបស់ខ្លួនឱ្យកាន់តែទូលំទូលាយ ព្រមទាំង​ពង្រឹងភាពប្រកួតប្រជែងរបស់ខ្លួននៅក្នុងទីផ្សារការងារ ដែលមានការប្រកួតប្រជែងកាន់តែខ្ពស់ជាមួយបណ្តាជនក្នុងប្រទេស និងក្រៅប្រទេស។

ព្រមជាមួយគ្នានេះ ក៏​ត្រូវ​តាម​ឱ្យ​ទាន់បច្ចេកវិទ្យាថ្មីៗ ក៏​ដូចជា​បច្ចេកវិទ្យាបញ្ញាសិប្បនិម្មិត (AI) ដែលមានការរីកចម្រើន​យ៉ាងឆាប់រហ័ស ដើម្បីអាច​មានលទ្ធភាពប្រើប្រាស់បច្ចេកវិទ្យាទាំងនោះបង្កើនផលិតភាពការងារ។

បើតាមប្រសាសន៍សម្តេចធិបតី បច្ចេកវិទ្យាបញ្ញាសិប្បនិម្មិត​អាច​នឹង​ជំនួសការងារ​មួយផ្នែក​នៅ​ក្នុងទីផ្សារ​ការងារ​ ដូចជាការផ្តល់ព័ត៌មាន ប្រាប់ផ្លូវ បកប្រែភាសា ក៏​ដូចជាវិភាគទិន្នន័យជាដើម ។ ដូច្នេះ ការបន្តសិក្សារៀនសូត្រ អភិវឌ្ឍជំនាញ និងការប្រើប្រាស់បច្ចេកវិទ្យា គឺមិនត្រឹមតែជាការងារបន្ទាប់បន្សំនោះទេ ប៉ុន្តែជាការងារស្នូលដែលបញ្ញាវន្ត និងអ្នកជំនាញ ត្រូវឱបក្រសោប ដើម្បីធានាស្ថិរ​ភាពការងារ និងសេចក្តីរុងរឿង ថ្កុំថ្កើននៃសង្គមជាតិកម្ពុជាខាងមុខ។

“ពាក្យថា រៀនហើយ រៀនទៀត រៀនឥតឈប់ឈរ វាអត់ខុសទេ… ដើម្បីធានានូវការប្រកួតប្រជែង ទាល់តែយើង Update ជាប់ជាប្រចាំ បើមិនអញ្ចឹងយើងនឹងក្លាយទៅជា​របស់ហួសសម័យ…”

សម្តេចនាយករដ្ឋមន្រ្តី ក៏បានផ្ដល់អនុសាសន៍ដល់ក្រសួងអប់រំ យុវជន និង កីឡា បន្តពង្រឹងកម្មវិធីសិក្សា និងបំផុសឱ្យសិស្សានុសិស្ស និងនិស្សិត អភិវឌ្ឍចំណេះដឹងជាប់ជាប្រចាំ តាមរយៈការស្វ័យសិក្សា, ការសិក្សាស្រាវជ្រាវ និងការសិក្សាបន្ត ដើម្បីរួមចំណែកដល់ការអភិវឌ្ឍធនធានមនុស្ស ប្រកបដោយសក្តានុពល និងផលិតភាព និងការកសាងពលរដ្ឋឌីជីថលនៅកម្ពុជា សម្រាប់ទាញយកផលប្រយោជន៍ជាអតិបរមា​ពីបរិវត្តកម្មឌីជីថល ក៏ដូចជារួមចំណែកដល់ ការកសាងម៉ូដែលកំណើនថ្មីកម្ពុជា​ដែលផ្អែកលើជំនាញ​បច្ចេកវិទ្យា និងនវានុវត្តន៍។

ហើយ​ជាមួយគ្នា សម្តេចធិបតី ក៏​ស្នើ​ដល់ក្រសួងអប់រំ បន្តធ្វើការសហការជាមួយវិស័យឯកជនធ្វើការកែទម្រង់ប្រព័ន្ធសិក្សា ឱ្យកាន់តែល្អប្រសើរ, អភិវឌ្ឍ និងធ្វើបច្ចុប្បន្នកម្មនៃកម្មវិធីសិក្សា ដោយផ្តោតការយកចិត្តទុកដាក់បន្ថែម ទាំងជំនាញបច្ចេកទេស, ជំនាញរឹង និងជំនាញទន់, ជាពិសេសការធ្វើការងារជាក្រុម, ការគោរពវិន័យ និងក្រមសីលធម៌វិជ្ជាជីវៈ ក្នុងកន្លែងការងារ តាមរយៈការពង្រឹងក្របខ័ណ្ឌគុណវុឌ្ឍជាតិ, ការបង្កើតស្តង់ដារជាតិលើការអភិវឌ្ឍមុខជំនាញ សំដៅឆ្លើយតបទៅនឹង​សេចក្តីត្រូវការទីផ្សារពលកម្ម, ការបង្កើតឱកាសទទួលបានការងារ និងប្រើប្រាស់ឱ្យអស់​សក្តា​នុពលប្រជាសាស្ត្ររបស់កម្ពុជា ក៏ដូចជា ដើម្បីបង្កើតលក្ខខណ្ឌសមស្របសម្រាប់ពលករកម្ពុជា៕